Ja kristyano bʼa chʼin wa xyaʼa sbʼaje wani xkiswaniye. Mi niwan wa xyaʼa sbʼaje sok mini wa smajlaye jel chaʼanyabʼal oj iljuke. Jaʼuktoma, meran wa skisawe ja tuki sok puesto aye snebʼjel bʼa yeʼnle.

Jujuntik kristyano wa spensarane ke ja yajelabʼaj chʼin juni sjejel bʼa meyuka wip, pe ja smeranili juni modoʼal bʼa wa skoltayotik snajel ja jas mi lek wa xkʼulantiki sok ja janekʼ wa xlajxikujtiki.

• Jachuk jawa wuntikili masni oj ajyuk yamigoʼik. Ja libro La epidemia del narcisismo wa xyala ke «ja maʼ chʼin wa xyaʼa sbʼaji masni kʼubʼan aye soka tuk», «masni pasil wa xbʼobʼ ajyuke soka tuk sok bʼa chikan jas tikʼe kristyano».

• Jachuk jawa wuntikili masni lek oj wajyuj. Snebʼjel yajel sbʼaj chʼin ojni koltajuk jawa wuntikil ja wego sok ja bʼa tyempo jakumi. Jun sjejel, yajni sleʼa yaʼtel. Ja loktor Leonard Sax stsʼijbʼan: «Ta jun kerem yeʼnta jel spensaran sbʼaj, sok mi xyaʼa sbʼaj kuenta ja bʼa jas mi xbʼobʼ skʼuluki, mini lek oj iljuk yajni oj waj sleʼ jun yaʼtel. Pe ta jaʼ wa xwaj skʼujol ja jas wan yaljel ja maʼ oj ajukyuj yaʼteli masni pasil oj staʼ jun yaʼtel». *

Koltaye bʼa mi oj jelxuke ja jastal wa xyila sbʼaje

RASON BʼA BIBLIA: «Pes ta aykʼa maʼ wa spensaraʼan lajansok kechan yeʼna yajni mi jas kʼoteli, yeʼnxtani wan sloʼlajel sbʼaj» (Gálatas 6:3).

• Moka wal yaljelik mi meranuk. «Spetsanil jawa wayichi ojni kʼot smeranil». «Ojni lajxukawuj spetsanil ja jas waxa kʼana». Yaljelik jastal it lajansok jelni lek, pe tʼusan mi spetsanil ekʼele mini xkʼot smeranil. Ta jawa wuntikil wa x-ayi skʼelsate bʼa oj lajxukyujile sok wa skʼujolane bʼa stajel, masni lek oj wajyujile.

• Kʼulane felicitar yuja jas wa xlajxiyujile. Yaljelyabʼ jawa wuntikil yeʼnle ja mas leki mini xkoltajiye bʼa chʼin oj yaʼ sbʼaje. Kʼujolan bʼa mi oj jelxan.

• Ayi stikʼanil jawa wuntikil ja janekʼ wa xyawe makunuk ja Internet. Tikʼanxta ja kristyanoʼik wa xyawe makunuk ja Internet bʼa yaljel ja jastal jel lek kʼotele sok stoyjel sbʼaje ja bʼa jas wa snaʼawe ma wa xlajxiyujile, bʼa wani sjeʼa mi chʼin xyaʼa sbʼaje.

• Koltay jawa wuntikil bʼa a-skʼane perdon. Yajni jawa wuntikil wa skʼulan jun jasunuk mi lekuk, koltaye bʼa a-snaʼe ja smuli.

Jeʼayile bʼa ayaʼe tsʼakatal

RASON BʼA BIBLIA: «Jeʼawik waxa waʼawex tsʼakatal» (Colosenses 3:15).

• Yuja kʼulbʼeni. Ja yal untiki tʼilani oj skis-e ja kʼulbʼeniki sok a-snaʼe ke yujila jaw wani xbʼobʼ ajyukotiki sakʼan. Jun sjejel, lek meyuk ikʼ, jaʼ ma waʼelal ojni chamkotik. Sjejelik jastal it, ojni koltajuke bʼa oj skis-e sok oj yaʼe tsʼakatal yuja tsamal kʼulbʼeniki.

• Yuja lekil smodoʼe ja tuki. Jeʼayi jawa wuntikil ke masni ekʼxele ja tuk yuja yeʼni, sok jaʼuktoma oj yilkʼujoluk ja smodoʼe, ojni bʼobʼ snebʼ bʼa yeʼnle.

• Jeʼayile ayaʼe tsʼakatal. Jeʼayile jawa wuntikil ayaʼe tsʼakatal sok spetsanil skʼujole, sok mi kechanta yaljeluk. Ja yajel tsʼakatal jelni tʼilan bʼa sjejel yajelabʼaj chʼin.

Jeʼayile ja stʼilanil bʼa skoltajel ja tuki

RASON BʼA BIBLIA: «Aʼabʼajik chʼin spensarajel ke ja tuki mas ekʼxele yuja weʼnlexi, yajni mi kechanuk waxa leʼawex ja jas waxa kʼanawex ja weʼnlexi, cha jachni ja jas wa skʼanawe ja tuki» (Filipenses 2:3, 4).

• Kʼanayi jawa wuntikil akoltanuke ja bʼa aʼtelik bʼa naʼitsi. Ja mi oj wa aʼtijuk jawa wuntikil ja bʼa naʼitsi lajansok waxa walyabʼ jachuk: «Ja weʼn jelni tʼilana sok mixa bʼajin oja kʼuluk ja jastik it». Jani bʼajtan akoltanuk ja bʼa naʼitsi sok tsaʼan ja tajneli. Jeʼayi ja slekilal oj yil-e ja tuk ja oj skʼuluk ja yaʼteli, ja janekʼto oj kʼanjuk sok oj kisjuk yuja jaw.

• Jeʼayile ja skʼulajel jastik junuk yuja tuk jelni chaʼanyabʼal. Ja oj chamskʼujol sbʼaja tuk, jelni oj koltajuk jawa wuntikil bʼa oj takʼanbʼuk. Ja yuj, paklayik lajan machun wa skʼana skoltajel sok jastal oj bʼobʼ koltanuk jawa wuntikili. Kʼulan felicitar sok tsatsankʼujolan yajni wa skʼulani.