BʼA SPETSANIL ja luʼumi, ja ansyanoʼik jelni chaʼanyabʼal wa xyilawe ja aʼtel wa skʼulane ja bʼa xchonabʼil ja Dyosi. Sok jpetsaniltik wa xya gustoʼaxukotik yuja pwesto aye bʼa koltanel. Pe mito jel axa kʼakʼu, ja ansyanoʼik bʼa awelexa kʼanji yile ayawe ekʼyi ja ansyanoʼik bʼa mito ay lek skʼujole jujuntik ja cholalik bʼa mas chaʼanyabʼalil yiʼoje.

Man kʼulaxi ja it, ja biajanteʼik soka jeʼumanik ja bʼa eskwelaʼik bʼa Biblia wani xyaʼawekan ja xchol yiʼoje yajni wa staʼawe ja 70 jabʼili. Chomajkil, ja ansyanoʼik bʼa ayxa yiʼoje 80 jabʼil wa xyaʼawekanyi ja ansyanoʼik bʼa mito ay skʼujoleʼi cholalik jastal ja maʼ wa xkoltani skʼeljel ja yaʼtel ja Olomalik bʼa Naʼits Betel ma ja ansyanoʼik wa xkoltani skʼeljel ja yaʼtel ja kʼole ansyanoʼik. ¿Jastal yiluneje ja jmoj-aljeltik ja jastik junuk it? Tojni ajyele soka Jyoba soka xchonabʼili.

Ja Ken, bʼa skʼela ja yaʼtel ja Olomalik bʼa Naʼits Betel tʼusan mi 49 jabʼil, wa xjul skʼujol: «Yajni kabʼ ja jasa chapxi, ochyoni akwerdo. Chomajkil, ja bʼa saʼan sakbʼel jaw kalani yabʼ ja Jyoba bʼa orasyon wani xkʼanatikon june  bʼa mito ay lek skʼujol bʼa oj skʼel ja yaʼtel Olomalik bʼa Naʼits Betel». Jitsan jmoj-aljeltik bʼa awelexa bʼa yibʼanal ja luʼumi jachni wa spensaraʼane jastal Ken. Spetsanil ja ansyanoʼik it bʼa toj ajyele wani skʼulane gusto skoltajel ja smoj-aljeliki, sok ja yuj jujuntik yajni yabʼye ja it ochni tʼun stristeʼile.

Ja Esperandio, jun ansyano maʼ wa xkoltani skʼeljel ajyi ja yaʼtel ja kʼole ansyanoʼik ja bʼa skongregasyon, wa xyala tristeni yabʼi. Pe cha wani xyala jelxa xwokolani yuja sjabʼili sok wani skʼana oj ajyukyuj tyempo bʼa stalnajel ja sakʼanili. Pe anima, wantoni yaʼteltajel ja Jyoba toj lek sok juni lekilal sbʼaja smoj-aljeliki.

¿Jaxa jmoj-aljeltik bʼa jitsanxa jabʼil ajyele biajante sok yaʼawekan ja cholal jaw? Ja Allan, bʼa ajyi 38 jabʼil, wa xyala: «Ja yajni kabʼi mi xnaʼa jas oj jkʼuluk». Pe wani snaʼa ja xchapjel ja matik mito ay lek skʼujole wani xyiʼajan jitsan slekilal, sok mini yaʼunejukan yaʼteltajel ja Jyoba toj lek.

Ja Russell wajni jun biajante sok jeʼuman ja bʼa eskwelaʼik bʼa Biblia 40 jabʼil. Wa xcholo ja yeʼn soka xcheʼumi ochni stristeʼile ja yajni yabʼi. Wa xyala: «Jelni chaʼanyabʼalil wa xkilatikon ja cholal akʼubʼal kitikon sok wa xkabʼtikon ayto kiptikon bʼa mi oj katikonkan». Ja wego, xchawanile wane yajel makunuk ja snajel yiʼoje soka jasa snebʼuneje bʼa koltanel ja bʼa kongregasyon teyeʼi, sok ja jmoj-aljeltik jelni gustoʼaye yuja teye soki.

Bʼobʼta ja keʼntik mini bʼa kabʼunejtik jastal ja jmoj-aljeltik it. Anima, spaklajel ja loʼil wa xtaʼatik ja bʼa 2 Samuel ojni skoltayotik yabʼjel stojol.

La katik jul jkʼujoltik yajni ja Absalón yila kontra ja stati, ja mandaranum David. Ja David el ja bʼa Jerusalén sok spaka ajnel man Mahanaim, ja este ja bʼa yok jaʼ Jordán. Ja tiw, ja David soka swiniki tʼilani wa skʼana jastik junuk bʼa oj ajyuke sakʼan. ¿Jasa ekʼi?

Oxe winik ja bʼa lugar jaw sjama ja skʼabʼeʼi sok iji och yile chʼat, swaʼele sok jastik junuk bʼa oj makunuk yujile. June bʼa yeʼnle jaʼa Barzilai (2 Sam. 17:27-29). Yajni wanxa lamxel ja jasa skʼulan ja Absalón, ja David bʼobʼni kumxuk ja bʼa Jerusalén, sok jaxa Barzilai waj yakan man bʼa Jordán. Ja David skʼanayi ja Barzilai awajuksok man Jerusalén sok alji yabʼ mini oj skʼul palta ja swaʼeli, anima ja Barzilai mini wa xmakuniyuj pes yujni jun winik jel riko (2 Sam. 19:31-33). Bʼobʼta ja David chaʼanyabʼalil yila yuja lekil modoʼalik yiʼoji sok yuja rasonik oj bʼobʼ aljuk yabʼ yuja snajel yiʼojxa ja bʼa sakʼanili. Bʼa Barzilai, juni niwan cholal oj ajyuk sok ja oj aʼtijuk ja bʼa snaj ja mandaranumi.

Pe ja Barzilai wa snaʼa janekʼ wa xlajxiyuj sok ja stikʼanil yiʼoji, sok yala yabʼ ja David yuja 80 jabʼilxa yiʼoji mixani xbʼobʼ «snaʼ ja stukil ja bʼa lek soka bʼa mi lekuki». ¿Jasa kʼan yal? Jelxani maʼ bibo ja yeʼn yuja janekʼxa  jabʼil yiʼoji. Sok ojtoni bʼobʼ ya lekil rasonik, jastalni ajiyi rasonik mas tsaʼan ja mandaranum Rehoboam yuja ‹ansyanoʼik› (1 Rey. 12:6, 7; Sal. 92:12-14; Prov. 16:31). Ja yuj, bʼobʼta ja Barzilai jani kʼan yal sbʼaja jastik mixa xbʼobʼyuj skʼulajel yuja awelxa. Sok cha snaʼani yuja awelxa mixani xyabʼ lek kʼinal sok yabʼjel yajbʼal (Ecl. 12:4, 5). Ja yuj yala yabʼ ja David a-yiʼoch bʼa Jerusalén ja kerem Kimham, bʼa bʼobʼta jani ja skeremi (2 Sam. 19:35-40).

Ja jasa tukbʼi sbʼaja jmoj-aljeltik bʼa awelexa jtaʼatik tiʼal ja bʼa skʼeʼulabʼil ja artikulo, ojni slajtik ja jasa skʼulan ja Barzilai. Lekni oj jnatik ja yaʼtijum Dyos it tʼilani spensaraʼan ja jastal wa xtaxi soka sjabʼil yiʼoji jun ixuk winik. Pe ja bʼa jtyempotiki jelni tʼilan spensarajel ja jasa mas lek sbʼaja ansyanoʼik toj aye bʼa spetsanil ja luʼumi.

Ja ansyanoʼik it bʼa awelexa wa snaʼawe ja janekʼ wa xlajxiyujile sok wegoxta yiluneje ja slekilal sbʼaja jasa tukbʼesxi. Ta yaʼawekanyi ja matik mito ay lek skʼujole ja cholalik yiʼoje ajyi, ojni stalnaye ja xchonabʼil ja Dyos ja jastal wan jitsanbʼeli. Bʼa jitsan ekʼele, ja jmoj-aljeltik bʼa awelexa xchapuneje ja matik mito ay lek skʼujole, jastalni maʼ skʼulan ja Barzilai soka skeremi ma jastalni skʼulan ja Pablo soka Timoteo (1 Cor. 4:17; Filip. 2:20-22). Ja jmoj-aljeltik bʼa mito ay lek skʼujole sjeʼuneje kʼotele ‹majtanalik jach winike› sok wani xbʼobʼ koltanuke bʼa «tzatz oj ajyucotic ja ba sti sat ja Diosi» (Efes. 4:8-12; kʼela ja Números 11:16, 17, 29).

Bʼa spetsanil ja luʼumi, jitsan jmoj-aljeltik bʼa yaʼuneje ekʼukʼyi ja tuk jujuntik cholalik yiʼoje ajyi, yaʼuneje makunuk bʼa yaʼteltajel mas ja Jyoba.

Ja Marco bʼa wajni 19 jabʼil biajante wa xyala: «Ja jastal wala taxyon ja wego wani xbʼobʼ jkoltay ja statame ja jmoj-aljeltik ja bʼa kongregasyon bʼa mi Taʼumantiʼuke».

Ja Geraldo, aʼtiji 28 jabʼil bʼa biajante, wa xyala: «Ja keʼn soka jcheʼumi kaʼunejtikon yajkʼachil jkʼelsatikon, june ja bʼa jaw jani skoltajel ja matik chebʼeleʼi sok bʼa yajel mas estudioʼik bʼa Biblia». Ja yeʼn wa xyala ja wego wan yajel 15 estudioʼik bʼa Biblia sok jitsan ja matik chebʼeleʼi wanexa wajel ja bʼa tsomjeli.

Ja Allan, jtaʼatik tiʼal ja bʼa skʼeʼulabʼil ja artikulo, wa xcholo: «Ja wego jaxani mas wa xbʼobʼ waj jkʼujoltikon ja bʼa xcholjeli. Jel xkʼulantikon gusto xcholjel ja bʼa ay jitsan ixuk winik, ja bʼa negosyoʼik sok ja bʼa jbesinotikoni. Chabʼ jbesinotikon wajelexa jmoktikon ja bʼa Naʼits bʼa Tsomjeli».

¿Kʼotela maʼ june ja bʼa jmoj-aljeltik bʼa toj aye sok bʼa ayiʼoje snajel bʼa ajkʼachto yiʼaje pilan cholal? Ta jachkʼa, jun modo bʼa oj aʼtijanan soka Jyoba jani yaljel yabʼ ja matik mito ay lek skʼujole ja jasa nebʼuneji. Ja Russell, jtaʼatik tiʼal bʼajtanto, wa xyala: «Ja Jyoba wan sjejel sok wan yajel makunuk keremtik bʼa jel snaʼawe sok bʼa ojni bʼobʼyujile. Ja jmoj-aljeltiki wani xyawe el slekilal sbʼaja kongana wa sjeʼawe soka wa stalnaye ja yal chejiki» (kʼela ja rekwagro « Koltay ja matik mito ay skʼujol bʼa oj skʼuluke mas ja janekʼ wa xbʼobʼyujile»).

Ta ajkʼachto tukbʼesji jawa choli, mok eluka gana. Ja aʼtel akʼulan sok spetsanil jawa kʼujoli skoltunej jitsan ixuk winik, sok ojtoni bʼobʼa noch skʼulajel. Ja weʼn jelni wala yajtaji sok ojtoni yajtajanan.

Pe jun jasunuk mas tʼilan, jani ja weʼn awaʼunejkan jastal jun senya ja bʼa skʼujol ja Jyoba. Ja yeʼn skʼapunej «mi ni oj chʼay scʼujol ja jas huanex scʼulajeli, ja jastal huaxa coltayex ja quermanotiqui yuj ja syajal ja hua cʼujolexi y jach huanex man ora» (Heb. 6:10). Ja yaljelik it jakel bʼa Dyos wa xya jnatik ja yeʼn  mi kechanuk wa xjul skʼujol ja jasa jkʼulantik ja bʼa tyempo ekʼtaʼi. Yuja jel chaʼanyabʼal xyilawa ja Jyoba, mini xchʼay skʼujol ja jas akʼuluneji soka jas wanato skʼulajel bʼa jach oja wa gustoʼaxuk.

¿Jaxa ta mi tukbʼeluk ja jcholtik ja keʼntik? Anima, ja it wani xcha bʼobʼ kʼot jbʼajtik ja keʼntiki. ¿Jas yuj?

Pes yujni ja wego bʼobʼta oj jmojtaytik ja jmoj-aljeltik bʼa awelexa bʼa tukbʼesnubʼal ja xchole. Ta jachkʼa wani xbʼobʼ katik el slekilal sbʼaja jastal takʼane sok sbʼaja snajel yiʼojeʼi. La jkʼantik yile rasonik sok jastik oj jkʼuluktik. Chomajkil, la kiltik jastal wa xya makunuk ja snajel yiʼoj ja bʼa cholal yiʼojxa ja wego.

Ta awelotikxa bʼa tukbʼesjita ja jcholtiki ma keʼntik oj katik el slekilal ja snajel yiʼoje, la ka jul jkʼujoltik ja Jyoba jelni chaʼanyabʼal wa xyila ja matik wane yaʼteltajel bʼa jitsanxa tyempo sok bʼa mitoni xyaʼawekan.