MINI ay duda, ja it jani june ja sjobʼjel mas wa skʼanawe oj snaʼe ja kristyano. Kilatikta ke ja Dyos wa smaklay ja orasyon, pe mini yibʼanaluk. Anto, ¿oj maʼ smaklay ja jbʼajtiki? Wani skʼana keʼntik oj kʼujoluktik.

Ja Jesús yala mi stojoluk ja jastal chabʼ kara aye ja olomalik bʼa relijyon yajni wa xyaweyi orasyon: kechantani wa xwaj skʼujole oj iljuke jel toje. Cha yala ke ja yeʼnle ayxani yiʼoje «yibʼanal ja stsʼakoleʼi». Ja kristyanoʼik jaw mini skʼanawe oj maklajuke yuja Dyos, jaʼitani wa skʼanawe oj kisjuke yuja kristyano, ja yuj jaʼitani jaw ja oj ajyukyujileʼi (Mateo 6:5). Jachni junxtatik wa x-ekʼ ja bʼa jtyempotiki. Jitsan kristyano mi spensarane bʼa Dyos yajni wa xyaweyi orasyoni, kechantani bʼa yeʼnle wa spensaraʼane. Sok yuja mi snochowe ja rasonik bʼa Biblia ke kilatikta ja bʼa artikulo ekʼta, mini xmaklajiye.

¿Jaxa keʼntiki? Bʼa oj sjakʼ ja korasyontik ja Jyoba, mini tʼilan oj ajyukotik bʼa junta raza, bʼa jun chonabʼ ma ajyelkujtik jun tikʼe cholal. Ja Biblia wa xyala ke ja «Dyosi mini june maʼ menos wa xyila». Jaʼuktoma, «wani skʼulan aseptar ja matik wa xiwyeyuj sok wa skʼulane ja bʼa jas leki, chikan bʼa xchonabʼeʼa» (Hechos 10:34, 35). Ja yujil, ja kristyano ‹wa xiwyuj ja Dyos› jelni skisa bʼa mi skʼulan jas bʼa mi lek xyila. Sok ja matik «wa skʼulane ja bʼa jas leki» wani skʼujolane skʼulajel ja jas wa skʼana ja Jyoba, mini jaʼukta ja jas wa skʼana ja yeʼnle ma ja tuk kristyanoʼiki. Ja yuj, ta wa xkʼanatik oj smaklay ja Jyoba ja korasyontiki, tʼilani oj nochtik ja tojelal wa xyaʼa ja Yabʼali. *

Jitsan kristyano wa smajlaye ke ja Dyos oj sjakʼ ja yorasyone sok jun milagro. Pe ja bʼa tyempo najate jujuntiktani ekʼele sjakʼa sok milagroʼik. Ja bʼa loʼilik bʼa Biblia, ay milagroʼik yiʼoj sbʼaj sigloʼik ja ti wa xcha ekʼ pilan milagroʼi. Chomajkil, ja Biblia wa sjeʼa ke ja milagroʼik kʼot tikʼan yajni chamye ja nebʼumaniki (1 Corintios 13:8-10). Pe ja it mi wa stojolan ke ja Dyos mi sjakʼa ja orasyoniki. La kiltik jujuntik sjejel ja bʼa jtyempotik jastal wa sjakʼa ja Jyoba ja orasyoniki.

Wa xyaʼa biboʼil. Ja Dyos, bʼa yeʼnani yiʼoj yibʼanal ja meran biboʼili, wani xyaʼa jaman ja skʼujol yajelyi ja maʼ wa leʼa ja stojelal sok wa skʼujolane bʼa oj skʼuʼuke (Santiago 1:5).

Ja Dyos wa xyaʼa ja espíritu santo yiʼoji. Mini jas wa xbʼobʼ slaj sbʼajsok ja espíritu santo, ja it jani ja yip ja Dyos, ja yip bʼa ay jas wa xbʼobʼ skʼuluk. Wani xbʼobʼ skoltayotik kuchelkujtik ja prebaʼik, wa xyaʼakitik lamanil yajni chamkʼujol aytik sok wa skoltayotik ajyelkujtik lekil modoʼalik (Gálatas 5:22, 23). Sok ja Jesús cha skʼapa ke ja Dyos oj yakitik ja espíritu santo yiʼoj yajni wa xmakunikujtiki (Lucas 11:13).

Wa xyayi snajel ja matik wa sleʼawe ja smeranili. Jastalni wa xyala ja bʼa Hechos 17:26, 27, jitsan kristyano bʼa meran wa skʼanawe wane slejel ja Dyos. Wa skʼanawe oj snaʼe ja sbʼiʼili, ja jas wa skʼana oj skʼuluk ja bʼa Luʼumi, sok sbʼaja kristyanoʼik sok snajel jastal mojxel soka yeʼni (Santiago 4:8). Ja testigoʼik bʼa Jyoba tikʼanxta wa staʼawe kristyano jastal it sok gusto lek wa sjeʼaweyi ja sjakʼjelik wa xyaʼa Biblia ja bʼa sjobʼjelik yiʼojeʼi.

¿Ja maʼ yuja rason it yuja weʼn ajyi awuj ja rebista it? ¿Wana maʼ slejel ja Dyos? Ta jachuk, bʼobʼta ja it jaʼa jastal wan sjakʼjel jawa worasyoniki.