JA SPAMILYA ja John ti ajyi kulan bʼa jun yal chʼin chonabʼ ja bʼa Gujarat (India). Bʼa xchʼakulabʼil ja jabʼilik 1950, ja stati yiʼaj jaʼ jastal taʼumantiʼ bʼa Jyoba. Pe ja John, ja snani soka joʼe smoj-alijelik ixuk sok winik katolikoʼe sok kontra wa xyilawe ja srelijyon ja stateʼi.

Bʼa jun kʼakʼu, ja John aljiyabʼ yuja ja stati ayiʼochyi jun sobre jun yamigo ja bʼa kongregasyon. Ja bʼa saʼan sakbʼel jaw, ja John syajbʼes jun syal kʼabʼ ja yajni sjama jun tambo bʼa lata. Anima jachuk, yuja skʼana oj skʼuʼukyi ja stati spotso sok jun kʼuʼuts ja syal kʼabʼi sok waj man bʼa snaj ja yamigo ja stati.

Yajni kʼot ja tiwi, yeʼn yiʼajkan ja sobre ja cheʼumali, ja yeʼn cha taʼumantiʼ bʼa Jyoba. Yajni ja jmoj-aljeltiki yila ja syal kʼabʼ ja John ja bʼa yajbʼeli, yala oj skoltay. Ya eljan ja yeʼtal bʼa wa snolo aʼaniki, yayi yajnal bʼa sakʼjelyi ja syajbʼeli sok spotsokanyi. Tsaʼan stojbʼesyi jun baso té. Soka janekʼ tyempo ti ajyi tiwi xcholoyabʼ tsamalxta sbʼaja Biblia.

Ja ilkʼujolanel yiʼoj ajyi ja John sbʼaja Taʼumantiʼiki och chʼayuk. Ja yuj, spensaraʼan oj yayi jujuntik sjobʼjel ja jmoj-aljeltiki. Ja yeʼn wa skʼuʼan ajyi ja Jesús yeʼn Dyos sok tʼilan yajelyi orasyon ja María, pe ja stati mini jach wa spensaran. Ja jmoj-aljeltik, bʼa snebʼunej ja kʼumal gujarati, sjamayi ja Biblia sok xcholoyabʼ bʼa skʼumal ja John ja jasa wa sjeʼa ja Biblia sbʼaja chabʼ jasunuk jaw. Tsaʼan, yayi ja poyeto «Estas buenas nuevas del reino».

Yajni skʼuman ja poyeto, ja John ti kʼot snaʼ ja jaw jani ja smeranili. Waj skʼel ja pagre bʼa yiglesya sok ti yayi ja junxta sjobʼjelik yayi ja jmoj-aljeltiki. Pe ja pagre jel tajki, sjipa sbʼajyi jun Biblia sok ti yawan: «¡Yuj maʼ paxyata Satanás ja weʼn! ¿Bʼa wa xyala ja Biblia mi Dyosuk ja Jesús? ¿Bʼa wa xyala mi oj katikyi orasyon ja María? ¿¡Bʼaʼa!?». Ja John mini tʼun ekʼ bʼa spensar ta jach oj sjakʼ ja pagre, sok yala yabʼ: «Mixani jun ekʼele oj ochkon bʼa jun iglesya katoliko». Sok jachni kʼota.

Ja John kʼe yi jun estudio bʼa Biblia soka Taʼumantiʼiki, och ja bʼa smeranili sok kʼe yaʼteltay ja Jyoba. Sok jitsan ja bʼa spamilya cha jachni skʼulane. Ja John tito yiʼoj ja senya ja bʼa yal skʼabʼ wa xtax bʼa stojolil skʼabʼi. Sok yajni wa xyila, wa xjulskʼujol ja lekil kʼujolal jejiyi bʼa ekʼelxa 60 jabʼil bʼa iji och stajel ja smeranili (2 Cor. 6:4, 6).