Bʼa jun biaje bʼa eskuela, jujuntik keremtik leji smule bʼa yixtalaʼane june ja smojeʼi. Spetsanile ti wane skʼulajel estudiar bʼa jun eskuela tupubʼal lek bʼa jel chapan ja bʼa Canadá. Tsaʼan yajni ekʼ ja it, ja Leonard Stern tsʼijbʼan bʼa jun periodico Ottawa Citizen: «Ja biboʼil, ja estudioʼik ma ja jas tikʼe kʼotele mini wa xtimjiye bʼa mi oj skʼuluke jastik bʼa mi lekuk ja keremtik akʼixuki».

Ja bʼa artikulo stsʼijbʼani ja Stern xcholo: «Ja mas stojoli, ja nantataliki jani oj sjeyi ja yuntikile bʼaya lek sok bʼaya miyuki. Pe ja smeranili, lajansok jitsan, jani mas wa xcham skʼujole bʼa oj ajyuk yujile lekil calificación ja yuntikile sok oj staʼe jun yaʼtele bʼa oj tupjuke lek».

Ama jel tʼilan ja estudioʼik, pe ja tikʼe chapjelal jaw, anima jel lekuk, mini xbʼobʼ koltajukyuj jun kristyano bʼa mi oj kʼulajukyuj ganar ja kʼankʼunelik bʼa mi lekuki ma ja pensarik bʼa mi lekuki. ¿Jas tikʼe chapjelal wa xbʼobʼ yakitik ja lekil tojelal wa xmakunikujtiki?

Ja Biblia jach jastal jun espejo. Yajni wa xkʼumantik, wa xkilatik jastik wa skʼulayotik ganar sok janekʼ ita wa xlajxi kujtik (Santiago 1:23-25). Chomajkil, ja Biblia wa skoltayotik bʼa oj tukbʼes bʼajtik, bʼa oj katik ajyuk modoʼalik bʼa wa xya ajyukotik laman, tsoman, sjejel lekil modoʼal, lekil kʼujol, ja pasensya, ja skomjel jbʼajtik sok ja yajalkʼujol. Ja yuj, ja Biblia wa xyala ke ja yajalkʼujol: «wa xya ajyuk tsoman yibʼanal ja kristyano» (Colosenses 3:14). ¿Jas yuj jel chaʼanyabʼal ja yajalkʼujol? La kiltik ja jas wa xyala ja Biblia sbʼaja modoʼal it.

• «Ja yajalkʼujoli jelni juntiro ja spasensya sok lek skʼujol. Ja yajalkʼujoli mi imbidiosoʼuk. Mi stoyo sbʼaj, mi xyaʼa sbʼaj niwan, mi kalaxuk, mi jaʼ wa sleʼa ja slekilali, mi wegoxta wa xchʼinajbʼi. Mi xyiʼaj kuenta ja bʼa jastik mi lek wa xkʼulajiyiʼi. Mi xgustoʼaxi yuja jas mi tojuki, jani wa xgustoʼaxi soka smeranili. Spetsanil wa stekʼa, spetsanil wa skʼuʼan, spetsanil wa smajlay, spetsanil wa xkuchyuj. Ja yajalkʼujoli nunka xchʼaki» (1 Corintios 13:4-8).

• «Ja yajalkʼujolali mini skʼulanyi bʼa jas malo ja jmojtiki» (Romanos 13:10).

• «Pe cha jelni tʼilan oja yajtabʼajex meran lek, yujni ja yajalkʼujoli wa smusu jitsan mulal» (1 Pedro 4:8).

¿Anke yajni teytik soka jpamilyatik gustoʼaytik sok mi jas xcham jkʼujoltik? Jani yuja wa xnaʼatik ke wa skʼanawe ja jas mas lek bʼa keʼntik sok mini skʼanawe oj yixtalaʼukotike.

 Yuja yajalkʼujol, cha puestoni aytik bʼa ay jas oj chap jbʼajtik sok bʼa stukbʼesel ja jas wa xkʼulantiki. Jun sjejel, jun winik bʼa oj katik sbʼiʼiluk George jelni skʼana ti oj ajyuk soka yal yij bʼa pojkeltoʼi. Pe ja George jelni xyabʼ may, sok ja sniʼali mini skʼana ti oj yabʼ may mojan bʼa yal yalats. ¿Jas skʼulan ja George? Ama 50 jabʼilxa wan yabʼjel may, yaʼanikan bʼa oj bʼobʼ ajyuk soka yiji. ¡Jelni chaʼanyabʼal ja jas wa xbʼobʼ lajxukyuj ja yajalkʼujoli!

Ja yajalkʼujoli juni modoʼal bʼa wa xnebʼxi, soka nantataliki yeʼnleni ja maʼ masto oj bʼobʼ sjeyi ja yuntikile ja bʼa yajtaneli. Wa smakʼlaye, wa stalnaye sok wa skoltaye ja ta syajbʼes sbʼaje ma koʼye chamel. Ja lekil nantatalik wa xloʼlani soka yuntikile sok wa xchapawe. Chomajkil wa stojowe sok wa sjeʼaweyi bʼa oj snaʼe bʼaya leki sok bʼaya miyuk. Sok wa xyaweyi jun lekil sjejel bʼa oj snoch-e.

Tristeni yabʼjel pe jujuntik nantatal mini skʼulane ja cholal yiʼoje. Pe ¿wan maʼ stojolan ja it bʼa mey yiʼoje smajlajel ja untiki? Miniʼa. Asta ja matik ayxa skʼujol bʼa ti kʼiʼel bʼa jun pamilya bʼa mi kulanukyuj lek, stukbʼesneje jastik jel chaʼanyabʼal ja bʼa sakʼanile sok kʼotele kristyanoʼik bʼa wa xyajtaniye sok wa skʼulane ja cholal yiʼoje. Asta ja matik bʼa lajansok mixa oj tukbʼuk ja sakʼanile, stukbʼesneje ja sakʼanile, jastalni oj kiltik ja bʼa artikulo nochani.