JA BʼA sutanal ja luʼumi, bʼa yibʼanal ja kultura sok ja relijyonik ja kristyano wani xyaweyi orasyon. Wa skʼulane bʼa tuktukil lugar jastal bʼa iglesyaʼik, temploʼik, sinagogaʼik, mezquita’ik, santuario’ik. Sok yajni wa skʼulane wa xyawe makunuk jujuntik jasunuk jastal alfombraʼik, rosarioʼik, ruedaʼik bʼa orasyon, simboloʼik, libroʼik bʼa orasyon ma yal tablaʼik bʼa tsijbʼunubʼal, sok cilindroʼik bʼa orasyon, ja yuj anima stuchʼile ma ay jas wa xyawe makunuk pe yibʼanale wani xyaweyi orasyon.

Ja orasyon wani xya tukbʼuk lek ja kristyano yuja tuk sakʼanil ja bʼa luʼumi. Jastalni ja chanteʼiki, wa xmakunikujtik waʼelal, jaʼ sok ikʼ. Cha wani la pojkitik, wala kʼitik sok wala chamtik (Eclesiastés 3:19). Pe kechantani ja kristyanoʼik wa xyaweyi orasyon. ¿Jas yuj?

Yujni wa xmakunikujtik jpetsaniltik. Ja orasyon juni modo bʼa ochel loʼil soka Dyos ke ja kristyanoʼik wa xyilawe jun jasunuk jel chaʼanyabʼal sok bʼa tolabida. Jastalni wa xyala ja Biblia, kʼulajitikni yuja kʼankʼunelik jawi (Eclesiastés 3:11). Ja Jesús yala: «Jel gusto wa x-ajyiye ja matik tʼabʼan skʼujole bʼa tʼilan oj snebʼ-e sbʼaja Dyosi» (Mateo 5:3).

Kechantani ja yajelyi stʼilanil snebʼjel sbʼaja Dyos wa xchiktes ja temploʼik, ja jastik wa xyawe makunuk sok ja janekʼ ora wa spilawe bʼa yajelyi orasyon. Meran, jitsan kristyano wa sleʼawe skoltajel bʼa yeʼnle ma sok tuk kristyano bʼa snebʼjel sbʼaja Dyosi. Pe ¿mi maʼ meranuk bʼa yeʼnle ayta jun stikʼanil snebʼjel sbʼaja Dyosi? Jastal kristyanoʼik jelni yaʼawotik, tʼusanta tyempo wala ajyitik sakʼan sok mini jelxta jas xlajxikujtik skʼulajel. Ja yuj kechantani june ma’ sak’an b’a tolabida, jel bibo sok jel yip’ wa xbʼobʼ yakitik ja jasa wa xmakunikujtiki. Pe ¿jastik junuk ja bʼa snebʼjel sbʼaja Dyos wa snikawotik bʼa yajelyi orasyon?

Jun sjejel, ¿ay maʼ bʼa ataʼunej sjobʼjelik bʼa mi maʼ bʼobʼ yawi tojelal, rasonik ma ja sjakʼjelik wa xmakuniwuji? Ja bʼa ekʼeleʼik jel wokol, jastal yajni ay maʼ wa xchamkujtik, yajni ay jas waxa tsaʼa skʼulajel jel tʼilan ma bʼobʼta yajni ojxa akʼul jun jasunuk bʼa mi lekuk, ¿ay maʼ bʼa awabʼunej mi malanuk ja jastal aji kulana kʼujol, ja tojelal ma ja jastal ajiya perdoni?

Pes ja Biblia bʼa wani xya jipjkʼujoltik sbʼaja jastik it, wani xchiktes ke ja orasyon wani xbʼobʼ xyakitik ja jas wa xmakunikujtiki. Sok cha ayni yiʼoj jitsan orasyon bʼa ixuk winik toj wajye bʼa skʼanawe ajel kʼulan skʼujole, tojelal sok skʼanjel perdon, cha jachuk ja sjakʼjelik ja bʼa sjobʼjelik jel wokoli (Salmo 23:3; 71:21; Daniel 9:4, 5, 19; Habacuc 1:3).

Yibʼanal ja orasyonik it ayni yiʼoje jun jasunuk ti chʼikan. Pes ja matik skʼulane wani snaʼawe jun jasunuk jel tʼilan bʼa oj maklajuke, jun jasunuk mixa xyawe makunuk ja bʼa jtyempotiki: bʼa wani snaʼawe maʼ oj yaweyi ja yorasyone.