JA BʼA najate, ja mayordomo yeʼn wa x-ajyi bʼa skʼabʼ ja naʼitsi ma ja jastik sbʼaj pilan kristyano.

Ja José, jun yunin ja awel Jacob, ja yajni ti ajyi mosoʼil bʼa Egipto, ja yeʼn aji och mayordomo ja bʼa snaj ja yajwali. Ja winik it bʼa Egipto ‹yaʼakan yeʼn oj stalnay ja José spetsanil ja jas yiʼoji› (Gén. 39:2-6). Mas tsaʼan, yajni ja José kʼot june maʼ jel chaʼan xchol ja bʼa Egipto, cha ajyiyuj jun smayordomo bʼa oj talnajukyi ja snaji (Gén. 44:4).

Ja bʼa styempo ja Jesús, ja matik jel sluʼume tini wa x-ajyiye kulan bʼa chonabʼ, bʼa mini mojan wa xkan yujile ja bʼay ja sluʼume. Ja yuj wa stʼojowe mayordomo bʼa oj skʼel-e ja yaʼtele wa skʼulane kada kʼakʼu ja aʼtijumiki.

¿Jasa tʼilan oj skʼuluk ja mayordomo? Ja Columela, jun tsʼijbʼuman bʼa Roma ja bʼa bʼajtan siglo, yala ja maʼ wa xtʼoji talnanum ma mayordomo tʼilani june maʼ wanxa snaʼa. Tʼilan oj sjeʼ ‹lekil modoʼal bʼa jachuk mi oj jelxuk sok cha mi jel kʼakʼuk›. Ja Columela cha yala: «Ja modoʼal mas tʼilan wa xkʼanxi ja bʼa talnanumi jani mok skʼuʼuk wa xchʼak snaʼ, sok tolabida a-skʼujoluk snebʼjel ja jas mi snaʼa».

Ja Yabʼal ja Dyos wa xyaʼ makunuk ja mayordomo bʼa xcholjel jujuntik ja aʼtelik wa xkʼulaxi ja bʼa kongregasyonik. Jun sjejel, ja jekabʼanum Pedro snika skʼujol ja snochumanik ja Kristo ayawe makunuk ja biboʼil akʼubʼalyile bʼa ‹oj skoltay sbʼaje ja janekʼ wa xbʼobʼ yujile› yuja syajal skʼujol ja Dyos (1 Ped. 4:10).

Ja Jesús ya makunuk ja sjejel bʼa jun mayordomo ja yajni xcholo ja loʼil wa xtax ja bʼa Lucas 16:1-8. Chomajkil, ja jas tsʼijbʼunubʼal bʼa oj naxuk wanxa yajel Mandar ja Jesús, skʼapayi ja snebʼumanik oj stʼoj «ja moso mas jel toj ayi ja it ma‘ wa stalna sbʼaj leki» ma ja «mayordomo» toji. Ja yaʼtel mas tʼilan ja mayordomo jaw jani yajel yile ja yaʼtijum Dyos ja jastik wa xmakuniyujile ja bʼa tsaʼanikxta kʼakʼu (Mat. 24:45-47; Luc. 12:42, Ja yajkʼachil sju‘unil ja dyosi). Jelni maʼ wa xkaʼatikyi tsʼakatal ja tojil mayordomo yuja juʼunik wa xyaʼawekitik sok ja wa spilawe bʼa sutanal ja luʼum bʼa yajel tsatsbʼuk ja skʼuʼajel kiʼojtik.