Juni modoʼal wa skoltayotik bʼa kuchelkujtik ja wokoli ma ja tristeʼil jach mi oj el jganatik. Ja modoʼal it wa xtaxi yajni ayxa kiʼojtik experiensya. Jastalni jun yal kerem mi oj snebʼ bʼejyel jach mini jun ekʼele oj mokʼuk, cha mini oj snebʼ jastal oj ajyuk ja bʼa sakʼanil ta mi xyiʼaj wokoli.

Jujuntik yal untik wa x-el sganaʼe yajni mi lek xwajyujile, yajni wa stʼaspune wokol ma ja yajni wa xtojiye, sok tuk yal untik wan x-el sganaʼe. Pe, jelni lek oj yabʼye stojol ja jas ti nochani:

• Mini xbʼobʼ lajxuk skʼulajel spetsanil ja bʼa leki (Santiago 3:2).

• Jpetsaniltik ayni ekʼele wa xtʼaspuntik tsatsal wokolik ja bʼa jsakʼaniltiki (Eclesiastés 9:11).

• Jpetsaniltik wani xmakunikujtik ay maʼ oj stojotik. Jani jaw ja modoʼal bʼa snebʼjel (Proverbios 9:9).

Ta jawa wuntikil wa x-ajyiyuj snajel, ojni bʼobʼ kuchyuj ja wokolik ja bʼa sakʼanili.

Yajni wa skʼulane jas mi stojoluk

RASON BʼA BIBLIA: «Yujni ja maʼ toji wa xbʼobʼ mokʼuk juke ekʼele, sok ja yeʼn oj kʼejan pilan ekʼele» (Proverbios 24:16).

Koltay jawa wuntikil bʼa ayil-e jun modo stojol ja jastiki. Jun sjejel, ¿jasa oj skʼuluk ta mi lek wajyuj ja bʼa exameni? ¿Oj maʼ el sgana sok oj yal: «¡Mini tʼun lek xwajkuj!»?

Bʼa oja koltay jawa wuntikil bʼa ajyelyuj snajel, koltay bʼa spensarajel jas wa xbʼobʼ kʼulaxuk bʼa oj tojbʼuk mas ja jas wa skʼulane. Jachuk oj sleʼ modo stojbʼesel ja wokoli sok mi oj yajbʼesjuk.

Pe mokni weʼna tojbʼes ja swokoli. Koltay bʼa yeʼn oj stojbʼes. Ojni bʼobʼa jobʼyi: «¿Jas oj bʼobʼa kʼuluk bʼa oja wabʼ lek stojol ja jas wan jejelawiʼi?».

Yajni wa x-ekʼ jun desgrasya

RASON BʼA BIBLIA: «Mixa naʼawex jas oj ekabʼajex ja jecheli» (Santiago 4:14).

Mini xbʼobʼ jnatik ja jas wa xbʼobʼ ekʼuk ja bʼa jsakʼaniltiki. Ja takʼini sok ja jastal jel lek aytiki wani xbʼobʼ tukbʼuk junta chʼaykʼujol. Jastalni wa xyala Biblia, «ja maʼ jel x-ajni mi tolabidaʼuk wa skʼulan ganar ja ajneli, ja maʼ jel yipi mi skʼulan ganar ja tiroʼaneli, [...] yujni ja tyempo soka jas mi xmajlaxi oj ekʼuki wa x-ekʼ sbʼaje spetsanile» (Eclesiastés 9:11).

Mini tukuk yuja janekʼto waxa kʼujolan bʼa stalnajel jawa wuntikil ja bʼa jas xiwela sbʼaji. Pe, yiljel bʼa jun modo stojol, mini oj bʼobʼa talnay bʼa spetsanil ja wokolik ja bʼa sakʼanili.

Meran bʼobʼta jawa wunini jelto kerem bʼa oj chʼayuj jun yaʼtel ma oj yiʼ wokol yuj takʼin, pe bʼobʼta ojni stʼaspuk tuk wokolik, jastal ja oj chʼayuj jun yamigo ma ja oj chamuk june ja bʼa spamilya. *

Yajni wa x-aljiyabʼ ay jas oj ya tojbʼuk bʼa yeʼna

RASON BʼA BIBLIA: «Maklay ja rasoni, [...] bʼa jachuk oj paxan biboʼil ja bʼa tyempo jakumi (Proverbios 19:20).

Ja wa x-alji ay jas oja tojbʼes bʼa weʼna, mini yuj wa x-aji xiwan ma wala yajbʼesji. Juni modo bʼa stojbʼesel jun modoʼal bʼa mi lekuk.

Sjejelyi jawa wuntikil bʼa oj skis ja rasoniki, ojni koltajuk bʼa mi jel oj yiʼ wokol sok jachuk ja weʼn. Jun tatal sbʼiʼil John, wa xyala: «Ta tolabida waxa tojbʼesyi ja swokol jawa wuntikili, nunka ay jas oj snebʼe. Jelni oj xchʼik sbʼaj bʼa wokol, sok tolabida weʼnani oja tojbʼesyi. Yuja jaw ojni yijanawilex wokol».

¿Jastal oja koltay jawa wuntikil bʼa oj skis jawa x-aljiyabʼ ay jas oj ya tojbʼuk bʼa yeʼna? Yajni ay maʼ wa xtojiyuj ja bʼa eskuela ma bʼa pilan lado, mokni awal mi stojoluk. Jaʼuktoma ja jaw, jobʼoyi:

• «¿Jas yuj tojiya?».

• «¿Jastal oj tojbʼan?».

• «¿Jas oja kʼuluk yajni junxta xcha ekʼabʼaj?».

Ajuluka kʼujol, ja oj aljukyabʼ ay jas oj ya tojbʼuk jawa wuntikili, ojni koltajuk ja wego, sok jachni yajni xjul ja skʼujoli.