Ja nupanumik bʼa lajan wa x-aʼtijiye jach jastal ja maʼ mero wa syama ja abyon sok ja skoltanumi bʼa junxta ja jastal wa spensarane sbʼaja biaje. Mi spensaran bʼa kechan yeʼnle, jani ja mas lek bʼa xchawanile, cha jachni yajni wa stʼaspune wokolik.

RASON BʼA BIBLIA: «Mixani chawaneʼuke, kechanxtani june kʼotele» (Mateo 19:6).

«Jelni tʼilan oj skoltay sbʼaje ja tatamal soka cheʼumal bʼa oj wajyujile lek ja bʼa snupanele» (Christopher).

Ta ja nupanumik mi x-aʼtijiye lajan, yajni stʼaspune jun wokol, yeʼntani oj xchʼak sbʼaje sok mi jaʼuk ja wokoli, sok mas tsaʼan, ja yal wokol jaw wani xpax jun tsatsal wokol.

«Ja aʼtel lajan ja bʼa nupaneli jelni tʼilan. Lekbʼi ja keʼn soka jtatami mi la aʼtijitikon lajan, kechani oj kil jbʼajtikon jastal jmoj jbʼajtikon kuarto: bʼa junxta naʼits aye, pe mini x-ochye akuerdo bʼa oj stsaʼe skʼulajel jastik jel tʼilan» (Alexandra).

PAKLA ABʼAJ

• ¿Wan maʼ xa pensaraʼan ke ja takʼin waxa kʼulan ganari kechanta weʼna bʼaj?

• ¿Wan maʼ xa kʼana oj ajyana tuchʼil bʼa oja wi tʼuna wip?

• ¿Mi maʼ jel pilan ayuka soka spamilya jawa nupi ama ja yeʼnle jel tsoman aye?

BʼA LOʼILANEL SOKA WA NUPI

• ¿Bʼa jastik junuk ja bʼa jnupaneltikon jel lek la aʼtijitikon?

• ¿Bʼa jastik junuk oj bʼobʼ jtojbʼestikon?

• ¿Jastik junuk oj bʼobʼ jkʼuluktikon bʼa aʼtel mas lajan?

JA JAS OJ BʼOBʼA KʼULUK

• Aʼekʼ bʼa wa pensar ke ja nupaneli jach jastal tajnel futbol. ¿Jas oj bʼobʼa kʼulukex bʼa oj tajnanik bʼa junxta equipo sok mi bʼa pilan?

• Jaʼuktoma kechan oja pensaraʼuk bʼa jastal kechan weʼn oja kʼul ganar, pensaran jastal oja kʼulukex ganar achawanilex.

«Mini ay stʼilanil machun ayiʼoj rason. Ja mas tʼilani jani oj ajyuk lamanil sok ajyel lajan ja bʼa nupaneli» (Ethan).

RASON BʼA BIBLIA: «Yajni mi kechanuk waxa leʼawex ja jas waxa kʼanawex ja weʼnlexi, cha jachni ja jas wa skʼanawe ja tuki» (Filipenses 2:3, 4).