Ja kʼajyel oj loʼilanuke ja nantatalik soka untiki wani stojolan yaljel sbʼaje ja jas wa spensaraʼane soka ja jastal wa xyabʼ aye.

Loʼilanel soka untik yajni wanexa solteroʼaxel bʼobʼta wokolniʼa. Yajni chʼineto wani xcholo wabʼyex spetsanil. Pe ja wego yuja wanexa solteroʼaxeli mixani jeluk, sok mixani xa naʼawex ja jastal ay xyabʼyeʼi ma jas wa spensaraneʼi. Lajansok spilunejex jun yok jaʼ. Pe mini jachukuk meran, pes yajni jach waxa wilawex jawa wuntikilexi, jaʼa yajni mas wa skʼanawe oj loʼilanuke.

Ila jas ora oj bʼobʼyuj jawa wuntikili. Kʼulan ja jaw ama wa stojolan oj kanan loʼilsok man chaʼanxa akwal.

«Ayni waxa kʼana oja wal: ‹¡Snajtil kʼakʼu teyotik ekʼ lajan ¿jaxa wego waxa kʼana oj loʼilanan?!›. Pe ¿jastal oja wal jachuk ta jawa wuntikil wa skʼana oj sjamawi ja skʼujoli? ¿Mi maʼ jaʼuk ja jaw ja jas wa xkʼanatik kibʼanaltik ja nantatalik?» (Lisa).

«Kʼajyel sajto wa xwaj waykon, pe jujuntik loʼil mas tsamal kaʼunej soka kuntikil solteroʼiki, jaʼa yajni masxa ja nalan akwali» (Herbert).

RASON BʼA BIBLIA: «Jani la jletik ja slekilal ja tuki sok mi jaʼuk ja jbʼajtiki» (1 Corintios 10:24).

Mok jas sjoma wolom. Jun tatal wa xyala: «Ay ekʼele yajni wanon loʼilsok ja kuntikili, wa xkʼe jpensaraʼuk bʼa tuk jastik junuk, sok ja smeranili, ja yeʼnleʼi wani xyaʼa sbʼaje kuenta».

Ta ay jach akʼulunej jastal wa xyala ja komentaryo jaw, tupu ja telebisyon sok aʼakan bʼa pilan lugar ja aparatoʼiki. Jaʼ xwaja kʼujol ja jas wan yaljel awabʼ jawa keremi, jachuk oja jeyi ke ja jas wa xcham skʼujoli cha wani xchama kʼujol ja weʼn, ama mi jel chaʼanyabʼaluk.

«Jelni tʼilan ke ja kuntikiltiki a-snaʼe ke wa xcham jkʼujoltik ja jastal ay xyabʼyeʼi. Ta mikʼa, mini jas oj yal-e ma ojni sleʼ skoltajele bʼa pilan lado» (Maranda).

«Ama yajni wa xyala jun jasunuk bʼa mey sbʼej jawa wuntikili, mok jel chamuka kʼujol» (Anthony).

RASON BʼA BIBLIA: «Ilawik lek ja jastal waxa maklayexi» (Lucas 8:18).

Aʼel slekilal chikan jas ekʼele. Ayni ekʼele, ja keremtik akʼixuk mas puesto wa x-ajyiye loʼilanel soka snantate yajni wane skʼulajel jastik bʼa naʼits sok mi jaʼuk yajni kulane bʼa yaljel bʼa jun jasunuk.

«Ja keʼntikoni wa xkatikon el slekilal ja biajeʼik bʼa loʼilanel. Kulanel lajan bʼa jtsʼeʼeltikon sok mi bʼa stiʼ jsatikon skoltunejotikon bʼa oj ajyuk tsamal jloʼiltikon» (Nicole).

Ja yoraʼil bʼa waʼel cha juni lekil sjutsʼinil bʼa loʼilanel.

«Yajni wanotikon waʼel ja bʼa ochkʼakʼu, wani xchʼak kaltikon ja jas lek sok ja jas mi lek ekujtikon ja bʼa kʼakʼuji. Yuja kʼajyelotikon skʼulajel ja it, wani xya ajyukotikon tsoman sok wa xya juljkʼujoltikon mini oj jtʼaspuntikon jtuchʼiltikon ja wokoliki» (Robin).

RASON BʼA BIBLIA: «Awibʼanalex jel tʼilan puestoxta oj ajyanik bʼa oja maklayex, pe mi wegoʼukxta oj kʼumananik» (Santiago 1:19).