JA BʼA TSAʼANIKXTA JABʼILIKI JELNI PAKLUBʼAL SBʼAJA MATIK AYE BʼA SYAJAL. Jastalni kilatikta, ja modoʼik bʼa koltanel wa xyaʼawe ja matik jel chapani, jitsan ekʼeleʼik tini elel ja bʼa sbiboʼil yiʼoj ja Biblia. Ja it wa sjeʼa ke ja srasonik yiʼoji jelni xmakuni. Pe ja bʼa Biblia mini kechan wa xtaʼatik tojelalik bʼa wa xya jipjkʼujoltik. Cha wani xyaʼakitik snajel bʼa mini xtax bʼa pilan lugar sok wa xyaʼa kulan kʼujolal sbʼaja matik aye bʼa syajal.

• Ja snajel ke ja matik chamelkujtik ja bʼa jpamilyatik mini wanuke yijel wokol.

  Ja Biblia wa xyala ja bʼa Eclesiastés 9:5 ke ja matik chameli, «mixato jas snaʼawe». Tixani tikʼan wa xchʼay ja spensareʼi (Salmo 146:4). Ja yuj, ja Biblia wa slaj ja maʼ chamelxa jastal ochel lek jwayeltik (Juan 11:11).

• Wa xyaʼa kulan kʼujolal ja ajyelkujtik skʼuʼajel bʼa jun Dyos wa syajtayotik.

  Ja Biblia wa xyala: «Ja sat ja Jyoba a tey sbʼaja matik toji, sok ja xchikini wa xyabʼ ja matik wan skʼanjel skoltajeli» (Salmo 34:15). Yaljelyabʼ bʼa orasyon ja Dyos ja jastal wa xkabʼ ayotiki, jachni jastal jun terapia bʼa jachuk wa xbʼobʼ jpensaraʼuktik lek. Pes wani skoltayotik bʼa lek oj kil jbʼajtiksok ja jKʼulumantiki, bʼa oj ya makunuk ja yip bʼa yajel kulan jkʼujoltik.

• Ja kʼapjelal bʼa jun tyempo maxa lek.

  Ja Biblia wa staʼa tiʼal jitsan ekʼele ke ja matik chameli oj sakʼwukejani. Jun sjejel, yajni wa xyala jastal oj ajyuk ja sakʼanil ja bʼa Luʼum ja bʼa tyempo jakumi, wani xyala ja Dyos «oj skusyi ja yalel sateʼi, [spetsanil ja kristyano] sok mixani oj ajyuk chamelal, mixani tristeʼil, mini mebʼa okʼel sok mini syajal» (Apocalipsis 21:3, 4). ¿Wan maʼ x-ekʼ bʼa wa pensar ja it?

Stsʼakatal yuja smajlajel bʼa oj cha yil-e yajkʼachil ekʼele ja matik chamel yujile, jitsan kristyano wa skʼuʼane ja Jyoba, ja maʼ yaʼunej ja Biblia masni ay yip bʼa wa xkoltani kuchelkujtik ja syajali. Jun sjejel, ja Ann cham ja statami bʼa ayxa 65 jabʼil nupanele, wa xcholo: «Ja Biblia wa xya ajyukon seguro ke ja matik chamelkujtiki mi wanuke yijel wokol sok ja Dyos ojni ya sakʼwuk ja matik tey bʼa pensar. Tolabida wa xpensaran ja it yajni wa xjul jkʼujol ja jtatami sok jachuk wa xkuchkuj ja jas ekʼel ja bʼa jsakʼanili».

Ja Tina bʼa jtaʼatikta tiʼal ja bʼajtani, wa xyala: «Man ja kʼakʼu cham ja Timo, kilunej ja skoltanel ja Dyosi. Kabʼunej ja skoltanel ja yip ja skʼabʼ ja Jyoba, yajni wanon wokolaneli. Ja kʼapjelal wa xyaʼa ja Biblia sbʼaja sakʼwelal, merani lek bʼa keʼna sok wa xyaki kip bʼa oj nochyi man skʼakʼujil oj kil ja Timo».

Ja yaljelik it wani xchiktes lek ja jastal wa xyabʼ aye miyonik kristyano bʼa wa sjipa skʼujole ja Biblia. Ta ja weʼn waxa pensaran ke ja jas xyala ja Biblia kechan jun wayichal, ¿jas yuj mixa paklay ja prebaʼik yiʼoji sok ja jas wa skʼapa bʼa oj kʼot smeranil? Ojni awil ke Biblia jani ja koltanel mas lek sbʼaja matik chamel jun spamilyaʼe.

Ja bʼa jsitiotikon bʼa Internet, jw.org, oja taʼ bideoʼik sbʼaja tema it.

 ¿JASTAL MAʼ WA XTAXYE JA MATIK CHAMELEʼI?

¿WAN MAʼ XA KʼANA SMAKLAJEL LEKIL YALJELIK?