Sjobʼjelik yiʼoje ja matik wa skʼumani

¿Matik kʼotel ja jas staʼa tiʼal ja Pablo ja bʼa 2 Corintios 6:14 yajni ya makunuk ja yaljel «matik mi kʼuʼumanuke»?

Ja bʼa 2 Corintios 6:14 wa xyala: «Mok ochanik soka matik mi kʼuʼumanuke bʼa junxta yuko mi slaja sbʼaj». Ja jas wan stajel tiʼal ja Pablo wani xchiktes jaman lek ke jani wan yaljel sbʼaja matik mi teyuke ja bʼa kongregasyon. Ja tuk bersikuloʼik bʼa ya makunuk ja jekabʼanum ja yaljelik «maʼ mi kʼuʼumanuk» ma «matik mi kʼuʼumanuke» akuerdo ay soka xcholjel it.

Jun sjejel, ja Pablo stojo ja nebʼumanik yuja wa xyiʼaje och ja yermanoʼe bʼa stiʼ sat juesik bʼa «matik mi kʼuʼumanuke» (1 Corintios 6:6). Ja yeʼnleʼi jani kʼotele ja juesik bʼa Corinto. Ja bʼa xchabʼil skarta, ja Pablo xchiktes ke ja Satanás ‹smakunejyi ja spensare ja matik mi kʼuʼumanukeʼi›, sok ja yuj mi xyilawe ja lekil rasoni. Ja kristyanoʼik it mi sjeʼuneje ke wa skʼanawe yaʼteltajel ja Jyoba, pes ja jekabʼanum xcholo ja bʼa bersikuloʼik bʼajtanto: «Yajni ay maʼ wa xkumxi soka Jyoba, wani x-el ja kʼuʼutsi» (2 Corintios 3:16; 4:4).

Jujuntik matik mi kʼuʼumanuke wa skʼulane bʼa malo ma wa stoyowe kʼulubʼal dyos (2 Corintios 6:15, 16). Pe mini spetsaniluke wa xyilawe kontra ja yaʼtijumik ja Jyoba. Ayni jujuntik wa skʼanawe oj snebʼe ja smeranili. Tuk nupanele sok kʼuʼumanik Dyos sok mi xjipwaniyekani (1 Corintios 7:12-14; 10:27; 14:22-25; 1 Pedro 3:1, 2). Pe ja Pablo tikʼanxta ya makunuk ja yaljel «mi kʼuʼumanuk», sok jastalni alxita ja bʼa skʼeʼulabʼil, jani wan stajel tiʼal ja matik mi teyuke ja bʼa kongregasyon bʼa «matik wa skʼuʼane ja Kajwaltiki» (Hechos 2:41; 5:14; 8:12, 13).

Ja rason wa xtax bʼa 2 Corintios 6:14 kʼotel jun tsamal tojelal sbʼaja snochumanik Kristo bʼa chikan jas ekʼele, sok masni tikʼan wa x-axi makunuk jastal jun lekil rason sbʼaja matik wa skʼanawe oj nupanuki (Mateo 19:4-6). Ja maʼ yatayi ja sakʼanil ja Jyoba sok yiʼajta jaʼ ojni ya makunuk ja sbiboʼil sok mi oj sleʼ jun snup bʼa mi kʼuʼumanuk, yujni ja smodo, ja skʼelsati sok ja jas wa skʼuʼani tukni lek yuja bʼa jun meran snochuman Kristo.

Pe ¿jasa wa xbʼobʼ kaltik sbʼaja matik wane yijel estudio sok wa smojtaye ja kongregasyon? ¿Sok jaxa matik mito yiʼunejuke jaʼi? ¿Cha kʼotele maʼ mi kʼuʼumanuke? Miyuk. Ja matik skʼulaneta aseptar ja smeranil sbʼaja lekil rasoni sok jel wego wane snebʼjel bʼa jachuk oj yiʼe jaʼ mini xbʼobʼ kaltik yabʼye ke mi kʼuʼumanuke (Romanos 10:10; 2 Corintios 4:13). Bʼajtanto oj yiʼ jaʼ, ja Cornelio wa xnaji sbʼaj jastal jun «winik wa stoyo sok wa xiwyuj ja Dyosi» (Hechos 10:2).

Yuja 2 Corintios 6:14 mito skʼulan aplikar ja matik mito yiʼunejuk jaʼi, ¿lek maʼ jun kʼuʼuman Dyos oj smakbʼenuk sok oj nupanuksok? Miyuk. ¿Jas yuj? Jani yuja rason yaʼa ja Pablo sbʼaja biudaʼik kʼuʼumane Dyosi. Ja yeʼn stsʼijbʼan: «Librexani ay bʼa oj nupanuksok chikan maʼ wa skʼana, pe kechansok jun snebʼuman ja Kajwaltiki» (1 Corintios 7:39). Soka jas wa xyala ja rason it, wani x-aljiyabʼye ja matik yiʼunejxa jaʼ bʼa kechan oj nupanukesok ja matik kʼotel «snebʼuman ja Kajwaltiki».

¿Jasa wa stojolan ja yaljel «bʼa Kajwaltik» sok ja yaljel «bʼa Kristo»? Ja bʼa Romanos 16:8-10 sok Colosenses 4:7, ja Pablo wa staʼa tiʼal bʼa kristyanoʼik matik teye «bʼa Kristo» ma «bʼa Kajwaltik». Yajni wa xkʼumantik ja bersikuloʼik jaw, wa xkilatik ke ja yeʼnle kʼotele ‹smoj aʼtel›, ‹lek ilubʼale›, ‹ja hermanoʼik matik jel xyajtajiye›, ‹tojil aʼtijumik› sok ‹smoj mosoʼilik›.

¿Jas tyempo wa xpax june «mosoʼil bʼa Kajwaltik»? Jani yajni wa skʼulan gusto lek ja jas tʼilan oj skʼul jun mosoʼal sok mixa x-ajyi sakʼan bʼa yeʼna. Ja Jesús wa xcholo: «Ta ay maʼ wa skʼana oj snochon, mokxa ajyuk sakʼan bʼa yeʼna, ayiʼ ja sposte bʼa yijel wokoli sok a-snochon» (Mateo 16:24). Ja yeʼn wa xkʼe snoch ja Kristo sok wa xyaʼa sbʼaj kʼuʼabʼal ja jas wa skʼana ja Dyos yajni wa xyayi ja sakʼanil ja Dyosi. Tsaʼan, wa xyiʼaj jaʼ sok wa xkʼot jun aʼtijum bʼa lek wa x-ilji yuja Jyoba Dyos. * Ja yuj, nupanel «kechansok jun snebʼuman ja Kajwaltiki» wa stojolan yijel june maʼ sjeʼunej ke kʼotel jun meran kʼuʼuman Dyos, «jun smoso ja Dyos [bʼa yaʼunejyi ja sakʼanil[ sok bʼa Kajwaltik Jesukristo» (Santiago 1:1).

Ja maʼ wan ajelyi estudio yuja testigoʼik bʼa Jyoba sok jel lek wan snebʼjel sbʼejni oj toyxuk. Pe ama jachuk, mitoni xyayi ja sakʼanil ja Jyoba sok mito skʼapa oj yiʼ jun sakʼanil bʼa oj yaʼteltay sok oj xchʼak sbʼaj. Wantoni stukbʼesel jastik tʼilan ja bʼa sakʼanili, sok aytoni skʼanayuj jujuntik bʼa jachuk oj bʼobʼ yayi ja sakʼanil ja Dyosi sok oj yiʼ jaʼ, bʼajtanto oj spensaraʼuk sbʼaja nupaneli.

¿Sbʼej maʼ jun kʼuʼuman Dyos oj kʼe smakbʼenuk june maʼ lajansok jel lek wan wajelyuj soka yestudio, sok wa spensaraʼan ojto smajla man xyiʼaj jaʼ sok ti oj nupanuksok? Miyuk. Jun estudiante bʼobʼta mini stojoluk jas yuj wa skʼana oj yiʼ estudio ta wa snaʼa ke oj nupanuksok jun kʼuʼuman Dyos ja yajni xyiʼaj jaʼi.

Ja jas mas wa x-ekʼi, jun estudiante kʼotel jun choluman mito yiʼojuk jaʼ bʼa jun tyempo bʼisubʼal, masan wa snebʼa lek ja janekʼ wa xbʼobʼyuji bʼa ojxa bʼobʼ yiʼ jaʼ. Ja yuj, ja rason akʼubʼal bʼa nupanel kechansok jun snebʼuman ja Kajwaltiki mini xjelxi. ¿Jaxa ta june ayxa sjabʼil bʼa oj nupanuk, ti kʼi bʼa jun pamilya kʼuʼuman Dyos, ayxa jabʼil tey ja bʼa kongregasyon sok mito yiʼunejuk jaʼ? Ta jach wa xtaxi, ¿jasa wa xtimjiyuj bʼa oj yayi ja sakʼanil ja Jyoba? ¿Jas yuj wa skʼulan dudar? ¿Ay maʼ yiʼoj dudaʼik? Ama mixa kʼoteluk june maʼ mi kʼuʼumanuk, mini xbʼobʼ alxuk ke kʼotelxa jastal ja matik teye «bʼa Kajwaltik».

Ja rason bʼa Pablo sbʼaja nupaneli sbʼajni jlekilaltik (Isaías 48:17). Yajni chawane wa skʼana oj nupanuke sok yaʼunejeyi ja sakʼanil ja Jyoba, ojni koltajuke bʼa yij oj ajyuk ja snupanele yuja lek wa xtaxye soka yeʼn. Junxtani ja smodoʼe sok ja skʼelsate, sok ja it wa xkoltani bʼa gusto lek oj ajyuke lajan. Chomajkil, yajni wala nupanitik «kechansok jun snebʼuman ja Kajwaltiki», wa xjeʼatik toj aytik soka Jyoba, sok wa xyijankitik slekilalik bʼa mi xchʼaki, pes ‹ja Dyosi toj wa sjeʼa sbʼajsok ja maʼ toj ayi› (Salmo 18:25).

[Nota]

[Poto]

‹Ja Dyosi toj wa sjeʼa sbʼajsok ja maʼ toj ayi›