Ja Tsamal Lugar sok ja weʼni

Jitsan kristyano mi skʼuʼane ja loʼil bʼa tsamal lugar bʼa Edén, yujni wa xyalawe ke ja bʼa tuk libroʼik yiʼoj ja Biblia mixa staʼa tiʼal sbʼaja jaw. Jun maestro bʼa wa spaklay ja relijyonik sbʼiʼil Paul Morris stsʼijbʼan: «Mixani ay tuk teksto bʼa wa staʼa tiʼal ja tsamal lugar bʼa Edén». Bʼobʼta jitsan matik jel chapan wa skʼuʼane ja pensarik jaw, pe ja smeranili tukni lek ja jastal wa sjeʼa ja bʼa loʼil jaw.

Ja smeranili ja Biblia jelni staʼa tiʼal ja Adán, ja Eva, ja bʼitsʼbʼichan sok ja tsamal lugar bʼa Edén. * Pe ja pensarik mi stojoluk yiʼoje jujuntik matik jel chapan, mini tʼun oj slaj ta katik slaj sbʼajsok june bʼa mas jel chaʼan mulal sok xiwela sbʼaj. Jani ja bʼa jas wa xyalawe jujuntik olomalik bʼa relijyon, sok paklanumik bʼa Biblia ke ja Tsamal Lugar kechantani jun lom loʼil. ¿Jas yuj jach wa xkalatiki? Yujni soka jaw jani wane yiljel kontra ja Biblia.

Yabʼjel stojol ja jas ekʼ ja bʼa Edén, jelni tʼilan bʼa jachuk oj kabʼtik stojol ja bʼa tuk jastik yiʼoj ja Biblia. Jastalni oj kiltik ja jas ti nochani, ja Biblia wa xyayi sjakʼjel bʼa jujuntik sjobʼjel jel chaʼanyabʼalil sok tʼilan ja bʼa sakʼanili. Ja bʼa sjakʼjelik jaw tini chʼikan ja jas ekʼ ja bʼa Tsamal Lugari.

● ¿Jas yuj wala awelaxitik sok wala chamtik? Lek skʼuʼaneyi ja Jyoba ja Adán soka Eva ojni ajyuke sakʼan bʼa tolabida ajyi. Pe ja kʼakʼu skʼokoweyi ja smandari ajyiyujile ja mulali sok kʼe chamuke (Génesis 2:16, 17; 3:19). Ja yeʼnle yawe ekankitik ja wokolik sok ja mulali. Sbʼaja jaw, ja Biblia wa xchiktes ja it: «Yuj kechanta jun winik, ja mulali och ja bʼa luʼumkʼinali sok jaxa mulali yiʼajan ja chamelali, sok jach spuku sbʼaj ja chamelal bʼa yibʼanal ja kristyanoʼi, yujni yibʼanale staʼunej smule» (Romanos 5:12).

● ¿Jas yuj wa xyaʼakan ja Dyos aʼajyuk ja bʼa malo? Ja bʼa tsamal lugar bʼa Edén, ja Satanás sleʼayi smul ja Jyoba ke jun leʼa abʼal sok mi xyayi jastik lek ja skʼulbʼeniki (Génesis 3:3-5). Bʼa pilan yaljel, ja Satanás sleʼayi smul ja Jyoba ke mi snaʼa yajel mandar. Ja Adán soka Eva ti ajyiye bʼa sparte ja Dyablo sok mini skisawe ja cholal yiʼoj ja Jyoba, bʼa xchiktese ke ja kristyanoʼik ojni bʼobʼ stsaʼe ja bʼa lek sok ja bʼa mi lekuki. ¿Jastal sjakʼa ja Jyoba? Yajel makunuk ja biboʼil sok ja bʼa toji, stsaʼa mas lek oj yakan ke ja kristyanoʼik aya sbʼaje mandar stuchʼile bʼa jun tyempo. Ja jastik malo wa xtax ja bʼa luʼumkʼinal it bʼa tʼusan mi yibʼanaluk yeʼn wa xya ajyuk ja Satanás, yaʼunej chiknajuk lek ke ja kristyano mini xbʼobʼ ya sbʼaje mandar ta mi teyuk ja skoltanel ja Jyoba (Jeremías 10:23).

● ¿Jas yuj ja Dyos skʼulan ja Luʼumi? Ja tsamal lugar bʼa Edén, juni preba ke ja Dyos wa skʼana ja Luʼumi oj pax jun lugar jel tsamal juntiro. Ja Jyoba yayile ja cholal ja Adán soka Eva bʼa oj sbʼutʼ-e ja luʼum sok ayawe pax jun tsamal lugar bʼa sutanal ja luʼumi (Génesis 1:28). Ja yuj, ja jas wa skʼana ja Dyosi jani ke ja Luʼumi apax jun tsamal lugar, ja yintil ja Adán soka Eva achʼayujile ja mulali, aʼajyuke gusto sok tsoman. Tʼusan mi yibʼanaluk ja jas wa xtaʼatik ja bʼa Biblia, jani ti chʼikansok ja jastal oj ya kʼotuk ja jastik skʼapunej ja Dyosi.

● ¿Jas yuj jak ja Jesukristo ja bʼa Luʼumi? Yajni ajyi ja kʼoka abʼal ja bʼa tsamal lugar bʼa Edén, ja Adán soka Eva sok spetsanil ja yintil aljiyabʼye kechantani wa smajlaye ja xchamelale. Pe yuja syajal skʼujol ja Dyos, sjeka ja Yunin ja bʼa Luʼum bʼa oj yaʼ ja sakʼanil jastal slokʼol bʼa skoltajel ja kristyano (Mateo 20:28). ¿Jasa ti chʼikan ja bʼa slokʼol yaʼa? La ka juljkʼujoltik ja Jesús, ja bʼa Biblia wa xya sbʼiʼiluk ja último Adán tolabida kʼuʼabʼal wajsok ja Jyoba bʼa mini jas skʼulan ja bʼajtan winiki. Ja yuj mini chʼayuj ja tojil sakʼanil, yaʼa ja sakʼanil bʼa slokʼol yuja smul ja kristyano. Soka jas skʼulani yayi ja sakʼanil ja kristyano bʼa toj aye bʼa oj ajuke perdon yuja Dyosi sok cha jachuk ja bʼa tyempo ti jakumi oj ajukyile ja tikʼe sakʼanil ajyiyujile ja Adán soka Eva bʼajtanto oj koʼuke mulal (1 Corintios 15:22, 45; Juan 3:16). Ja yuj ja Jesús jak ja bʼa Luʼum bʼa oj sjeʼ ke ja jas wa skʼana oj skʼuluk ja Dyosi ojni kʼot smeranil. *

Jastalni wa xkilatik ja jas wa skʼana oj skʼuluk ja Dyos mini jun jasunuk bʼa jel wokol yabʼjel stojol sok bʼa nakʼan ay. Juni jasunuk bʼa meran sok pasil yabʼjel stojol. Ja tsamal lugar bʼa Edén, ja kristyano sok ja chanteʼik ja bʼa lugar tiw merani ajyi, ja yuj ja skʼapjelik bʼa Dyos ja bʼa tyempo jakumi ojni kʼot smeranil sok jelxani mojan. ¿Bʼa jasa ti chʼikan bʼa oj kiltik oj kʼot smeranil? Bʼa oj kiltik tini chʼikanotik ja keʼntiki. Ja Dyosi wani skʼana oj yawe el slekilal ja bʼa janekʼ kristyano xbʼobʼi, cha jachuk ja matik skʼulane jastik mi lekuki (1 Timoteo 2:3, 4). ¿Jastal wa xnaʼatik?

Yajni ojxta chamuk ja Jesús loʼlanisok june ja matik sleʼunej smul tey ja bʼa stsʼeʼeli. Ja winik jaw wani snaʼa ke wa sbʼajin oj chamuk, pe sleʼa ja Jesús bʼa oj ajuk kulan skʼujol sok smajlajel. Jaxa Kristo yala yabʼi: «Ti oj ajyan jmok ja bʼa Tsamal Lugari» (Lucas 23:43). Ta ja Jesús wa skʼana ke june maʼ sleʼunej smul oj bʼobʼ ajyuk sakʼan tolabida ja bʼa Tsamal Lugar bʼa Luʼumi, ¿mi maʼ sbʼejni spensarajel ke cha wani skʼana oj yakitik ja keʼntik ja jaw? Wani skʼanaʼa. Cha jachuk wa skʼana ja sTati. Ta ja weʼn waxa kʼana oj wa el slekilal ja skʼapjelik bʼa Dyos, moka wakan snebʼjel ja janekʼ oj bʼobʼukawuj sbʼaja Jyoba ja Kʼuluman ja bʼa tsamal lugar bʼa Edén.

[Notaʼik]

[Recuadro/Dibujoʼik]

JA JAS BʼAJTAN ALUBʼALKAN OJ EKʼUK

JA JASTAL WA SYAKA SBʼAJ JA JAS WA XYALA JA BIBLIA

«Ja keʼn oj ka wilabʼaj kontra ja weʼn [ja bʼitsʼbʼichani] sok ja ixuki, jawa wintili sok ja yintili. Ja yeʼn oj sbʼuy jawa wolomi jaxa weʼn oja yajbʼesyi ja stop yoki» (Génesis 3:15).

Jaʼa it ja jas bʼajtan yalakan ja Biblia, bʼa yeʼnani yala ja Dyos ja bʼa Edén. Pe ¿machunkiluk ja ixuki, ja bʼitsʼbʼichani sok ja yintileʼi? ¿Bʼa jasa «kontra» wa xyila sbʼaje?

JA BʼITSʼBʼICHANI

Satanás (Apocalipsis 12:9).

JA IXUKI

Jaʼa xchonabʼ ja Dyos tey bʼa satkʼinal, bʼa yeʼnleni ja yuntikil bʼa ikʼ ason aye (Gálatas 4:26, 27). Ja Isaías yalaxakan ke ja «ixuk» it oj ya pojkuk jun xchonabʼ ja Dyos (Isaías 54:1; 66:8).

JA YINTIL JA BʼITSʼBʼICHANI

Jaʼa matik wa stsaʼawe skʼulajel ja jas wa skʼana ja Dyablo (Juan 8:44).

JA YINTIL JA IXUKI

Yeʼnani mero ja Jesús, ja maʼ jak ja bʼa xchonabʼ ja Jyoba bʼa satkʼinali. Cha tini chʼikane ja yermanoʼik ja Kristo. Ja yeʼnle tsaʼubʼale bʼa oj yaʼe mandar soka Jesús bʼa satkʼinal sok yajel kʼot jun xchonabʼ, ja «Israel bʼa Dyosi» (Gálatas 3:16, 29; 6:16; Génesis 22:18).

JA SYAJBʼELAL JA BʼA STOP YOKI

Yajni ja Yunin ja Dyos ti ajyi ja bʼa Luʼumi, ja Satanás lajxiniyuj bʼa amiljuk. Yuja it jelni yiʼa wokol, pe mini albʼi, yujni cha sakʼwi.

JA SYAJBʼELAL JA BʼA YOLOMI

Ja Jesús ojni xchʼay-el bʼa tolabida ja Satanás. Pe bʼajtan, ojni stojbʼes ja wokolik yiʼojan ja Dyablo man ja bʼa Edén (1 Juan 3:8; Apocalipsis 20:10).

Ja poyeto Ja Bibliʼa: ¿jas rason yiʼojani?, yaʼuneje eluk ja testigoʼik bʼa Jyoba. Oja taʼ tʼusan xcholjel ja bʼa mero yolomajel yiʼoj ja Biblia.

[Poto]

Ja Adán soka Eva yiʼaje wokol yuja smul sleʼaweʼi