Jani ja modoʼal wa skoltayotik bʼa:

• snajel smajlajel skʼulajel ja jas wa xkʼankʼunikujtiki

• skomjel ja jastal ay xkabʼtiki

• skʼulajel ja jas tʼilani anima mi xkiʼajtik gusto

• spensarajel bʼajtan ja tuki

Ja yal untik bʼa wa skomo sbʼaje wani xbʼobʼ kuchyujile ja preba ama lajansok jel xpaywani. Pe, ja yal untik bʼa mi skomo sbʼaje masni wa xbʼobʼ ijuke och bʼa:

• jel kalaxe

• yijel wokol yuja jelxelxa ja chamkʼujoli

• snukʼjel may, yabʼjel droga ma jelxel yujel trago

• mi stalnaye ja jastik wa xyabʼye

Jun estudio xchiktes ke tʼusan mi spetsaniluk ja yal untik bʼa wa skomo sbʼaje, masni mi jel xwokolaniye yuja jastik junuki, ja jastik bʼa ley sok bʼa jun chamel yajni xjul ja skʼujoleʼi. Ja estudio jaw, jani ja jas iji och ja Angela Duckworth, jun maestra ja bʼa Universidad bʼa Pensilvania, bʼa yala: «Ja skomjelabʼaj jelni xkoltani».

Nebʼa yaljel miyuk sok akʼotuk

RASON BʼA BIBLIA: «Ta kechanta awala ‹ojo›, yujni ojoʼa, sok ta awala ‹miyuk›, pes yujni miyuka» (Mateo 5:37).

Ay ekʼele ja yal untiki wa xyawe och prueba ja nantatalik bʼa wa x-okʼye bʼa oj ajukyile ja jas wa skʼanaweʼi, sok bʼobʼta wani skʼulane bʼa stiʼ sat tuk kristyanoʼik. Ta ja nantatalik wa xkʼokxiye, ja yal untiki tolabida jach oj skʼuluke yajni ay jas wa skʼanawe.

Pe ta ja nantatalik wa xyalawe miyuk sok wa xyawe kʼotuk, ja yal untiki wani snebʼa jun jasunuk jel tʼilan: ke mini tolabida oj staʼ ja jas wa skʼana. Ja loktor David Walsh stsʼijbʼan: «Ja kristyanoʼik bʼa wa snebʼawe skomjel sbʼaje masni gusto wa x-ajyiye». Cha xchiktes ke mini xkoltaytikon «ja kuntikiltikon ta wa xjeʼatikonyi ke mini pasil oj ajukyile yuja luʼumkʼinal ja jas wa skʼanawe». *

Ja oja walyabʼ miyuk jawa wuntikil ja wego, tsaʼan ojni koltajuk bʼa mas pasil oj yal miyuk ja bʼa drogaʼik, ja bʼa stajel sbʼajsok june bʼajtanto oj nupanuk sok bʼa tuk jastik oj jomjuk.

Jeʼayile ke bʼa spetsanil wani xyiʼajan slekilal ma swokolil

RASON BʼA BIBIA: «Chikan jas stsʼunu jun kristyano jani oj yil sat» (Gálatas 6:7).

Jawa wuntikili tʼilani oj snebʼ ke ja jas wa skʼulani ayni yiʼoj swokolil, sok ja yuj ta mi snaʼa skomjel sbʼaj mini lek oj wajyuj. Jun sjejel, ta jawa wuntikil jel wego xtajki yuj jun jasunuk, masni mi jel oj ajyuk yamigoʼik. Pe ta wa snebʼa skomjel ja smodo ma wa smaklay sok pasensya, ja tuki ojni skʼan oj ajyukesok. Koltay jawa wuntikil bʼa ayil masni lek oj wajyuj ta snebʼa skomjel sbʼaj.

Koltaye bʼa oj snaʼe ja jas mas tʼilani

RASON BʼA BIBLIA: «Ke oja naʼex lek jastik junuk ja mas tʼilani» (Filipenses 1:10).

Skomjel jbʼajtik mi wa stojolan mi jkʼuluktik jastik mi lekuk, cha wani stojolan skʼulajel ja jas tʼilani, ama lajansok mi jel chaʼanyabʼaliluk ma mi jel xyaʼa gustoʼil. Jelni tʼilan ke jawa wuntikil a-skʼuluk ja jastik mas tʼilani, ja yuj ila lek ta tolabida bʼajtan wa skʼulan ja jas mas tʼilani. Jun sjejel, skʼulajel ja stareʼa bʼa eskuela bʼajtanto oj tajnuk.

Aʼa jun lekil sjejel

RASON BʼA BIBLIA: «Keʼnani kaʼunejawilex ja sjejeli bʼa oj cha akʼulukex junxta jastal jkʼulanawilex (Juan 13:15).

Ja yal untiki wani xyila jastal wa sjeʼa ja smodo ja snantate yajni wa x-ekʼ sbʼaje jastik mi lekuk, ja yuj aʼa jun lekil sjejel ke ja skomjelabʼaj wani xyiʼajan slekilal. Jobʼo abʼaj: «¿Jas wa xkʼulan yajni ja kuntikil wa skʼulan jun jasunuk mi lekuk? ¿Wego maʼ wala tajkiyon ma wala ajyiyon laman?».