JITSAN kristyano ay sdudaʼe ta wa xkoltani ja orasyoni. Pe ja Biblia mini jach wa sjeʼa (Lucas 22:40; Santiago 5:13). Ja orasyonik mini kechan wa skoltayotik sbʼaja jastik bʼa Dyosi, cha jachni ja bʼa jastal ay wa xkabʼtik sok ja bʼa jkuerpotiki. ¿Jastal wa xbʼobʼ ja it?

La katik jun sjejel: yajni jun yal untik wa x-ajiyile jun majtanal, ¿jasa wa x-aljiyabʼye yuja snantate tʼilan oj skʼuluke? Wani x-aljiyabʼye mi kechanta gusto oj kanuke: cha tʼilani oj yaʼe tsʼakatal yuja majtanali. Sok yajni wa xkatik tsʼakatal sok yaljelik, ja jastal ay wa xkabʼtik masni wa stsatsbʼi. Pes jachni junxta wa x-ekʼ yajni wa xkatikyi orasyon ja Dyos. La kiltik ja slekilalik wa tax ja yajelyi tuktukil tikʼe orasyon.

Ja orasyonik bʼa yajel tsʼakatal. Yajni wa xkatikyi tsʼakatal ja Dyos yuj yibʼanal ja jastik lek wa x-ekʼi, jani wa xwaj jkʼujoltik ja bʼa slekilalik wa x-ajikitiki. Sok masni wala kʼotik kristyanoʼik bʼa wa xyaʼa tsʼakatal, gusto sok bʼa mi xchʼayuj ja smajlajel (Filipenses 4:6).

Jun sjejel: Ja orasyon skʼulan ja Jesús bʼa yajelyi tsʼakatal ja sTat yuja wa xmaklaji (Juan 11:41).

Ja orasyonik bʼa skʼanjel perdon. Skʼanjelyi ja Dyos ayaʼotik perdon wa xya lamxuk ja jastal jel mulal wa xkabʼ aytiki. Chomajkil, wa skʼajtes ja jconcienciatik, pes masni wa xya kaʼ tʼabʼan jkʼujoltik ja janekʼto sniwanil ja mulali sok masni wa xya kabʼtik wa xnaʼatik malaya.

Jun sjejel: Ja orasyon skʼulan ja David yajni snaʼa malaya (Salmo 51).

Ja orasyonik bʼa skʼanjel tojelal sok biboʼil. Masni chʼin wa xya ajyukotik, yujni wa xya juljkʼujoltik ja stikʼanil kiʼojtik sok wa skoltayotik sjipjel jkʼujoltik ja jTatik bʼa satkʼinal, sok mi bʼa keʼntikta (Proverbios 3:5, 6).

Jun sjejel: Ja orasyon skʼulan ja Salomón bʼa skʼanayi ja Dyos atojuk sok aʼajukyi biboʼil bʼa oj yaʼ mandar ja bʼa Israel (1 Reyes 3:5-12).

Ja orasyonik yajni wan ekʼel wokol. Yajni ay jas jel xcham jkʼujoltik, mini ay pilan jasunuk mas wa xya ajyukotik laman ke yuja sjamjelyi ja jkʼujoltik ja Dyos. Cha wani xnebʼatik slejel jkoltajeltik bʼa Jyoba (Salmo 62:8).

Jun sjejel: Ja orasyon skʼulan ja rey Asá bʼa stiʼ sat jun nole kontraʼanumik jel yipe (2 Crónicas 14:11).

Ja orasyonik sbʼaj matik wa skʼanawe skoltajel. Jachuk wa xkʼulantiksok luchar ja keʼnta wa xleʼatik jlekilaltik sok wa x-ajyikujtik modoʼalik jastal ja snajel yajulal sok ja yabʼjel stojol.

Jun sjejel: Ja orasyon skʼulan ja Jesús sbʼaja snebʼumaniki (Juan 17:9-17).

Ja orasyonik bʼa toyjelal. Ja kiswanel kiʼojtik sok ja yajtanel bʼa Jyoba wa xkʼi mas yajni wa xtoyotik ja smodoʼiki sok ja tsamalik yaʼteli. Ja orasyonik it cha wa xya mojxukotik mas soka jTatik Dyos bʼa satkʼinali.

Jun sjejel: Ja orasyon skʼulan ja David bʼa yajxta stoyo ja skʼulbʼenik ja Dyosi (Salmo 8).

Pe ja lista bʼa slekilalik mi ti wa xchʼaki: stsʼakatal yuja orasyon, wani x-ajyikujtik ja «slamanil ja Dyos, bʼa masto ekʼxel lek yuja janekʼ wa xbʼobʼ yabʼ stojol jun kristyano» (Filipenses 4:7). Mini ay duda, ajyelkujtik ja lamanil ja bʼa luʼumkʼinal it juni jasunuk jel chaʼanyabʼal. ¡Asta jelni lek ja bʼa jkuerpotiki! (Proverbios 14:30). Pe ¿jastal wa x-ajyikujtik ja lamanil jaw? ¿Wa maʼ xbʼobʼ ajyukujtik stsʼakatal yuja janekʼ wa xkʼujolantik, ma ayto jas tʼilan wa skʼana?