Ja jastal wan jomel ja ikʼi ojni bʼobʼ xchʼaysnajel ja sakʼanil ja bʼa Luʼumi. Jastalni wa xyalawe ja Tsome matik wa skʼelawe sbʼaja chamelik bʼa yibʼanal luʼumkʼinal jelni tʼusan ja kristyanoʼik ja bʼa Luʼumi bʼa wa sjakʼawe lekil ikʼ.

Ja jastal wan jomel ja ikʼi ojni bʼobʼ yijan cáncer bʼa pulmón, chamelik bʼa yijel ikʼ sok bʼa kaltsiltik. Chomajkil, kada jabʼil wani xchamye junuk juke miyon kristyano yuja jastal wan jomel ja ikʼi.

Ja Luʼumi kʼulubʼalni bʼa oj ya ajyuk lek ja lekil ikʼ bʼa spetsanil ja jastik sakʼan ayi bʼa wa xyiʼaje ikʼi. Pe kechantani oj bʼobʼuk ja it ta ja kristyanoʼik mi xjelxiye sjomjel ja Luʼumi. La kiltik jujuntik sjejel.

• Ja teʼaltiki jel naʼubʼal sbʼaje yuja jastal wa xbʼobʼ yiʼekan ja ikʼ wa xkatik eluki. Pe ja jasa mi snaʼawe jitsan kristyano eske ja yal teʼaltik wa xkʼiye bʼa ay jaʼi sok ja bʼa wa stsʼajwiʼi mastoni wa xyiʼajekani. Asta ja jas wa skʼulane ja yal teʼaltik ja bʼa jaʼi jelni chaʼanyabʼal. Ojni bʼobʼ xchʼay-e snajel ja bʼa ikʼi joʼe ekʼele mas ja ikʼ wa xkatik eluk ke yuja yaxkʼuliki.

• Jastalni wa xyala bʼa jujuntik spaklajel yiʼoj ja ajkʼachto, jujuntik yal kʼulik wa xkʼiye ja bʼa mari, jastal ja quelpo mini kechanta wa xyiʼajekan ja ikʼ wa xkatik eluki, cha wani xchʼayawe snajel. Ja spowil ja quelpo wani xbʼobʼ kayinajuk najat lek ja bʼa sat jaʼi stsʼakatal yuja ayiʼoj yal sbolaʼilik bʼa bʼutʼel ikʼ. Yajni najatxa aye lek ja bʼa stiʼ jaʼi, wa xbʼojtiye, jaxa quelpo wa xmukxikoʼe sok wa xyiʼaj ja ikʼ wa xkatik eluk masan ja bʼa yojol ja mari, bʼa lajansok ti wa xkan tiw bʼa jitsan tyempo.

• Ja bʼa styempoʼil ajyi ja COVID-19, chiknajini lek ke ja spojtsil ja luʼumi ojtoni bʼobʼ tojbʼuk. Chomajkil, yuja bʼa 2020 lutji jitsan fabricaʼik sok junta chʼaykʼujol mixa jel ajyi karroʼik, tsʼujni lek ja jastik wa xjomwani sok wegoxtani tojbʼi ja bʼa jastal wa xtax ja ikʼi. Jastalni wa xyala jun Imporme bʼa yibʼanal ja luʼumi sbʼaja jastal wa xtax ja ikʼi ja bʼa 2020, mas ja 80% ja bʼa paisik bʼa spaklaye yilawe ke maxani lek wa xtax tʼusan tsaʼan yajni kʼeta ja chamel wa spuku sbʼaji.

Ja matik ay xcholi waneni yaljel yabʼ ja empresaʼik bʼa mok jel yawe makunuk jastik bʼa wa sjomo ja ikʼi. Chomajkil, ja científicoʼik wanetoni stajel yajkʼachil modoʼik bʼa stojbʼesel ja jastik wa sjomo ja ikʼi. Jun sjejel, wani x-aji makunuk yal nuxil chanik bʼa yajel paxuk ja jastik wa sjomo ja ikʼi bʼa lekil ikʼ. Chomajkil, ja matik jel chapaneʼi wa xyalawekabʼtik ke la bʼejyukotik ma la jkʼultik biajar sok bicicletaʼik ke yuj oj wajkotik sok karro sok mok jel jchʼaktik ja lus ja bʼa jnajtiki.

Pe mini malanukta soka jaw. Sok jachni wa xchiktes jun imporme kʼulaji ja bʼa 2022 bʼa jitsan empresaʼik, june ja jaw tey ja Tsome matik wa skʼelawe sbʼaja chamelik bʼa yibʼanal ja luʼumkʼinal sok ja Banco Mundial.

Ja imporme it wa xchiktes ke ja bʼa 2020 jun yal parte ja bʼa kristyanoʼik bʼa yibʼanal ja luʼumi wani skʼulane cosinar sok jastik bʼa wa sjomo ja ikʼi. Bʼa jitsan lugar, tʼusan mi spetsaniluk ja kristyano mini x-ajiyile permiso bʼa smanjel estufaʼik ma bʼa yajel makunuk gas.

«Ja it ja jas wa xyala ja Dyos smeranili, ja Jyoba, ja Kʼuluman ja bʼa satkʼinali [ ...], ja Maʼ slibʼa ja luʼumi sok ja sbʼaʼali, ja Maʼ wa xya yiʼ ikʼ ja swinkili» (Isaías 42:5).

Ja Dyos skʼulan ja ikʼi sok ja tuk jastik bʼa wa xya ajyuk asyado. Chomajkil, jelni ja yipi sok jel syajtay ja kristyanoʼiki. Ja yuj, ¿ay maʼ jas oj skʼuluk sbʼaja jastik wan sjomjel ja ikʼi? Kʼela ja artikulo «Ja Dyos wa skʼapa ke ojto tojbʼuk ja Luʼumi».