JASTALNI wa xyala ja Ley bʼa Moisés, ay ekʼele lekni stajel tiʼal ja Dyos [jurar] yajni ay jas wa xkʼapxi. Pe ja bʼa styempo ja Jesús, jitsan judíoʼik ayxa yiʼoje ja kostumbre bʼa stajel tiʼal ja Dyos bʼa yajel staʼ yip tʼusan mi spetsaniluk ja jasa wa xyalawe. Jachuk wa xkʼan sjeʼe spetsanil ja jasa wa xyalaweʼi naka smeranil. Ja Jesús yala bʼa chabʼ ekʼele mini lekuk ja kostumbre it mi xmakuni: «Alawik lek ja‘ yajni leki. alawik miyuk ja‘ yajni miyuki» (Mat. 5:33-37, Ja yajkʼachil sju‘unil ja dyosi; Mateo 23:16-22).

Jun diccionario bʼa Biblia wa sjeʼa jujuntik teksto ja bʼa Talmud bʼa wa xbʼobʼ ilxuk ja judíoʼiki jelni tikʼan wa staʼawe tiʼ ja Dyos bʼa yajel staʼ yip spetsanil ja jasa wa xyalawe. Ja Talmud wa xcholo tsʼikan lek ja skʼapjelalik bʼa tʼilan oj axuk kʼot smeranili soka skʼapjelalik bʼa wa xbʼobʼ kʼutsxuki.

Ja Jesús mini kechanukta yeʼn yala bʼa mini lekuk ja kostumbre jaw. Jun sjejel, jun choluman sbʼaja jas ekʼtajani, ja winik judío sbʼiʼil Flavio Josefo yala ja it sbʼa jun kʼole relijyon judío: «Wa sleʼawe modo mi oj staʼe tiʼal ja Dyos ja bʼa jas wa skʼapawe, pes wa skʼuʼane ja jaw mastoni jel tuk yuja slejel abʼali. Ja yeʼn wa xyabʼye ta jun ixuk winik tʼilan oj staʼ tiʼal ja Dyos bʼa jachuk oj skʼuʼuk ja tuki, anto ja ixuk winik jaw juni leʼa abʼal». Jun libro judío wa xnaxi sbʼaj jastal ja Sabiduría de Jesús Ben Sirá wa xcha yala junxtatik jastal jaw: «Ja winik maʼ jel staʼa tiʼal ja Dyosi [jurar], wa xbʼutʼ-el bʼa jastik mi lekuk». Ja yuj, ja Jesús yala ja jasa mi lekuki jani ja junxa kostumbre yiʼoje bʼa wegoxta stajel tiʼal ja Dyos. Ta tolabida wa xkalatik ja smeranili, mini ay stʼilanil stajel tiʼal ja Dyos bʼa jachuk a-skʼuʼuk ja tuk ja jasa wa xkalatiki.