SBʼAJA MATIK NUPANEL
1. Ja puesto ajyel lajan bʼa tolabida ja bʼa nupanel
¿JAS WA STOJOLAN?
Ja nupanumik bʼa meran puesto aye oj ajyuke lajan bʼa tolabida mini ekʼum bʼej ita wa xyilawe ja snupanele, sok ja it wa xkoltani bʼa oj sjip skʼujol sbʼaje. Xchawanile aye lek seguro bʼa ojni ajyuke lajan chikan jas x-ekʼi.
Jujuntik nupanum lajanto aye yuja wa xtʼenjiye yuja spamilyaʼe sok ja yamigoʼe. Pe mastoni lek ta ja jastal puesto aye oj ajyuke lajani jani yuja wa skʼana sbʼaje sok wa skʼulan sbʼaje respetar.
RASON BʼA BIBLIA: «Jaxa tatamali mokni yakan ja xcheʼumi» (1 Corintios 7:11).
«Ja puesto oj ajyukotik bʼa ajyel lajan wani skoltayotik bʼa mi wegoxta oj tajkukotik. Cha wani xkoltani bʼa mi wokoluk oj kabʼtik akʼwanel perdon sok skʼanjel perdon, sok mi oj kiltik chaʼanyabʼal ja wokoliki, bʼa jachuk mi oj ilxuk jastal modoʼik bʼa spiljel jbʼajtik» (Micah).
¿JAS YUJ JEL TʼILAN?
Ta ja nupanumik mi puesto ayuke bʼa oj ajyuke bʼa tolabida, bʼobʼta ja yajni stʼaspune wokolik oj spensaraʼuke mi juneʼukta kʼotele sok oj sleʼe modo oj skʼuts-e ja snupanele.
«Jitsan kristyano wa xnupaniye spensarajel ta mi lek wajyujile ja bʼa snupanele, kechani oj skʼuts-e. Ta nupaniya spensarajel bʼa oj cha bʼobʼa kʼutse, yujni mi akʼana bʼa puesto ajyel bʼa tolabida» (Jean).
¿JAS OJ BʼOBʼA KʼULUK?
PAKLA ABʼAJ
¿Jastal xa wabʼ ja yajni wala kʼesok kʼumal jawa nupi?
-
¿Wan maʼ xa naʼa malaya yuja nupaniya?
-
¿Wan maʼ xa pensaran jastal ay jawa sakʼanil lek yuj nupaniyasok pilan kristyano?
-
¿Wan maʼ xa wala yaljelik jastal «oj kaʼakani» ma «oj jleʼ june maʼ oj skis-on meran»?
Ta ajakʼa wan bʼa june ma bʼa tuk sjobʼjelik it, jani ja sjutsʼinil bʼa yajel tsatsbʼuk ja puesto ajyel lajan bʼa tolabida.
BʼA LOʼILANEL SOKA WA NUPI
-
¿Yopijel maʼ ja jastal puesto ayotik bʼa ajyel lajan bʼa tolabida? Ta jachkʼa, ¿jas yuj?
-
¿Jas oj jkʼuluktik bʼa yajel tsatsbʼuk ja puesto ajyel lajan bʼa tolabida?
JA JAS OJ BʼOBʼA KʼULUK
-
Bʼa ekʼeleʼik tsʼijbʼanyi notaʼik jawa nupi bʼa oja jeyi janekʼto waxa kʼana.
-
Aʼajyukawuj spotoʼik jawa nup ja bʼa wala aʼtiji.
-
Kʼuman kada kʼakʼu jawa nupi yajni tey bʼa yaʼtel ma yajni mi lajan ayukex yuj tuk rason.
RASON BʼA BIBLIA: «Ja jas yaʼunej staʼ sbʼaj ja Dyosi, mokni spil mini jun winik» (Mateo 19:6).
