Kada kʼakʼu jitsan kristyano jel x-aʼtijiye bʼa stajel ja jas wa xmakuniyujile. Pe mini pasiluk yuja wokolik wan ekʼel ja bʼa luʼumkʼinali. ¿Jas yuj?

• Yajni wan ekʼel wokol bʼa jun lugar wani xkʼe ja stsʼakol ja waʼelalik sok ja naʼitsiki.

• Mixa jel x-ajyi aʼtel sok wa xkoʼ ja stsʼakoli.

• Ja desgrasyaʼik soka mal tyempoʼi wani xbʼobʼ xchʼay ja negosyoʼik, ja naʼitsik sok tuk jastik yiʼoj ja kristyano. Ja yujil, jitsan wa xkanye pobreʼil.

• Ta waxa naʼa yajel makunuk lek jawa takʼini masni chapan oj ajyan bʼa kuchelawuj jun wokol.

• Ajuluka kʼujol jawa takʼini sok ja jastika bʼaj wani xbʼobʼ chʼayuk.

• Ay jastik mi xbʼobʼ sman ja takʼin, jastal ja gustoʼil ma jun pamilya tsoman.

Ja Biblia wa xyala: «Ta ay jwaʼeltik sok jkʼutik, la ajyukotik gusto soka jawi» (1 Timoteo 6:8).

Ajyel gusto mi wa stojolan ajyelkujtik yibʼanal ja jas wa xkʼanatiki, jaʼuktoma ja ajyel gusto jani yuja ay kiʼojtik yibʼanal ja jas wa xmakunikujtiki. Jelni tʼilan yajel juljkʼujoltik ja it sok mas ja yajni mey kiʼojtik lek takʼini.

Bʼobʼta tʼilan oja nebʼ mi jel oja chʼak takʼin bʼa mas gusto oj ajyan. Ta tolabida waxa mana jastik bʼa mi oj bʼobʼa tup masni oj yijanawi wokol.