Ja lekil modoʼaliki jani ja lekil rasonik wa xtojiyuj ja bʼa sakʼanil jun kristyano. ¿Wan maʼ xa kʼujolan ja weʼn bʼa mi oj ochuka kʼabʼ? Ta jachkʼa, sen ojni cha akʼujoluk bʼa jach oj kʼotuke jawa wuntikili.

Jun kristyano bʼa ayiʼoj lekil modoʼalik cha juni lekil aʼtijum, mi tsaʼubʼaluk ja maʼ lek wa xyila sok wa xkʼulwani respetar, ja tikʼe modoʼalik it masni pasil wa x-ajyikujtik ja yajni keremotikto.

RASON BʼA BIBLIA: «Chapa ja keremi ja bʼa bʼej oj yiʼi, pes yajni xjul skʼujoli mini oj spil sbʼaj ja bʼa bʼej it» (Proverbios 22:6).

Ja lekil modoʼaliki jelni tʼilan ja bʼa styempoʼil ja aparatoʼiki. Jun nanal sbʼiʼil Karyn wa xyala: «Soka aparatoʼiki, ja kuntikiltiki xiwelani sbʼaj bʼa oj ajyukesok jastik bʼa mi lekuk. Tini oj bʼobʼ ajyuke kulan bʼa jtsʼeʼeltik, sok jaxa bʼa jutsʼin jaw oj skʼeltalaʼuke jastik bʼa mi lekuk».

RASON BʼA BIBLIA: Ja «matik tsatsxa ja skʼuʼajeleʼi [...] wa xbʼobʼ yil-e ja stukil ja bʼa jas lek soka bʼa mi lekuki» (Hebreos 5:14).

Ja lekil modoʼaliki cha jelni tʼilan. Jun sjejel, jelni tʼilan yaljel «aʼawa pabor» sok «yajel tsʼakatal», sok sjejel wa xkisatik ja tuk, jun jasunuk bʼa mixani x-ilxi lek, pes ja kristyanoʼiki lajansok jaxa mas wajel skʼujole ja yaparatoʼe ke yuja smojeʼi.

RASON BʼA BIBLIA: «Kʼulanikyi ja tuk ja jastal waxa kʼanawex oj skʼulukawilex ja weʼnlexi» (Lucas 6:31).

Ala jaman lek ja modoʼik mi lek xa wila. Ja jas paklubʼali wa xchiktes ke mini pasiluk oj koʼuke mulal ja matik wanexa solteroʼaxeli ta kalunejtik jaman lek ja bʼa naʼitsi ke ja jaw mini lekuk yiljel.

RASON: Amakunuk jun notisya bʼa ajkʼachto bʼa yaljel ja modoʼalik lek xa wila. Jun sjejel, ta awabʼ jun notisya sbʼa jun mulal bʼa ilkʼujolanel, ojni bʼobʼa wal: «¡Jelxani tuka! ¿Jas yuj waxa kʼuʼan jach wa skʼulane jujuntik kristyano?».

«Bʼa jachuk ja untiki mas pasil oj yabʼye stsajel ja jas oj skʼulukeʼi, bʼajtan tʼilani oj snaʼe ja bʼa lek sok ja bʼa mi lekuki» (Brandon).

Jeʼayile lekil modoʼalik. Asta ja matik yal chʼineto wani xbʼobʼ snebʼe bʼa oj cham skʼujole ja tuki sok yaljel «awa pabor» sok «tsʼakatal». Ja libro Parenting Without Borders (Padres sin fronteras) wa xyala: «Yajni ja yal untik tey bʼa skʼujole ke mi kechan yeʼn kʼoteluke ja bʼa luʼumkʼinal it, wa xkʼan kaltik, ke kʼotele parte bʼa jun pamilya, bʼa jun eskuela, bʼa jun komon, masni puesto oj ajyuke bʼa skʼulajel jastik lek yuja tuki».

RASON: Ayi yaʼtel jawa wuntikili bʼa jachuk oj snebʼe ja stʼilanil bʼa skoltajel ja tuki.

«Ta jawa wuntikil xkʼajyiye skʼulajel jujuntik aʼtel ja bʼa wa naji, mini jel wokoluk oj yabʼye ja yajni stuchʼilxa ayeʼi. Yujni kʼajyelxa oj ajyuke skʼulajel ja yaʼteleʼi» (Tara).