JA Allen * wa xyala: «Yajni jeltes jbʼaj ja bʼa kongregasyon it, jel xiwel ajyiyon. Mi xnaʼa ta oj jtaʼ yajkʼachil kamigoʼik sok ta lek oj yil-one ja jmoj-aljeltiki». Ja Allen ti wan aʼtel bʼa jun kongregasyon bʼa mas ja 1,400 kilometro snajtil yiʼoj ja snaji.

Ta ja weʼn atukbʼesnej jawa kongregasyoni, bʼobʼta cha xiweltik aya. ¿Jas oj skoltaya bʼa oj kʼajyan? ¿Jas oj bʼobʼa kʼuluk ta mas wana yijel wokol yuja jastal waxa majlay ajyi? Ta ja weʼn mi atukbʼesnejuk abʼaj, ¿jastal oj bʼobʼa koltay ja maʼ kʼotele ja bʼa wa kongregasyoni?

Yajni jun ibʼe teʼ wa xjeltesji slugar, wa xyiʼaj wokol. Bʼa mi jel oj yiʼ wokol ja yajni wa xjeltesji slugari, wa xkʼutsxi tʼusan mi yibʼanaluk ja yechi. Tsaʼan, tʼilani wego oj cha kʼe eluk yajkʼachil ja yechi. Jastalni ja jaw, sjeltesel jbʼajtik bʼa pilan kongregasyon bʼobʼta wokoltikniʼa. Ja weʼn awiʼojxani awech ja bʼa kongregasyon ajyiya, pes ajyi lekil awamigoʼik sok kʼajyelaxani soka oraʼik awiʼoj bʼa yaʼteltajel ja Dyosi. Ja wego tʼilan oj cha kʼe ajyuk jawa wechi bʼa oj kʼajyan ja bʼa yajkʼachil kongregasyoni. ¿Jas oj bʼobʼ skoltaya? Jani yajel makunuk ja rasonik bʼa Biblia. La kiltik jujuntik.

Ja maʼ wa skʼuman tikʼan tikʼan ja yabʼal ja Dyosi «oj kʼot ajyuk jastal jun teʼ tsʼunubʼal bʼa stsʼeʼel ja yok jaʼi, sok wa satini lek ja bʼa styempoʼi, soka spowili mini xtakiʼa. Sok spetsanil ja jas wa skʼulani lekni oj elkʼota» (Sal. 1:1-3).

Bʼa lek oj ajyuk jun teʼ, wa skʼana tikʼan oj ochuk ja yaʼleli. Junxtani soka yaʼtijum Dyosi, bʼa tsats oj ajyuk tʼilani oj smakʼla sbʼaj tikʼan tikʼan soka Yabʼal ja Dyosi. Ja yuj, kʼuman tikʼan tikʼan ja Biblia, kaʼax ja bʼa tsomjeliki, kʼulan jawa tsomjel bʼa pamilya sok kʼulan jawa programa bʼa spaklajel atuchʼil ja Biblia. Ajuluka kʼujol, ja wego tʼilani oja kʼuluk spetsanil ja jas waxa kʼulan bʼajtanto bʼa oj ajyan kʼubʼan lek soka Jyoba.

«Ja ixuk winik lek skʼujoli lek wa xwaj yuj, sok ja maʼ lek wa skʼulanyi ja tuki cha lekni oj kʼulajukyi» (Prov. 11:25).

Ta tikʼan wala el ja bʼa xcholjeli, mas oj stsatsankʼujoluka sok oj kʼajyan wego. Ja Kevin, wan aʼtel jastal ansyano, wa xyala: «Ja jasa mas skoltayon ja keʼn soka jcheʼumi jani wego ochtikon precursor auxiliar yajni kʼotikon ja bʼa yajkʼachil kongregasyoni. Wego kʼe jnatikon sbʼaja ja jmoj-aljeltiki, ja precursoriki  soka lugar bʼa wa xcholotikoni». Ja Roger, stukbʼes sbʼaj bʼa pilan lugar bʼa junuk 1,600 kilometro snajtil ja bʼa ajyi kulani. Ja yeʼn wa xyala: «Ja modoʼal bʼa oj kʼajyan bʼa jun yajkʼachil kongregasyon jani elel tikʼan ja bʼa xcholjeli. Cha ojni bʼobʼa kʼapabʼaj bʼa skoltajel ja ansyanoʼiki bʼa chikan jasunuk, jastal skusjel ja Naʼits bʼa Tsomjeli, yajel ekʼ jun loʼil ta mi kʼot ja maʼ xcholi ma skʼapjel abʼaj bʼa ay maʼ oja wiʼ och ja bʼa tsomjeli. Ta yilawe ja jmoj-aljeltik pwesto aya bʼa skʼulajel, mini oj ekʼ tyempo bʼa lek oj iljan».

«Jama ja hua cʼujolexi» (2 Cor. 6:13).

Jelni tʼilan sjejel waxa kʼanawe ja tuk jmoj-aljeltiki. Yajni ja Melissa soka spamilya wajye bʼa pilan kongregasyon, wajni skʼujole bʼa stajel yajkʼachil yamigoʼe. Ja Melissa wa xyala: «Bʼajtanto soka yajni wa xchʼak ja tsomjeliki wala wajtikon ja bʼaye ja tuki. Jachuk wa xyakitikon tyempo bʼa ochel loʼil sok mi kechanukta yaljel janekʼ x-ekʼawuj sok wajkon». Ja jaw cha koltajiye bʼa wego oj snebʼ-e ja bʼiʼilaliki. Chomajkil, sjamawe ja snaje bʼa skʼepjelyile jasunuk ja jmoj-aljeltiki, soka jaw masni tsatsbʼi ja jastal lek wa xyila sbʼajeʼi. Ja Melissa wa xcha yala: «Kaʼa jbʼajtikon ja número bʼa telepono. Jachuk wa xbʼobʼ staʼotikone kʼumal bʼa wa slokowotikone ja bʼa kongregasyon ma bʼa skʼulajel tuk jasunuk».

Ta wokol waxa wabʼ oj kʼe anaʼ sbʼaja tuki, kʼeʼansok skʼulajel jastik junuk bʼa chʼin. Jun sjejel, oj bʼobʼ tseʼtsunan, anima ja bʼajtani mi xyawi gana. Ta tseʼtsuniya, oj kʼanxuk yuja tuk bʼa oj mojxuke amok. Pes ja Biblia wa xyala «ja satalik wa xlijpi wani xya gustoʼaxuk ja kʼujolali» (Prov. 15:30). Ja Rachel, ja yeʼn yaʼakan ja bʼa kʼiʼi sok waj bʼa jun lugar najat, wa xyala: «Ja keʼn mi jel wala kʼumaniyon. Sok ayni ekʼele tʼilan oj jtʼen jbʼaj jtuchʼil bʼa oj jkʼumuk ja jmoj-aljeltik ja bʼa kongregasyon bʼayon ja wego. Ja jasa wa xkʼulani jani wa xleʼa ja maʼ kulan ekʼi sok bʼa mi maʼ wan loʼilsok. Bʼobʼta ja yeʼn mi jel xcha kʼumani jastal keʼn». ¿Jas mi xwaja kʼujol bʼa stajel loʼil tuktukil jmoj-aljeltik ja bʼajtanto oj kʼeʼuk soka xchʼak ja tsomjeliki?

Chomajkil, ja bʼajtan semanaʼiki bʼobʼta jel gusto aya bʼa snajel sbʼaja tuki. Pe tsaʼan bʼobʼta oj chʼayukawuj takal takal ja gustoʼil jaw. Ta jach x-ekʼabʼaj, tʼilani oja kʼujoluk bʼa slejel awamigoʼik.

Jujuntik ja yal ibʼe teʼ wa xjeltesji slugari, ayni mas wa xyiʼaj tyempo bʼa oj yi yech yuja tuki. Jastalni ja jaw, mini spetsaniluk wegoxta wa xchʼak kʼajyuke yajni wa xwajye bʼa pilan kongregasyon. Ja rasonik bʼa Biblia ti nochani oj skoltaya ta jitsanxa tyempo atukbʼesnej jawa kongregasyoni sok waxa wabʼ mito kʼajyeluka.

«Jayuj sbej tola vida [...] oj cʼultic ja ba lequi. Mi sbejuc oj el jganatic porque oj jac ja cʼacʼu cuando oj cʼultic recibir ja jmajtantiqui» (Gál. 6:9).

Ta mi kʼajyiya wego jastal waxa majlay ajyi, pila mas tyempo. Jun sjejel, jitsan misioneroʼik bʼa wajele ja bʼa Eskwela bʼa Galaad wa jekjiye bʼa pilan país. Sok ja yeʼnle wa xkanye jitsan jabʼilik ja bʼa wa xjekjiye bʼa tito oj kumxuke yulatajel ja slujmaleʼi. Ja jaw wa xkoltajiye bʼa oj yamigoʼuke ja jmoj-aljeltiki sok bʼa oj kʼajyuke soka yajkʼachil kostumbre.

Ja Alejandro jitsanxa ekʼele stukbʼesnej sbʼaj sok wa snaʼa mini xbʼobʼ ya lijero axuk ja bʼa oj kʼajyuki. Ja yeʼn wa xyala: «Ja bʼa tsaʼanxta jtukbʼes jbʼajtikoni, ja jcheʼumi yala: ‹¡Spetsanil ja kamigoʼiki teye bʼa pilan kongregasyon!›». Anto ja yeʼn ya julyi skʼujol ja chabʼ jabʼil bʼajtanto, yajni stukbʼes sbʼaje kongregasyoni, jachni cha yala ja junxta yaljel  jaw. Pe snajtil ja chabʼ jabʼil jaw ja xcheʼumi sjeʼa wa xchamskʼujol ja tuki, soka matik mi snaʼa sbʼaj ajyi kʼotni yamigoʼuk lek.

«Moka wal, «¿Jas yuj ja kʼakʼujik ekʼeli masni lek yuj ja it?» Yujni mi sok biboʼil waxa jobʼo ja it» (Ecl. 7:10).

Leʼa modo moka wa slaj sbʼaj soka wa kongregasyon bʼajtanto. Bʼobʼta ja bʼa yajkʼachil kongregasyon bʼaya mas mi jel xkʼumaniye, ma mas tojxta ja jas wa xyalaweʼi. Chikani jastal, ja xwaja kʼujol ja lekil modoʼalik yiʼojeʼi, jastalni waxa kʼana akʼulajukawi ja weʼn. Jujuntik ja matik stukbʼesnej sbʼaje pilan kongregasyon wa xkʼot snaʼe tʼilan oj sjobʼ sbʼaje ja it: «¿Meran maʼ wa xyajtay ‹spetzanil ja [...] quermanotiqui›?» (1 Ped. 2:17).

«Mi lom xa huaahuex can ja scʼanjel [...]. Tʼilan oj aajuc ahuilex» (Luc. 11:9).

Moka wakan skʼanjelyi ja Jyoba. Jun ansyano sbʼiʼil David wa xyala: «Moka leʼ modo skʼulajel atuchʼil». Cha yala: «Ayni jitsan jasunuk bʼa kechanta wa xbʼobʼ jkʼuluktik soka skoltanel ja Jyoba. Ja yuj ayi orasyon sbʼaja jaw». Ja Rachel, jtaʼatikta tiʼali, jachni wa xcha yala: «Ta kilatikon soka jtatami mi jel chʼikanukotikon ja bʼa kongregasyoni, wa xkatikonyi orasyon ja Jyoba sbʼaja jaw sok wa xkʼanatikonyi pabor aya kiltikon ta ay jas wanotikon skʼulajel bʼa wa xya jitsuk ja jmoj-aljeltiki. Anto, wa xkʼujolantikon bʼa yajel ekʼ mas tyempo soka yeʼnle».

Nantatalik, ta ja wuntikilexi wane yijel wokol bʼa oj xchʼik sbʼaje ja bʼa kongregasyoni, pilawik tyempo bʼa yajelyi orasyon sbʼaja jaw. Chapa bʼa ayawe ekʼ tyempo sok lekil smoje bʼa jachuk oja koltaye bʼa oj staʼ yajkʼachil yamigoʼe.

¿Jas oj bʼobʼa kʼulukyi ja weʼn ja matik ajkʼachto julele ja bʼa wa kongregasyoni? Man sbʼajtanil, kʼujolan bʼa oj kʼotan jun lekil yamigoʼe. ¿Jas waxa kʼana akʼulajukawi ja weʼn ta wanto atukbʼes jawa kongregasyoni? Ja jastik junuk jaw cha kʼulanyile ja yeʼnleʼi (Mat. 7:12). ¿Oj maʼ bʼobʼa lok-e ja bʼa wa tsomjel bʼa pamilya ma yiljel ja JW Broadcasting wa x-el ixaw ixaw? ¿Jas mixa chapa bʼa oj elan soke xcholjel? Sok ta alokowe waʼel, jelni oj julskʼujole ja jaw. ¿Wan maʼ xjula kʼujol bʼa tuk modoʼik oj bʼobʼa koltaye?

Ja Carlos wa xcholo: «Yajni kʼotikon ja bʼa pilan kongregasyoni, jun jmoj-aljeltik ixuk ya ekitikon jun lista ja bʼa tiendaʼik bʼa mi jel chaʼanuk stsʼakol ja jastik junuki. Ja jaw jelni makuni». Bʼobʼta ja matik wa xjakye bʼa lugarik bʼa tuk ja clima, ojni yaʼe tsʼakatal ta ajeʼayile jastal skʼutesel sbʼaje ja bʼa kʼixin kʼinal, bʼa cheʼil kʼinal ma bʼa jel xyaʼa jaʼ. Ta acholo yabʼ tʼusan sbʼaja lugari ma ja skʼuʼajel yiʼoje ja relijyonik ja bʼa lugar tiw, ojni bʼobʼa koltaye bʼa mas lek awajyujile ja bʼa xcholjeli.

Ja Allen, jtaʼatikta tiʼal bʼajtani, ayxa mas ja jun jabʼil tey ja bʼa yajkʼachil kongregasyoni, sok ja wego wa xyala: «Ja bʼajtani tʼilani jtʼena jbʼaj bʼa oj jnaʼ sbʼaja jmoj-aljeltiki. Pe ja wego wa xkabʼ kʼotelexa jastal jpamilya, sok jel gusto ayon». Ja Allen wa xyila ja stukbʼes sbʼaj pilan kongregasyoni mini chʼay ja yamigoʼiki. Ja smeranili, staʼa mas yamigoʼik, sok ojni maʼ yamigoʼuk sbʼaje bʼa tolabida.