Ja cholumaniki wa xcholowe ja sakʼanile

Staʼa stojolil ja sakʼanili

Ja Jesús wa xyala wa snaʼa sbʼaja xchejiki (Juan 10:14). Ta jun kristyano ay jun lekil skʼujol, wa syajtay ja lamanili sok ja bʼa toji, ojni nikjuk bʼa oj mojxuk soka snochumanik ja Jesús. Ojni staʼ stojol ja sakʼanili jastalni ekʼ sbʼaj jun ixuk bʼa Bélgica. Ja it ja jas ekʼ sbʼaji:

«Yajni ja testigoʼik bʼa Jyoba skʼumanone ja bʼa jpuerta, jelni triste ayon sok wa xpensaraʼan oj jmil jbʼaj. Jelni jkʼulan gusto ja yalwekabʼ ja jastal oj tojbʼuk ja wokolik ja bʼa luʼumkʼinali, pe mini lek kabʼi yuja kechanta yeʼn wa xbʼobʼ skʼuluk ja Dyosi. Ayxa waxake jabʼil kaʼunejkan ja iglesya, pes wa xkilkʼujolan ja jastal chabʼ kara ayeʼi. Pe, kʼot jnaʼ ja smeranil yalwekabʼ ja Testigoʼiki sok kabʼ stojol wokolni ajyel sakʼan ta mi tey jmoktik ja Dyosi.

«Kʼe yulatayone jujuntik ekʼele ja Testigoʼik, pe tsaʼan mixani bʼobʼ staʼone kʼumajel. K’e kabʼ mixa la makuniyon. Wa xkabʼan chabʼ yal kajaʼik may ja bʼa kʼakʼu, asta kʼe kabʼ droga. Ja kʼankʼunel kiʼoj bʼa loʼilanel soka cham jtatawelo yiʼajon och bʼa xchʼikjel jbʼaj ja bʼa espiritismo. ¡Jelni xiwela sbʼaj ja jas yijankiʼi! Yajni jtuchʼil ayon ja bʼa akwali, wa xkabʼ wa xjak yixtalaʼukon ja pukujiki. Sok jachni ekʼ bʼa jitsan ixaw. Yajni wa x-och ja akwali jelni la xiwyon spensarajel jtuchʼil oj ajyukon.

«Jun kʼakʼu yajni elyon paxyali mixani ti ekʼyon ja bʼa kʼajyel wala ekʼyoni, sok ti kʼotyon bʼa jun lugar wan kʼeʼel jun niwan naʼits. Jelni cham kila ja jitsan kristyano wane aʼteli. Yajni mojxiyon ochi, kila jani ja testigoʼik bʼa Jyoba bʼa wane yajel kʼeʼuk jun Naʼits bʼa Tsomjelal. Juljkʼujol ja wa xyulatayone ajyiʼi, sok jpensaraʼan jelni ma tsamal lekbʼi yibʼanal ja luʼum kʼinali jachuke jastal yeʼnle.

«Jelni xkʼana oj cha waj yulatayone, ja yuj wa jtaʼ loʼil jujuntik ja maʼ wane aʼtel ja bʼa Naʼits bʼa Tsomjelal. Kayi orasyon ja Dyos, sok lajune kʼakʼu ekʼi ja choluman maʼ jta’a loʼil sbʼajtanil ekʼele cha waj yulatayon b’a jnaj. Yalakabʼ oj cha kʼe jtulyi ja kestudio, sok jelni lek kabʼi. Wegoxta slokowon ja reunionik ja bʼa Naʼits bʼa Tsomjelal, sok kalani oj wajkon. ¡Mini bʼa kilunej jachuka! Man kʼot jtaʼ ja kristyanoʼik bʼa ayxa tyempo wanon slejel bʼa gusto aye sok wa syajtay sbʼaje.

«Man tyempo jaw kʼe ochkon bʼa spetsanil ja reunionʼiki. Oxe semana tsaʼan kaʼakan yabʼjel may. Jipa-el ja jlibroʼik bʼa skʼintajel ja kʼanal sok ja jdiskoʼik bʼa ay yiʼoj kʼinik bʼa Satanás, sok kabʼ mixa xyixtalanon ja pukijiki. Ki’aj jun jsakʼanil jastalni yaʼunej kujlajukan ja Jyoba ja bʼa Biblia, sok oxe ixaw tsaʼan kʼe elkon xcholjel ja lekil rasoni. B’a wake ixaw kiʼaj jaʼ, sok chabʼ kʼakʼu tsaʼan ochyon precursora auxiliar.

«Jel xkayi tsʼakatal ja Jyoba yuj spetsanil ja jas skʼulunejkiʼi. Man staʼa stojolil ja jsakʼanili. Ja sbʼiʼil ja Jyoba jach jastal jun yijil naʼits bʼa jtaʼa jkoltajel sok jtalnajel (Proverbios 18:10). Jachni wa xkabʼ jastal ja salmista bʼa stsʼijbʼan: ‹¡Jun kʼakʼu ja bʼa wa patyoʼik mas lek yuj mil kʼakʼu bʼa chikan jas lugar! Ja keʼn jtsaʼunej ajyel tekʼan ja bʼa stiʼ snaj ja jDyosi yuja ajyel ja bʼa snajtsilik ja bʼa mi lekuk›».

Ja ixuk it bʼa ay yiʼoj jun lekil skʼujol staʼa stojolil ja sakʼanili. Cha ojni staʼ chikan jas kristyano ta wa sleʼa ja Jyoba sok jun lekil skʼujol.