JA TYEMPO ochyon bʼa eskwela, ja jsakʼanili mini jel tukbʼi. Ja yal untik waxa mojan ja bʼajtan jabʼil bʼa eskwela jani lajan wala elkansok. Sok ja bʼa chonabʼ jaw, tʼusan mi kibʼanaltikon wa xnaʼa ja jbʼiʼiltikoni.

Ja bʼa Liberty joybʼanubʼal ajyi yuj chʼin pinkaʼik sok alajik bʼa ixim. Ja jtat wani x-aʼtiji sok jun swinkil pinka ja bʼa chonabʼ ja yajni manxiyoni. Ja yuj, yajni wanon solteroʼaxeli jnebʼa syamjel jun tractor sok skʼulajel tuk aʼtelik bʼa alaj.

Ayxa skʼujol ja jtat ja manxiyoni, pes ayxa yiʼoj 56 jabʼil, jaxa jnani 35. Anima jachuk, ja yeʼn juntoni tsatsal winik, jel lek ja splanta sok jelni lek ay. Cha jelni x-aʼtiji sok sjeʼakitikon aʼtel. Ama mi skʼulan ganar aʼay takʼin, ajyini jun jnajtikon, jkʼutikon sok jitsan jwaʼeltikon. Tolabida yakitikon ja jas makuni kujtikoni. Cham ja jtati ja yajni ayiʼoj 93 jabʼil, jaxa jnani yajni ayiʼoj 86. Mini june bʼa yeʼnle yaʼteltay ja Jyoba. Pe june ja bʼa jmoj-alijeliki wan yaʼteltajel ja Jyoba jastal ansyano man jabʼil 1972.

Ja jnan jelni wa skʼuʼan ajyi bʼa relijyon sok wa  xyiʼajotikon bʼa iglesya bautista yibʼanal ja domingoʼik. Yajni ay kiʼoj 12 jabʼil, kabʼ alji sbʼaja oxe dyos staʼunej sbʼaj sok jobʼoyi ja jnan: «¿Jastal modo yeʼn ja Jesús ja Uninal sok cha yeʼn ja Tatali?». Wanto xjul jkʼujol ja yalakabʼ: «Ja jaw mi wa xnaxi kala al. Mini xbʼobʼ kabʼtik stojol». Sok meraniʼa mini xkabʼ stojol ja jaw. Pe ama jachuk kiʼaj jaʼ yajni 14 jabʼil kiʼoj bʼa jun yal yok jaʼ ja bʼa lugari, bʼa mukjiyon oxe ekʼele: june, ja yuja Tatali, xchabʼil, yuja Uninali sok yoxil yuja ipali.

Ja bʼa secundaria, ajyikuj jun kamigo bʼa wa xtiroʼani boxeo sok ya kʼokxukon bʼa oj cha jkʼul boxear. Ja yuj, kʼe jchap jbʼaj sok ka ochuk ja jbʼiʼil ja bʼa Golden Gloves, jun kʼole ixuk winik bʼa wa skʼulane boxear. Mi jel xbʼobʼkuj, ja yuj tsaʼan, kaʼakan yajni tiroʼaniyon bʼa jujuntik ekʼele. Mas tsaʼan yamjiyon yuja soldadoʼik bʼa Estados Unidos sok jekjiyon bʼa Alemania. Yajni tixa ayon tiw, ja matik chaʼan xchol sjekawone bʼa jun eskwela bʼa soldadoʼik yujni wa skʼuʼane oj bʼobʼ kʼotkon jastal olomal bʼa soldadoʼik. Wani skʼanawe oj kʼotkon jun soldado bʼa jel chapan. Pe yuja mi jaʼ wa xkʼana oj jkʼuluk ja jaw, kaʼakan ja eskwela yajni ekʼ ja chabʼ jabʼil tʼilan wa skʼanawe oj kʼulaxuki, bʼa 1956. Tʼusan tyempo tsaʼan, jchapa jbʼaj bʼa jun tikʼe soldado bʼa mas tuk.

Ja bʼa tyempo jaw bʼa jsakʼanili, kʼotyontani ja «meran winik» wa xyawe sbʼiʼiluk ja ixuk winiki. Jachni och jpensaraʼuk sbʼaja jas wa sjeʼa ja pelikulaʼik soka matik sjoybʼunejon wa xyalawe sbʼaja meran winiki. Bʼa keʼna ja winike matik wa xcholowe, mi meran winikuke. Pe och jnebʼ jastik junuk bʼa stukbʼes ja jsakʼanili. Jun kʼakʼu, yajni wajumon ja bʼa chakal jkarro bʼa jel tsamal ja bʼa chonabʼi, chabʼ akʼixuk skʼumayone. Wani xnaʼa sbʼaje, pes ja yijtsʼinik ja statam ja kijtsʼini. Sok xchawanile Taʼumantiʼe. Bʼa tuk ekʼele akʼubʼalkanki Ja Juʼun Cholumani soka ¡Despertad!, pe bʼa keʼna Ja Juʼun Cholumani wa xkabʼ mini pasiluk yabʼjel stojolil. Pe ja bʼa ekʼele it, slokowone bʼa oj wajkon ja bʼa Tsomjel bʼa Kongregasyon bʼa wa xPaklaxi ja Biblia, jun yal chʼin tsomjel bʼa ti wa xkʼulaxi ajyi bʼa snaje bʼa wa xpaklaxi ja Biblia sok wa x-axi komentario. Kala yabʼye oj jpensaraʼuk. Pe ja yeʼnle stsetsuniyexta sjobʼoweki, «¿meran maʼ lek oj wajan?». Jaxa keʼn kala, «meran lek».

Jnaʼa malaya yuja kala oj wajkoni, pe kabʼ lajansok mixani xbʼobʼ kal miyuk. Ja yuj, wajyon ja bʼa tsomjel ja akwal jaw. Ja jas jel cham kila jani ja yal untik jel wa snaʼawe bʼa Biblia. Anima jitsan domingo wajyon ja bʼa iglesya soka jnani, mini jas mas jnebʼa. Pe ja wego wanxani xkʼana oj nebʼ mas sok jkʼanani oj ajuki jun estudio bʼa Biblia. Wego jnebʼa ja sbʼiʼil ja Dyos ja maʼ jel ja yipi, sbʼiʼil Jyoba. Jabʼilik bʼajtan, yajni jobʼoyi ja jnan machunkiluk ja taʼumantiʼik bʼa Jyoba, yalakabʼ: «Ah, ja yeʼnle wa stoyowe jun winik ayxa lek skʼujol sbʼiʼil Jyoba». Lajansok ti och jamxuk ja jsati.

Jelni wego jnebʼa yujni kabʼ jtaʼata ja smeranili, sok kiʼaj jaʼ bʼa marzo bʼa 1957. Kechan ekʼ bʼalune ixaw tsaʼan ja bʼa sbʼajtanil tsomjelali. Tukbʼini ja jastal wa xkila ja sakʼanili. Yajni wa xjul jkʼujol ja pensar kiʼoj ajyi sbʼaja «meran winiki», gustoni ayon yuja jnebʼa ja jasa wa sjeʼa ja Biblia bʼa jastal jun meran winik. Ja Jesús tojni waji. Mini oj slaj  ja tuk winik, pes yujni mas jel tsats sok mas jel ja yip ja yeʼn. Pe mini xchʼika sbʼaj bʼa tiroʼanel, jastalni alubʼalxakan, yaʼakan ‹bʼa oj ajuk wokolanuk› (Is. 53:2, 7). Jnebʼa ja meran nochuman bʼa Jesús tʼilani «yaj oj yab spetzanil ja smoji» (2 Tim. 2:24).

Jaxa bʼa 1958, ochyon precursor. Pe tʼusan tsaʼan kaʼakan bʼa jun tyempo. ¡Pes jpensaraʼan oj nupanukon! Nupaniyon soka Gloria, june ja bʼa akʼixuk slokowon ja bʼa tsomjeli. Mini wa xnaʼa malaya yuja jas jtsaʼa skʼulajel, yujni ja Gloria jel chaʼanyabʼalil ajyi sok jachtoni ja wego. Bʼa keʼna, masni chaʼan stsʼakol yuj jun tsamal diamante sok jelni gustoʼayon yuja nupaniyonsok. Ja wego oj xchol awabʼyex tʼusan ja Gloria sbʼaja sakʼanili:

«Ajyi 17 yuntikile ja jnantati. Ja jnani wajni jun Taʼumantiʼ bʼa ajyi toj sok cham ja yajni ay kiʼoj 14 jabʼil. Ja bʼa tyempo jaw, ja jtat och skʼul estudiar ja Biblia. Yuja mixa tey ja jnani, ja jtat staʼa loʼil ja director bʼa eskwela sbʼaja jwats bʼa ojxta elkan ja bʼa secundaria. Sok sjobʼoyi ta oj bʼobʼ wajkon jun kʼakʼu ja eskwela sok jun kʼakʼu ja jwatsi. Yajni june ja bʼa keʼntikon wa xwaj ja bʼa eskwela, ja juni yeʼn wa xkan bʼa naʼits bʼa stalnajel ja kijtsʼintikoni sok bʼa stojbʼesel ja jwaʼeltikon bʼa oj waʼkotikon lajan soka jtat yajni xjul ja bʼa aʼteli. Ja director yakitikon permiso sok jachni jkʼulantikon man elkan ja jwatsi. Chabʼ pamilya bʼa Taʼumantiʼe yawekitikon estudio bʼa Biblia, ja keʼn sok 10 ja bʼa jmoj-alijeliki ochtikon taʼumantiʼ bʼa Jyoba. Jelni xkʼulan gusto ja xcholjeli, anima jel wala kʼixwiyon loʼilanel. Pe ja Sam jelni skoltunejon ja janekʼ tyempo ekʼeljani».

Nupaniyon soka Gloria bʼa febrero bʼa 1959. Jelni kabʼtikon stsamalil ja aʼtel lajan bʼa precursoril. Yuja wa xkʼanatikon oj aʼtijukotikon ja bʼa mero yechalil wa xkʼelxi ja kaʼteltiki, bʼa julio bʼa jabʼil jaw, jbʼutʼutikon ja solicitud bʼa wajel bʼa Betel. Skʼulanotikon entrebistar jun jmoj-aljeltik sbʼiʼil Simon Kraker. Pe yalakabʼtikon ja Betel mi wa skʼana nupanumik ja bʼa tyempo jaw. Anima, mini el ja kʼankʼunel kiʼojtikon bʼa wajel bʼa Betel, ekʼto jitsan jabʼil ja tito lokjitikon.

Jtsʼijbʼantikonyi ja bʼa mero yechalil wa xkʼelxi ja kaʼteltiki bʼa sjobʼjelyi bʼa oj wajkotikon koltanel. Ja bʼa sjakʼjeli, kechan aljikabʼtikon jun lugar: bʼa Pine Bluff, Arkansas. Ja bʼa tyempo jaw kechan ajyi chabʼ kongregasyon, june bʼa sak yelawe sok june bʼa kʼikʼ. Jekjitikon ja bʼa kongregasyon bʼa kʼikʼ, bʼa ajyi junuk 14 cholumanik.

Bʼobʼta waxa jobʼo abʼajex jas yuj ja kongregasyonik bʼa taʼumantiʼik bʼa Jyoba pilubʼal ajyi bʼa tuktukil rasa. Yujni ja bʼa tyempo jaw, mini jas wa xbʼobʼ kʼulaxuk. Ja leyik wa stima ja ixuk winik bʼa tuktukil rasa bʼa mok ajyuke lajan ja bʼa lugarik jel ixuk winik, sok jel xiwela sbʼaj oj ixtalajuke. Bʼa jitsan lugarik, ja jmoj-aljeltik jelni wa xiwye oj ixtalajukyile ja Naʼitsik bʼa wa stsomo sbʼaje ta ajyiye lajan soka matik sak yelawe soka matik kʼikʼi. Pes yujni ayxa bʼa ekʼela. Ta ja Taʼumantiʼik bʼa kʼikʼ yelawe wa xcholowe ja bʼa lugarik wa x-ajyiye ja matik sak yelawe, ojni bʼobʼ yamjuke yuja policiaʼik sok oj makʼjuke. Ja yuj, bʼa oj bʼobʼ jcholtikon, wa xkʼuʼantikon ja leyik jaw bʼa smajlajel oj tukbʼuk.

Ja xcholjeli ajyini swokolil. Ayni ekʼeleʼik wa xcholotikon bʼa lugarik wa x-ajyiye ja matik kʼikʼ yelawe, sok ayni wa xtʼaspuntikon ja snaje ja matik sak yelawe. Anto tʼilan wego wa xpensaraʼantikon jas oj jkʼuluktikon, ta oj jcholtikon yabʼye ma skʼanjel perdon sok elel wego. Jach wa xtax ja bʼa tyempo jawi.

Bʼa oj jmakʼlay jbʼajtikon tʼilani tsats oj aʼtijukotikon. Tʼusan mi yibʼanaluk ja bʼa aʼteliki jel koʼel wala tupjitikon. Ja Gloria aʼtiji bʼa jujuntik naʼits sok ayni skʼanawe oj jkoltay bʼa jachuk saj oj chʼakotikon. Bʼajtanto oj wajkotikon, jaʼ wa xkabʼtikon ja waʼelal kʼixnubʼal wa x-ajikitikoni. Yibʼanal ja semanaʼik, ja Gloria wa skʼulanyi planchar ja skʼu jun pamilya, jaxa keʼn wala aʼtijiyon bʼa tsʼunubʼal nichim, wa xkusu ja bentanaʼiki sok wa xkʼulan tuk jasunuk. Bʼa snaj jun pamilya bʼa sak yelawe, ja Gloria wa skusu bʼa yojol ja bentana jaxa keʼn ti bʼa jwera. Yuja snajtil kʼakʼu wa xyiʼaj kujtikon skusjel  ti wa x-aji jwaʼeltikon tiw. Pe ja Gloria ti wa xwaʼ yojol, pe mi jaʼuk soka pamilya jaw, jaxa keʼn ti bʼa wa snolowe ja karro. Pe mi xkayi stʼilanil. Ja waʼelali jelni x-ajbʼani. Ja pamilya jaw jelni leke, kechan jachni wa spensarane jastalni ja tuk. Wanto xjul jkʼujol jun ekʼele kʼotikon tekʼan bʼa yajel ochuk gasolina. Yajni jbʼutʼutikon ja tanque bʼa karro, jobʼoyi ja winik ta oj bʼobʼ ochuk bʼa baño ja Gloria. Ja yeʼn mini jel lek skʼelawon sok yalakabʼ: «Lutan ay».

Cha jelni tsamal ekujtikon soka jmoj-aljeltiki. ¡Sok jelni xkʼanatikon ja xcholjeli! Yajni kʼotikon ja bʼa Pine Bluff, ti jijlitikon bʼa snaj ja tejkʼanubʼal bʼa kongregasyon. Ja xcheʼumi mi taʼumantiʼuk, jaxa Gloria kʼe yayi estudio bʼa Biblia. Jaxa keʼn kʼe kayile estudio ja yakʼixi soka statami. Ja nanali soka yakʼixi kʼe yaʼteltaye ja Jyoba sok yiʼaje jaʼ.

Ajyi kamigotikon ja bʼa kongregasyon bʼa sak yelawe. Wani slokowotikone waʼel, pe kechani wala wajtikon ja yajni akwalxa bʼa jachuk mi oj iljukotikon ja lajan aytikon. Ja kʼole Ku Klux Klan, bʼa jani wa snikawe yilkʼujolajel ja maʼ tuk rasa sok spekʼjel chikʼ, jelni tsomane ja bʼa tyempo jaw. Wanto xjul jkʼujol jun akwal bʼa kʼin santo, jun winik ti kulan ajyi bʼa stiʼ snaj sok stoyxta slapunej jun sakal skʼu sok smakunej ja sniʼ sati, jastalni wa skʼutes sbʼaje ja bʼa kʼole Ku Klux Klan. Pe ja jaw mini stima ja jmoj-aljeltik bʼa sjejel lekil skʼujole. Bʼa jun tyempo bʼa verano, mey jtakʼintikon bʼa oj wajkotikon ja bʼa niwan tsomjelal, sok jun jmoj-aljeltik smana kitikon ja jkarrotikon Ford bʼa 1950 bʼa oj bʼobʼ wajkotikon. Jun ixaw tsaʼan, tsikelxta kʼotikon ja bʼa jnajtikon yuja syajal ja kʼakʼu bʼa verano ja yajni chʼaktikon xcholjeli soka skʼulajel ja estudio kiʼojtikoni. ¡Jelni cham kilatikon ja tey ja jkarrotikon ja yajni kʼotikon ja bʼa jnajtikoni! Ja bʼa parabrisa tey jun nota bʼa wa xyala: ¡Wa xkaʼ kumxukawilex jawa karroʼexi. Jun majtanal, ja wa moj-aljel!

Cha ajyi pilan ekʼele bʼa jejiki lekil kʼujolal bʼa jelni chamkila. Ja bʼa 1962, lokjiyon ja bʼa Eskwela sbʼaja ansyanoʼik sok skoltuman ansyanoʼik ja bʼa South Lansing, Nueva York. Juni chapjelal bʼa jun ixaw sbʼaja biajanteʼik, distritoʼik soka matik wa xkʼelatikon ja kongregasyoniki. Pe yajni lokjiyoni, mey kaʼtel sok mey kiʼoj jitsan takʼin. Jun empresa bʼa telepono bʼa Pine Bluff skʼulayone entrebistar bʼa jun aʼtel. Ta ajiki ja aʼteli keʼntoni bʼajtan oj aʼtijukon ja tiw bʼa kʼikʼ ja yelawi. Pe alji kabʼ oj ajuki ja aʼteli. ¿Jasa oj jkʼuluki? Mini ay jtakʼin bʼa oj wajkon ja bʼa Nueva York. Jpensaraʼan ojni aʼtijukon sok mas lek mi oj wajkon ja bʼa Eskwela. Pe yajni oj xa jtsʼijbʼuk jun karta bʼa yaljel mi oj wajkon ja bʼa lokjelal ajiki, ekʼ jun jasunuk bʼa mini oj chʼay jkʼujol.

Jun jmoj-aljeltik ixuk ja bʼa kongregasyon, bʼa mi Taʼumantiʼuk ja statami, skʼojtsin ja jnajtikon bʼa jun saʼan sakbʼel sok yaki jun yal sobre bʼutʼel takʼin.  Ja yeʼn sok jujuntik ja chʼin yuntikili sajto wa xkʼeye bʼa oj aʼtijuke ja bʼa yalajil tenokʼ bʼa sjotsjel kʼul. Yalawe kabʼ oj bʼobʼ wajkon ja bʼa Nueva York soka takʼin jaw. Ja jmoj-aljeltiki yala kabʼ: «Kaʼax ja bʼa eskwela sok nebʼa ja janekʼ oj bʼobʼukawuji, sok yajni la kumxi tixa jeʼakitikon spetsanil ja janekʼ anebʼa». Tsaʼan ja bʼa jaw, jobʼoyi ja empresa bʼa telepono ta oj bʼobʼ kʼe aʼtijukon joʼe semana tsaʼan jastalni yabʼalil, pe yalawe kabʼ miyuk. Anima, mini cham jkʼujol yujni jpensaraʼanta ja jas oj jkʼuluki. Jelni gustoʼayon yuja mi jyama ja aʼtel jaw.

Ja Gloria oj xcholkabʼtik jastal wa xjul skʼujol ja jastal ekujtikon ja bʼa Pine Bluff: «Jelni jkʼulan gusto ja territorio. Wa xkaʼa 15 ma 20 estudio ajyi. Ja bʼa saʼan sakbʼeli wala wajtikon xcholjel bʼa naʼits naʼits, yajni wala chʼaktikon tixa wa xwaj katikon ja kestudiotikoni. Ayni ekʼele wala chʼaktikon las 11 ja bʼa akwali. ¡Jelni lek wa x-ekujtikon ja bʼa xcholjeli! Jelni jgusto oj kankon tolabida ajyi ja tiw sok mini oj kakan ajyi ja lugar jaw mokxta jekjukotikon biajanteʼil. Pe ja Jyoba pilanxani aʼtel yiʼoj bʼa keʼntikon». ¡Sok jachni ekʼa!

Yajni wantikonto aʼtel jastal precursor ja bʼa Pine Bluff, jbʼutʼutikon ja solicitud bʼa precursor especial. Jkʼuʼantikon lek ojni ajukitikon, yujni ja biajante bʼa distrito wa skʼana oj wajkotikon koltanel bʼa jun kongregasyon bʼa Texas jastal precursorik especial. Jelni wa xkʼanatikon oj jeltesukotikon. Jitsan tyempo jmajlaytikon. Pe mini jas jul jbʼajtikon. Tʼusan tsaʼan, bʼa enero bʼa 1965, jul jbʼajtikon jun karta. ¡Jekjitikon biajanteʼil! Ja bʼa tyempo jaw, cha aji och biajanteʼil ja jmoj-aljeltik Leon Weaver, sok ja wego yeʼnani ja maʼ wa xkoltani skʼeljel ja yaʼtel ja Olomalik bʼa Naʼits Betel bʼa Estados Unidos.

Jelni wala xiwyon ajyi ja spensarajel oj kʼotkon jastal biajante. Tʼusan mi jun jabʼil bʼajtan, ja biajante bʼa distrito James Thompson, spaklay ja jastal wanon aʼteli. Yalakabʼ bʼa jastik junuk oj tojbʼukon soka lekil modoʼalik jel tʼilan bʼa kʼotel jun lekil biajante. Yajni wanonxa aʼtel biajanteʼil, kila jelni xmakuni ja rasonik yaki. Ja jmoj-aljeltik Thompson yeʼnani ja bʼajtan biajante bʼa distrito bʼa yulatayotikon tsaʼan yajni ochyon biajanteʼil. Jelni jas jnebʼa ja bʼa jmoj-aljeltik jaw jel takʼan ayi.

Ja bʼa tyempo jaw, ja biajanteʼik bʼa circuito jelni tʼusan chapjelal wa x-ajiyile. Kila jun semana jastal jun biajante wa xyulatay jun kongregasyon sok bʼa pilan semana yeʼnxa cha yilawon sok yalakabʼ jas oj jkʼuluk. Tsaʼan, tixa kantikon jtuchʼiltikon. Wanto xjul jkʼujol ja kala yabʼ ja Gloria: «¿Meran ja ojxa wajuki?». Pe tyempo tsaʼan, jnaʼa jun  jasunuk jel tʼilan: tolabida oj ajyuk jmoj-aljeltik bʼa oj skoltaya pe kechan ta ja weʼn waxa waʼabʼaj. Gustoxtani wa xjul jkʼujol ja skoltanele jujuntik jmoj-aljeltik bʼa mas wanxa snaʼawe jastal ja James Brown, bʼa wajni jun biajante sok ja Fred Rusk, bʼa kʼotni jun betelita.

Ja bʼa tyempo jaw, ja ilkʼujol yuja rasaʼik jelni ipaxi. Jun ekʼele, ja kʼole Ku Klux Klan xchapa jun marcha bʼa jun chonabʼ bʼa Tennessee bʼa ti wantikon ulatanel. Bʼa pilan ekʼele, wanto xjul jkʼujol wantikon xcholjel sok jun kʼole jmoj-aljeltik sok kʼotikon tekʼan bʼa ay jas oj kabʼtikon bʼa jun restaurante. Yajni wajyon bʼa baño, kila ay maʼ snochowon bʼa jel tuk skʼeljel sok bʼutʼel tatuaje bʼa wa xyilkʼujolan ja rasaʼiki. Pe jun jmoj-aljeltik bʼa sak ja yelaw, bʼa mas niwan sok yij yuja yeʼn snochowotikon sok sjobʼoki: «¿Lek maʼ ay jmoj-aljel Herd?». Ja winiki mixani och ja bʼa baño, wego spaka ajnel. Ja janekʼ tyempo ekʼeljani, kilunej ja ilkʼujolanel mini jaʼuk yuja yelaw jun ixuk winik, jani yuja mulal ya ekankitik ja Adán. Cha jnebʼunej ta june kʼotel jmoj-aljeltik yujni jun jmoj-aljeltik, ama chikan jas yelaw sok ojni yaʼ ja sakʼanil yuj weʼna ta ay stʼilanili.

Aʼtijitikon 12 jabʼil biajante bʼa circuito sok 21 jabʼil bʼa distrito. Wajni jabʼilik jel chaʼanyabʼalil, kilatikon jitsan slekilal sok jastik tsamal ekʼ jbʼajtikon. Pe mi kechanuk ja jaw. Ja bʼa agosto bʼa 1997, kʼotni meran ja jas jel xkʼanatikon. ¡Lokjitikon bʼa Betel bʼa Estados Unidos! Jaxa bʼa ixaw nochani kʼe jtultikon ja kaʼteltikon bʼa Betel, pe ekʼto junuk 38 jabʼil tsaʼan, ja yajni jbʼutʼutikon ja bʼajtan solicitud. Jpensaraʼan ta kechanta tʼusan tyempo oj jkoltaye ja jmoj-aljeltik matik ay xcholi, pe mini jach elkʼota.

Ti aʼtijiyon bʼajtan ja bʼa Opisina wa xkʼelxi ja xcholjeli sok jelni jnebʼa ja tiw. Ja jmoj-aljeltik wa xyawe sjakʼjelik ja sjobʼjelik jel wokolik sok xiwela sbʼaj wa xyaʼawe ja ansyanoʼik soka biajanteʼik bʼa spetsanil ja paisi. Jel chaʼanyabʼal kila ja jastal koltajiyoni soka sjeʼaweki sok pasensya. Lek la jekjiyon pilan ekʼele ja bʼa aʼtel jaw, tʼilani oj cha jnebʼe.

Ja keʼn soka Gloria jelni wa xkʼulantikon gusto ja sakʼanil bʼa Betel. Tolabida saj wala kʼetikon sok ja jaw jelni xkoltani ja bʼa aʼtel it. Jun jabʼil tsaʼan, och aʼtijukon soka Tsome Olomalik bʼa Xcholjel yiʼoj ja Tsome Tojwanumi. Jaxa bʼa 1999, tʼojiyon bʼa kʼotel june ja bʼa Tsome Tojwanum. Spetsanil ja jasa jnebʼunej ja bʼa cholal it, ja jasa mas tʼilani jani ja Jesukristo yeʼn wan stojel ja xchonabʼil ja Dyos sok mi jun winikuk.

Yajni wa xpensaraʼan ja tyempo ekʼeljani, ayni ekʼele jach wa xkabʼ jastal ja aluman Amós. Ja Jyoba yila ja talnanum chej jaw, bʼa aʼtiji xchʼubʼjel higoʼik bʼa sicómoroʼik, jun tekʼul bʼa jani swaʼel ja matik pobre. Ja Dyos ya och aluman sok ya koʼyi jitsan slekilal (Amós 7:14, 15). Jachni yilawon ja Jyoba ja keʼn, yunin june maʼ jel pobre wa x-aʼtiji bʼa pinka bʼa Liberty sok ya koki jitsan jlekilal bʼa mini xbʼobʼ chʼak jchole (Prov. 10:22). Anima pobre manxiyon, ja Jyoba yaʼunej rikoʼaxuk ja jsakʼanil soka jastal wala taxyon soki, mastoni yuja janekʼ ekʼ ja bʼa jpensari.