Ja chapwanel wa xyaʼa ja Biblia wani stukbʼesyi ja sakʼanil ja kristyano. La kiltik jastal skoltay ja Ricardo soka Andrés.

JA RICARDO: Yajni kechanto 15 jabʼil kiʼoj ochyon bʼa jun banda. Yuja jelto keremon, ja kamigoʼiki jelni sjomowone. Pe ja jas wa xkʼana jani oj ajyukon lajune jabʼil ja bʼa preso. Mini ay sbʼej pe ja bʼa jlugari jelni skisawe ja matik ti ajyi bʼa preso. Wani xkʼana oj kʼotkon jastal yeʼnle.

Kiʼaj jun jsakʼanil bʼa koʼel mulal sok ixuk, yabʼjel droga sok jel jgusto makʼwanel. Bʼa jun akwal ti ajyiyon chʼikan bʼa jun tujkʼanel. Wani xkala ta mixa sakʼan oj elkon, pe bʼobʼni jpak ajnel. Masan jaw, kʼe jpensaran lek ja bʼa jsakʼanili sok ja bʼa jas wa xkʼana. Jpensaran oj jtukbʼes jbʼaj, pe ¿jastal oj jbʼobʼ jkʼuluk? ¿Machʼa oj jbʼobʼ skoltayon?

Tʼusan mi yibʼanaluk ja bʼa jpamilya ayni yiʼoje wokolik sok mi gusto ayuke. Pe june ja bʼa jtiyo, ja bʼa spamilyaʼik tukni lek. Wani xnaʼa ke jelni leke sok wani xyawe makunuk ja jas wa jeʼa ja Biblia. Ja yeʼnle yaluneje kabʼ ke ja sbʼiʼil ja Dyos jaʼa Jyoba. Ja yuj, tʼusan tsaʼan ja bʼa tujkʼanel, kayi orasyon ja Jyoba yajel makunuk ja sbʼiʼili sok jkʼanayi a-skoltayon. Bʼa pilan kʼakʼu jun testigo bʼa Jyoba jak skʼojtsin ja jpuerta, mini xbʼobʼ jkʼuʼuk. Kʼe jkʼuluk estudiarsoke ja Biblia.

Pe tixtani jtʼaspun jun niwan wokol, ja kamigoʼiki skʼumayone sok yala oj wajkonsoke. Anima mi pasiluk waji, pe kalani yabʼye miyuk. Puestoni ajyiyon bʼa mi oj kakan snebʼjel bʼa Biblia, jelni gusto ayon yuja jkʼulani. Ja jsakʼanili tukbʼini, ja wego jelni gusto ayon.

Ja keʼn puestoni ajyiyon bʼa oj ajyukon lajune jabʼil ja bʼa preso, bʼa jachuk ja tuk bandaʼik oj skis-one. Ja yuj, jkʼanayi ja Dyosi bʼa ayakan bʼa oj jpil lajune jabʼil ja bʼa jsakʼanil bʼa oj jkoltay tuk kristyanoʼik soka Biblia, jastalni skoltayone ja keʼn. Ja Dyos sjakʼa ja korasyoni pes yujni bʼobʼel jkʼuluk bʼa 17 jabʼil. Sok chomajkil mini bʼa ajyiyon ja bʼa preso.

Jitsan ja kamigoʼik ajyi mitoni x-elye ja bʼa preso sok tuk chamyeta. Jelni xkayi tsʼakatal ja jpamilyaʼik Testigo bʼa tukni lek kʼotye sok puesto ajyiye bʼa yiʼaj ja sakʼanile jastalni wa sjeʼa ja Biblia. Masni wa xkisawe ja yeʼnle yuja jastal kilawe ja bʼa jbanda. Jelni xkayi tsʼakatal ja Dyos yuja sjeʼaki ja tikʼe sakʼanil oj kiʼi.

 JA ANDRES: Ti pojkiyon sok kʼiyon bʼa jun barrio jel pobre, bʼa ay drogaʼik, milwanel, yelkʼajel takʼin sok ixuke bʼa wa xchono sbʼaje. Ja jtati jelni xyuʼaj sok jel xyabʼ ja cocaína. Tolabida jel xyutaj sbʼaje sok jel smakʼa sbʼaje soka jnani.

Yajni keremonto kʼe kabʼ droga sok kʼe kuʼ alcohol. Tini jela ajyiyon ekʼ bʼa calle. Wala elkʼaniyon sok wa xchono ja jas wa xkelkʼani. Jabʼilik tsaʼan, ja jtati mojxi jmok sok sjeʼaki jastal oj kaʼ ekʼ droga sok tuk jastik mey sjuʼunil ja bʼa paisi bʼa oj jchone. Bʼa tʼusan tyempo kʼot jkʼuluk ganar jitsan takʼin. Pe jun kʼakʼu ja policía kʼot bʼa jnaj, syamawone sok slutuwone joʼe jabʼil bʼa preso yuja jleʼunej modo milwaneli.

Bʼa jun saʼan sakbʼel slokowe yibʼanal ja matik lutane preso bʼa oj smaklaye jun loʼil oj yawe ekʼuk ja testigoʼik bʼa Jyoba sok jkʼana oj wajkon. Ja jas yalawe ayni stojol, ja yuj jkʼulan aseptar jun estudio. Ja Testigoʼiki xchiktese lek ja jas wa xyala ja Biblia, sjeʼawe tsʼikan lek ja jastik yaʼunej kujlajuk ja Dyosi.

Wegoxtani kaʼa kuenta bʼa tʼilan oj jkʼan jkoltajel bʼa oj tukbʼukon, sok mastoni, yajni ja matik lutane preso yalawe ay jas oj skʼulukeki yujni mi lek xyilawe ja wanon spaklajel ja Biblia, jkʼanayi ja Jyoba bʼa ayaki kip sok biboʼil. Stsʼakatal ja jaw bʼobʼ jakʼyile soka jas wanon snebʼjel sbʼaja jastik yalawe oj skʼulukekiʼi.

Yajni elyon ja bʼa preso jelni xiwel ayon yujni wanto xkʼana oj kankon tʼun tyempo mas. Yajni elumon, jujuntik sjeʼaweki ja skʼabʼe. Jaxa tuk yalawekabʼ: «Awajukawuj lek kala pastor».

Wani xyaki xiwel kechan spensarajel jastal maʼ ay ja jsakʼanil lek mokxta kakan ke ja Dyos oj xchapon. Jelni xkayi tsʼakatal ja Dyos yuja jel syajtayoni sok yuja mini sjipawonkani. a