Ja Biblia stukbʼes ja sakʼanile

¿JASA nikjiyuj jun tajnum sok elkʼanum bʼa oj yakan ja tajnelik sok stukbʼesel ja sakʼanili? La katikan a-xchol kabʼtik.

«Jel xkʼulan gusto ja ajnelik sok kawuj» (RICHARD STEWART)

JA JABʼIL POJKI: 1965

PAÍS BʼA POJKI: JAMAICA

JA SAKʼANIL: JUN TAJNUM SOK ELKʼANUM

JA JSAKʼANIL AJYI: Ti kʼiyon bʼa jun lugar jel pobre sok jel naʼubʼal sbʼaj bʼa Kingston, bʼa kapital bʼa Jamaica, bʼa mey lek aʼtel sok jel ja chaʼanik mulalik. Ja kristyanoʼiki xiwelxta aye yuja milwanumik bʼa mini ay tʼun syajal skʼujole. Kada kʼakʼu wani x-abʼxi ay maʼ wa xtujkʼani.

Ja jnani jelni x-aʼtiji bʼa oj bʼobʼ smakʼlayotikon, ja keʼn soka kijtsʼiniki, jun yal kerem sok jun yal akʼix. Cha skʼujolani bʼa oj bʼobʼ ajyukujtikon jun lekil jchapjelaltikon. Pe ja keʼn jelni xkiʼaj gusto ja ajnel sok kawujik sok mi jaʼuk ja eskuela. Tikʼanxtani mi la ochyon ja bʼa eskuela bʼa ti wala wajyon ja bʼa wa x-ajni ja kawujiki. Asta kʼeyoni jujuntik ja bʼa kawujiki.

Mi ekʼ mas tyempo mixani xkaʼakan tajnel sok takʼin sok ajyelsok tuktukilxta ixuk. Cha kabʼani marihuana. Sok bʼa mi oj kakan ja tikʼe sakʼanil it, tʼilani elkʼaniyon, bʼa kʼot ajyukuj jitsan armaʼik. ¡Lekxta yuja mini maʼ jmila ja bʼa jitsan ekʼele elkʼaniyoni!

Man yamjiyon sok lutjiyon bʼa preso. Pe yajni elyoni, cha ke jkʼul yajkʼachil ekʼele. Mastoni peor wajyon. Lajansok jel lek jkʼeljel, pe ja smeranili jelni kaprechudoʼon, jel kʼakʼon sok jel maloʼon. Keʼntani wa xpensaraʼan jbʼaj.

JA BIBLIA STUKBʼES JA JSAKʼANILI: Ja bʼa tyempo jaw jel ipaxi ja jmodo, ja jnani kʼe skʼul estudiar ja Biblia sok och Testigo bʼa Jyoba. Ja jastal stukbʼes ja sakʼanili jelni spayawon. Wani xkʼana oj jnaʼ jasa akʼubʼal tukbʼuki, ja yuj kʼe loʼilanukonsok bʼa Biblia ja Testigoʼiki.

Wegoxta kila ke ja yeʼnle mini jach wa sjeʼawe jastal ja tuk relijyoniki sok tini wa xyawe el bʼa Biblia spetsanil ja jas wa xyalaweʼi. Kechani yeʼn wa xnaʼa sbʼaje wa xwajye bʼa naʼits naʼits bʼa wa xcholowe ja rason bʼa Biblia, jastalni skʼulane ja bʼajtan snochumanik Kristo (Mateo 28:19; Hechos 20:20). Ja jas ya jkʼuʼuk lek ke jani yiʼoje ja relijyon smeranili jani yuja yajxta wa xyila sbʼaje (Juan 13:35).

Yajni kʼe jkʼul estudiar ja Biblia, kabʼ stojol ke tʼilani jel jas oj jtukbʼes. Ja Jyoba Dyos wa xyilkʼujolan ja koʼel mulal sok ixuk winik, sok ta wa xkʼana oj ka gustoʼaxuk tʼilani oj kakan spetsanil ja jastik wa sjomo ja kuerpoʼali (2 Corintios 7:1; Hebreos 13:4). Jelni snikawon snajel ke ja Jyoba jachni wa xyabʼ jastal keʼntik, sok ja jas wa xkʼulani ojni bʼobʼ ya gustoʼaxuk ma oj bʼobʼ ya tristeʼaxuk (Proverbios 27:11). Ja yuj, jtsaʼa yajelkan ja marihuana, ja armaʼiki, sok jkʼujolan bʼa stojbʼesel ja jsakʼanili. Ja mas wokol kabʼi jani yajelkan ja ixukeʼi sok ja tajnel sok takʼin.

Ja bʼajtanto mini xkʼana ja kamigoʼik oj snaʼe ke wanonxa skʼulajel estudiar ja Biblia soka Testigoʼiki. Pe ja jmodo tukbʼi yajni jkʼuman ja yaljelik bʼa Jesús wa xtax ja bʼa Mateo 10:33: «Chikan maʼ wa xyala mi snaʼa jbʼaj ja bʼa stiʼ sat ja kristyano, ja keʼn ojni cha kal mi xnaʼa sbʼaj ja bʼa stiʼ sat ja jTat tey bʼa satkʼinali». Ja yuj wegoxtani kalayabʼ ja kamigoʼik ja jas wanon skʼulajeli. Jelni cham yabʼye: mini xbʼobʼ skʼuʼuke june jastal keʼna oj och snochuman Kristo. Ama jachuk, jcholo yabʼye ke puesto ayon bʼa stukbʼesel jbʼaj.

JASTIK SLEKILAL KILUNEJ: Ja jnani jel gustoʼaxi yajni yila wanonxa yajel makunuk ja rasonik bʼa Biblia. Ja wego mixa xcham skʼujol ja jas wa xbʼobʼ jkʼuluki. Jchawaniltikon jel xkiʼajtikon gusto loʼilanel bʼa jun jasunuk: ja yajtanel kiʼojtikon bʼa Jyoba. Ay ekʼele yajni wa xjul jkʼujol ja jsakʼanil ajyi, wokolni xkabʼ skʼuʼajel jastal tukbʼelon soka skoltanel ja Dyosi. Mixani xkʼana ja kuxil jsakʼanil ajyi sok ja slejel jastik junuk.

Seguro tito lutanon bʼa preso ma chamyonta lek mi jkisa ja rasonik ja Biblia. Pe stsʼakatal yuja jas jnebʼa, jelxani gustoʼayon soka jpamilya. Ja jcheʼumi wa skoltayon, ay jun kakʼix wa xkiswani sok lajan wantikon yaʼteltajel gusto lek ja Jyoba. Mini xnaʼa jastal oj kayi tsʼakatal ja maʼ sjeʼaki ja smeranil bʼa Biblia. Ja yuj wani xleʼa modo bʼa chikan jas ekʼele yajel snaʼ ja tuk ja jas wa xyala ja Biblia. Jel xkayi tsʼakatal ja Jyoba yuja yaʼunejkan oj ajyukon ja bʼa xchonabʼ jel xyajtani, pe mastoni wa xkayi tsʼakatal yuja yaʼunejkan oj mojxukon soka yeʼn.

[Xcholjel]

«Jelni snikawon snajel ke ja Jyoba jachni wa xyabʼ jastal keʼntik sok ja jas wa xkʼulani ojni bʼobʼ ya gustoʼaxuk ma oj bʼobʼ ya tristeʼaxuk»

[Poto]

Ja jcheʼum soka kakʼixi

[Poto]

Ja jastal stukbʼes ja sakʼanil ja jnani jelni spayawon