TʼUSAN mi yibʼanaluk ja relijyon ja bʼa luʼumkʼinali wa stojbʼese lugarik sok ayiʼoje jun mero yoraʼil bʼa yajelyi orasyon. Anto, ¿junxta maʼ jach wa sjeʼa skʼulajel ja Biblia?

Ja smeranil wani sjeʼa ay ekʼele bʼa jel lek yajelyi orasyon. Jun sjejel, ja Jesús yayi tsʼakatal ja Dyos bʼajtanto oj waʼuk (Lucas 22:17). Cha jachni ja snebʼumaniki wa xyaweyi orasyon kada ekʼele wa stsomo sbʼaje bʼa stoyjel ja Dyos. Pe ja it mi kʼoteluk jun yajkʼachil kostumbre. Wanxani skʼulane ja bʼa naʼitsik wa stsomo sbʼaje ja judíoʼik sok ja bʼa templo bʼa Jerusalén, bʼa wa skʼana ja Dyos akʼot jun «naʼits bʼa orasyon sbʼa yibʼanal ja chonabʼiki» (Marcos 11:17).

Ja yujil, ja Dyos wani skʼana ke ja yaʼtijumik a-skʼuluke reunionik, ayaweyi orasyon lajan bʼa junxta pensar sok ja jastalni wa xya’a ja rasonik bʼa Biblia. Chomajkil, ja orasyonik jaw ojni bʼobʼ nikjuke bʼa skʼulajel bʼa mini xbʼobʼ nikwanuk bʼa pilan modo (Hebreos 13:18, 19). Ja yuj, ja testigoʼik bʼa Jyoba wani xyaweyi orasyon ja bʼa sreunione. Ta ja weʼn waxa kʼana oja maklay ja yorasyoneʼi, ojni bʼobʼ wajan ja bʼa Naʼits bʼa wa Stsomo sbʼaje ja testigoʼik bʼa Jyoba mas mojana wiʼoji.

Pe ja Biblia mini sjeʼa ta kechan tʼilan yajelyi orasyon bʼa jun mero yoraʼil ma bʼa jun lugar. Ja bʼa yojoli wani xchiktes ke ja yaʼtijumik ja Dyos wani xyaweyi orasyon bʼa chikan jas ora sok lugar. Ja Jesús yala: «Yajni xa wayi orasyon, ochan bʼa wa kuarto, sok yajni alututa ja puerta, ayi orasyon jawa Tat mi xbʼobʼ ilxuki. Jaxa wa Tat ja maʼ kechan yeʼn wa xyilawa, oj stupawi» (Mateo 6:6).

¿Mi maʼ jelni tsamal xa wabʼ snajel ke wani xbʼobʼ katikyi orasyon ja maʼ jel Niwan ja bʼa sutsatkʼinali sok bʼa ojni smaklayotik ama chikan jas tyempo sok bʼa oj katikyi? Ja jaw wa xchiktes jas yuj ja Jesús ay ekʼele skʼana oj ajyuk stuchʼil bʼa yajelyi orasyon. Bʼa jun ekʼele, bʼajtanto oj stsaʼ skʼulajel jun jasunuk jel tʼilan, yayi orasyon snajtil akwal (Lucas 6:12, 13).

Pe cha ajyi tuk winike sok ixuke bʼa toj wajye ke yaweyi orasyon ja Dyos bʼajtanto oj stsaʼe skʼulajel jastik jel tʼilan ma yajni stʼaspune niwak wokol. Ay ekʼele yaweyi orasyon tsats ma chʼabʼan, bʼa kʼole ma stuchʼile, ja jas mas tʼilani eske skʼulane. Ja Jyoba yeʼni mismo wa xya juljkʼujoltik: «Tikʼanxta awikyi orasyon» (1 Tesalonicenses 5:17). ¿Mi maʼ juni lokuanel bʼa wa sjeʼa yajtanel? Ja Dyos wani skʼapa oj smaklay ja yaʼtijumik ja janekʼ ekʼele wa xmakuniyujileʼi.

Ja bʼa jtyempotik jitsan kristyano bʼa jel x-ajyi sdudaʼe wa sjobʼo sbʼaje ta meran wa skoltayotik ja orasyon. Bʼobʼta ja weʼn cha jach waxa jobʼo abʼaj.