Ja kristyanoʼik bʼa ay jastik lek snebʼunej wani snaʼawe ja jas lek sok ja bʼa mi lekuki. Ja jastik lek snebʼuneje mini xtukbʼi ama chikan jastal wa xtaxye, wani xyawekan atojuke yuj rasonik ja bʼa jas wa skʼulane ama mi maʼ xbʼobʼ iljukeyuj.

Ja bʼa jtyempotik, ja yal untiki wani xyabʼye pensarik mi meranuk bʼa lek sok bʼa mi lekuk ja bʼa smoje bʼa eskuela, bʼa kʼinik, bʼa pelikulaʼik sok bʼa programaʼik bʼa telebisyon. Ja jastik wa xbʼobʼ yabʼye ojni bʼobʼ ajuk skʼul-e dudar ja bʼa jastik lek snebʼuneje.

Ja it mastoni jel tʼilan yajni wane solteroʼaxeli. Ja libro Después de «la charla padre e hijo» (Beyond the Big Talk), wa xyala, ke ja jabʼilik jaw, ja keremtik akʼixuk «tʼilani chapan oj ajyuke ja bʼa stʼenwanel ja smoje sok ja bʼa modoʼalik bʼa loʼilanel bʼa jel oj najuk sbʼaje. Tʼilani oj snebʼe stsajel ja jas oj skʼuluke yajel makunuk ja jastik lek snebʼuneje, ama mini akuerdo ayuk soka jas wa xyala ja yamigoʼe». Chikani lek ke ja nantataliki tʼilani oj sjeʼeyi ja jastik it ja yuntikile bʼajtanto oj solteroʼaxuke.

Jeʼayi jaman lek ja bʼa jas lek sok ja bʼa mi lekuki

RASON BʼA BIBLIA: Ja «matik tsatsxa ja skʼuʼajeleʼi, [...] snebʼunejexa spensarajel sok jachuk wa xbʼobʼ yil-e ja stukil ja bʼa jas lek soka bʼa mi lekuki» (Hebreos 5:14).

• Amakunuk yaljelik bʼa wa xchiktes ja jas lek sok ja bʼa mi lekuki. Amakunuk ja jastik wa x-ekʼ ja bʼa sakʼanili sok xchiktes ja stukili. Jun sjejel, oj bʼobʼa wal: «Ja it toj. Ja it mi tojuk». «Ja it jun sjejel bʼa ajyel toj. Ja it jun sjejel bʼa mi toj ajyel». «Ja it lekil modoʼal. Ja it mi lekil modoʼaluk». Yajni x-ekʼ ja tyempo, jawa wuntikili ojni snebʼ skʼulajel ja bʼa jas lek sok ja bʼa mi lekuk skʼulajel.

• Cholo yabʼye jas yuj tʼilan oj skise ja bʼa jas lek sok ja bʼa mi lekuki. Ayabʼ stojol jawa wuntikil bʼa oj koltajuk xchapjel ja sconciencia. Jun sjejel, jobʼoyi: «¿Jas yuj masni lek ajyel toj?». «¿Jas yuj ja slejel abʼal wa xchʼaya ja amigoʼik?» ma «¿Jas yuj mi lekuk ja elkʼali?».

• Chiktes ja slekilal wa xyijan skisjel ja jastik lek anebʼuneji. Ojni bʼobʼa walyabʼi: «Ta toj jawa modo, ja kristyanoʼik ojni sjip skʼujole bʼa weʼna» ma «Ta lek jawa modo, ja kristyano ojni skʼan oj ajyuke amok.

Ila ta yibʼanal jawa pamilya wa xyawe makunuk ja jastik lek snebʼuneje

RASON BʼA BIBLIA: «Moka waʼexkan skʼulajela bʼajex probar ja jastal mero kʼotelexi» (2 Corintios 13:5).

• Yibʼanal jawa pamilya tʼilani oj yawe makunuk ja jastik lek snebʼuneje, jachuk ojni bʼobʼa wal jaman lek ja it:

  • «Ja keʼntikon mi xleʼatikon abʼal».

  • «Ja bʼa jnajtikoni mi maʼ xmakʼwani, sok mi maʼ x-utani».

  • «Ja keʼntikoni mini lek xkilatikon kʼakʼal kʼumali».

Jach jastal it jawa wuntikil oj yil ke ja jastik lek nebʼxeli, mini kechanta jastik kujlajel bʼa snochjel, jani bʼa oj sjeʼ ja jastal mero kʼotel ja pamilya.

• Amakunuk ja jastik wa x-ekʼ ja bʼa sakʼanil bʼa loʼilanel soka wa wuntikil ja bʼa jastik lek nebʼxeli. Ojni bʼobʼ wa slaj sbʼajsok ja bʼa smojeʼi ma ja jas wa xchiktes ja bʼa modoʼalik bʼa loʼilanel. Jobʼoyi: «¿Jas oja kʼuluk ja weʼn?» ma «¿Jas maʼ oj skʼuluk ja jpamilyatik?».

Koltay bʼa oj skʼuluke ja jastik lek snebʼunej jawa wuntikili

RASON BʼA BIBLIA: «Aʼajyuka wujilex juna lekila concienciaʼex» (1 Pedro 3:16).

• Kʼulane felicitar yajni lek wa sjeʼa ja smodoʼe. Yajni jawa wuntikil wa xyawekan atojuke yuja jastik lek snebʼuneje, kʼulane felicitar sok cholo yabʼye jas yuj jelni lek ja jach skʼulaneʼi. Jun sjejel, ojni bʼobʼa walyabʼi: «Jelni toj wajya. Jel xwa gustoʼaxukon». Ta jawa wuntikil wa xyala ay jas mi lekuk skʼulunej, ayi tsʼakatal bʼajtanto oja toje.

• Tojowe yajni ay jas mi lek wa skʼulane. Koltay jawa wuntikil bʼa oj ajyuke responsable ja bʼa jas wa skʼulane. Ja yal untiki tʼilani oj snaʼe ja jas mi lek skʼuluneje sok jas yuj ja skʼulajel jaw mi xkʼanxi ja bʼa spamilya. Jujuntik nantatal mini skʼanawe ay jas oj yalweyabʼ ja yuntikile, pe loʼilanel soka yeʼnle ja bʼa jas ekʼeli ojni koltajuke bʼa xchapjel ja sconcienciaʼe sok bʼa oj yil-e ja stukil ja bʼa jas lek sok ja bʼa mi lekuki.