YIBʼANAL ja bʼa yorasyonik ja yaʼtijum Dyos, jitsan wa spensarane ja mas tikʼan wa xkʼulaxi jani ja it sjeʼakan ja Jesús: ja jTatikon. Sok cha mini jel xyabʼye stojol. Miyon kristyano wa skʼulane junxta yaljelik kada kʼakʼu sok bʼa jitsan ekʼele wa skʼulane, pe mini tʼun spensarane ja jas wa stojolani, ja Jesús mini yala ta jach oj skʼuluke. ¿Jas yuj wa xnaʼatik lek ja jaw?

Pes yujni ja bʼajtanto oj kʼe sjeʼi, ja yeʼn yala: «Yajni xa wayi orasyon, moka wal ja junxta yaljelik» (Mateo 6:7). Ja Jesús mini sjeʼa jastik mi stojoluk ja bʼa orasyon bʼa tʼilan oj kan jkʼujoltik sok oj alxuk ja junxta yaljeliki. Ja jasa skʼana oj sjeʼi jani ja jasa tʼilan oj skʼan-e ja bʼa orasyoni. Ja yuj, la kiltik ja sjejel yaʼa bʼa jastal yajelyi orasyon, wa xtax bʼa Mateo 6:9-13.

Ja Jesús ya julyi skʼujol ja snebʼumanik kechantani oj yaweyi orasyon ja sTat, Jyoba. Pe ¿jas yuj tsaʼan wa xyala tʼilan oj axuk sakbʼuk ja sbʼiʼili?

Pes yujni ja bʼa skʼeʼulabʼil ja kristyano, ja sbʼiʼil ja Dyos abʼaltanubʼalni. Ja kontraʼanum Satanás yalunejni ke ja Jyoba juni leʼa abʼal sok jelni malo sok mini ayiʼoj derecho yajel mandar ja skʼulbʼeniki (Génesis 3:1-6). Spetsanil ja matik tey bʼa slado ja Satanás wa sjeʼawe ke ja Dyos mey yip, mi snaʼa jyajaltik, wa xya jtuptik jastik bʼa mi lekuk sok mi yeʼn skʼulan ja jastik junuki. Sok bʼa jujuntik Biblia skusuneje ja sbʼiʼili sok timwanele bʼa mi oj axuk makunuk.

Pe ja Biblia wa skʼapa ke ja Dyos ojxtani xchʼay snajel spetsanil ja jastik it (Ezequiel 39:7). Sok yajni skʼulan, ojni cha stojbʼes ja swokolik ja kristyano. ¿Jastal oj skʼuluk? Ja Jesús wa xcholo ja bʼa nochani.

Ja bʼa jtyempotik, ja jeʼumanik bʼa relijyon mini x-ochye akuerdo jasunkiluk ja sGobyerno ja Dyos. Mini jachukuk jastal ja bʼa styempo ja Jesús. Ja chonabʼ judío wani snaʼawe lek jastik tsʼijbʼunubʼal wa xyala sbʼaja Mesiasi, ja jKoltanumtik stsaʼunej ja Dyos bʼa oj yaʼ ja smandaranel sok oj stojbʼes ja luʼumkʼinali (Isaías 9:6, 7; Daniel 2:44). Ja mandaranum it yeʼnani ja maʼ oj ya sakbʼuk ja sbʼiʼil ja Jyoba, bʼa oj ya chiknajuk ja abʼalik bʼa Satanás, oj xchʼay snajel sok jachuk bʼa yibʼanal ja yaʼteli. Cha oj xchʼay snajel ja guerra, ja chameli, ja waʼin sok ja chamelali (Salmo 46:9; 72:12-16; Isaías 25:8; 33:24). Ja yuj kada ekʼel wa xkʼanatikyi ja Dyos ajakuk ja sGobyerno, wantikni skʼanjel akʼotuk ja kʼapjelalik it.

Ja yaljelik it wa skʼapa ja jasa wa skʼana oj skʼuluk ja Dyos ja bʼa Luʼum ojni kʼotuk, jastalni kʼulaxita ja bʼa satkʼinal ja bʼa slugar ja Dyosi, yajni ja Yunin skʼulan ganar ja Satanás soka skʼakʼanumik sok jipjiyekoʼ bʼa Luʼum (Apocalipsis 12:9-12). Ja bʼa yoxil skʼanjel it, wa sjeʼakitik ja stʼilanil oj waj kʼujoltik ja jas wa skʼana ja Dyos sok mi jaʼuk ja jbʼajtiki. Pes yujni ja jas wa skʼana jani tolabida wa x-ijijanyi slekilal yibʼanal ja skʼulbʼeni. Ama ja Jesús jelni toj, yala:«Pe mok kʼulaxuk ja jas wa xkʼana, jani ja jas waxa kʼana» (Lucas 22:42).

Ja Jesús cha yala jujuntik ekʼele ja bʼa orasyoni ojni bʼobʼ kaltik ja jas mero wa xkʼanatiki. Jastalni wa xkilatik mini ay smaloʼil yaljel yabʼ ja Dyos bʼa orasyon ja oj skoltayotik yajelkitik ja jas wa xmakunikujtik bʼa kada kʼakʼu. Skʼulajel ja it, wantikni snajel ke ja Jyoba yeʼnani ja maʼ «wa xyayi yibʼanal ja kristyano sakʼanil, ikʼ sok yibʼanal ja jastik junuki» (Hechos 17:25). Ja Biblia wa xyaʼ slaj jastal jun tatal bʼa jel xyajtani bʼa wa xyayi ja yuntikil ja jas wa xmakuniyujileʼi. Chʼikani lek anima jel jas wa skʼanawe, pe mini oj yayi jun jasunuk bʼa oj yijan wokol ja bʼa sakʼanile.

¿Jas jelal kiʼojtik soka Jyoba? ¿Sok jas yuj wa xkʼanatik ayaʼotik perdon? Ama jitsan wa xyalawe ja mulali mixa ayuk, pe ja smeranili ja Biblia wa xcholo ke yuja mulali jani wa xyiʼajan wokoliki sok ja chamelali. Sok yuja man wala pojkitik mulanumotikxa, ja yuj wala kʼotik mulal bʼa wa xyajbʼestik ja Dyosi. Ja yujil, ta wa xkʼanatik ajyel sakʼan bʼa tolabida jelni tʼilan ayaʼotik perdon ja Dyos ja bʼa jelal it (Romanos 3:23; 5:12; 6:23). Ja Biblia wani xya jnatik ja Jyoba jel lek sok puesto ay bʼa oj yaʼotik perdon (Salmo 86:5).

Jastal kristyanoʼotik jelni xmakunikujtik ja stalnanel ja Dyosi. Bʼobʼta jitsan mini skʼuʼane ta sakʼan ay ja «maʼ jel malo» wa xkʼan alxuk ja Satanás. Pe bʼa yeʼn ja Jesús merani sakʼan ay, ja yuj ya sbʼiʼiluk «ja yajwalil ja luʼumkʼinali it» (Juan 12:31; 16:11). Ja Satanás mini malanta xyabʼ ja jastal bʼobʼel sjom ja luʼumkʼinali, cha wani skʼana oj sjom ja jastal wa xkila jbʼajtik sok ja kala Tatik Jyoba (1 Pedro 5:8). Pe mini ay rason b’a xiwkotik, yujni ja Dyos mas jel ja yip sok wani skʼan oj stalnay ja ma’ wa xyajtajiyuji.

Pe cha ayni tuk jasunuk b’a oj kʼantikyi ja Dyos b’a orasyon. Ja b’a 1 Juan 5:14 wani xyala ja jasunuk jaw yajni yala: «Wani xbʼobʼ jkʼantikyi chikan jasa bʼa akuerdo ay soka jas wa skʼana sok jaxa yeʼni wani smaklayotik». Bʼa tuk yaljelik, ojni bʼobʼ kaltikyabʼ ja Dyos yibʼanal ja jas wa xcham jkʼujoltik sok wani xnaʼatik mini oj yil mey stojolil ja jas wa xkʼanatiki (1 Pedro 5:7).

¿Sok jasa wa xbʼobʼ alxuk ja bʼa jas tyempoʼil sok bʼa lugar oj katikyi ja orasyon? ¿Wan maʼ xyala ja Yabʼal ja Dyos sbʼaja it? Ja sjobʼjel it oj katikyi sjakʼjel ja bʼa artikulo ti jakumi.