«Ja Sofía a soka keʼn ekʼ mas ja 39 jabʼil nupanelotikon yajni ja yeʼn cham yuj jun chamel jel albʼi. Ja kamigoʼik jelni skoltayone sok latsani ajyiyon. Pe juni jabʼil kabʼ jun syajal mi xbʼobʼ kuchkuj. Ja jastal wa xkabʼ ayoni tikʼanxtani wa xtukbʼi; wa xkabʼ mini xbʼobʼ jkome. Man wego ama ekʼta oxe jabʼil chamel, ay ekʼele wanto xkabʼ jun syajal bʼa mi xbʼobʼ jkome» (Kostas).

¿Ay maʼ bʼa chamel juna pamilya ja weʼn? Ta jachuk, bʼobʼta ayni bʼa awabʼunej jastal ja Kostas. Ayni jastik bʼa jel xyijan estrés sok syajal, jastal ja xchamelal juna nup, juna pamilya ma juna wamigo. Ja matik jel chapane wa spaklaye sbʼaja jas wa xyijan ja syajali cha akuerdoni aye sbʼaja it. Jun artikulo el ja bʼa rebista The American Journal of Psychiatry wa xyala ke «yajni ay maʼ wa xchami, jitsan kristyano wani xyabʼye ay maʼ chʼayelyujile bʼa tolabida sok jelni x-ijijanyile syajal juntiro». Yajni ay maʼ wan yabʼjel ja syajal wa xyijan yuj chamel jun spamilyaʼe, bʼobʼta oj sjobʼ sbʼaj: «¿Janekʼto tyempo oj kabʼ jach ayon? ¿Ojto maʼ ajyukon gusto? ¿Jastal oj bʼobʼ jtaʼ jkoltajel?».

Ja número it bʼa ¡Kʼeʼan! wa xyaʼa sjakʼjel ja bʼa sjobʼjelik it. Ja bʼa artikulo jakumi wa staʼa tiʼal ja wokolik bʼa bʼobʼta wan ekʼelabʼaj ja weʼn, ta ajkʼachto chamel juna pamilya. Ja bʼa tuk artikuloʼik oja taʼ tuktukil modoʼik bʼa oj skoltaya kuchelawuj ja syajali.

Jelni xkʼanatikon ke ja rebista it, ayayi kulan skʼujol sok a-skoltay ja matik wane yabʼjel syajal bʼa chamel jun spamilyaʼe.