«Jaxa lekil rasonik sbʼaja sGobyerno ja Dyosi ojni cholxuk»

«Jaxa lekil rasonik sbʼaja sGobyerno ja Dyosi ojni cholxuk bʼa yibʼanal ja luʼumi bʼa jachuk oj snaʼe yibʼanal ja chonabʼiki, anto tixa oj jakuk ja chʼakelali» (MATEO 24:14).

¿Jas kʼan yal ja Jesús? Jastalni wa xyala ja Evangelio bʼa Lucas, ja Jesús «waj ekʼ bʼa chonabʼik sok bʼa komonik bʼa yaljel sok xcholjel ja lekil rasonik sbʼaja sGobyerno ja Dyosi» (Lucas 8:1). Cha yala: «Tʼilani oj jchol yabʼye ja tuk chonabʼik ja lekil rasonik sbʼaja sGobyerno ja Dyosi, pes jani jekubʼalonyuj» (Lucas 4:43). Ja yeʼn kʼe sjek ja snebʼumanik bʼa xcholjel ja lekil rasonik jaw bʼa chonabʼik sok bʼa komonik mojan, pe mas tsaʼan yala yabʼye: «Oj kʼotanik jtestigoʼik [...] sok bʼa yibʼanal ja luʼumi» (Hechos 1:8; Lucas 10:1).

Ja sjejel yaʼawe ja bʼajtan snochumane Kristo. Ja snebʼumanik ja Jesús wegoxta kʼe skʼuluke ja aʼteli. Ja Hechos 5:42 wa xcholo: «Kʼakʼu kʼakʼu mini xkʼotye tekʼan sok mi xyaʼawekan sjejel sok xcholjel ja lekil rasonik sbʼaja Jesús, ja Kristo, bʼa templo sok bʼa naʼitsaltik». Ja aʼtel it mini kechan wa skʼulan jun kʼole tsaʼubʼale, bʼajni spetsanil sok kada jujune ja yeʼnle. Jastalni wa xyala ja tsʼijbʼanum August Neander, «ja Celso, jun kontraʼal ja bʼa bʼajtan snochumane Kristo, wani xkʼulwani burlar yuja aʼtijumik bʼa stsoʼotsil chej, xanabʼal, tsʼuʼum, kristyanoʼik mi jel snaʼawe tsʼijbʼanel sok bʼa mi jel chapanuke jelni skʼujolane xcholjel ja lekil rasoniki». Ja Jean Bernardi, ja bʼa slibro Les premiers siècles de L’Église (Los primeros siglos de la Iglesia), wa xcholo ke ja snochumane Kristo tʼilani «oj kʼumanuke chikan bʼaʼa sok bʼa yibʼanal ja luʼumi. Bʼa bʼejik sok bʼa chonabʼik, xcholjel bʼa ay jitsan kristyano sok ja bʼa naʼitsik. Bʼa ay ekʼeleʼik wa xmaklajiye ma miyuk». «Asta oj kʼotuke bʼa yibʼanal ja Luʼumi».

¿Matik junxta wa skʼulane ja bʼa jtyempotik? Ja sacerdote anglicano David Watson stsʼijbʼan: «Tʼusan mi yibʼanaluk ja matik mi wanuke snebʼjel bʼa Dyos ja bʼa tyempoʼik, jani yuja Iglesia mi xyaweyi stʼilanil ja xcholjeli sok ja bʼa sjejeli». Ja bʼa slibro ¿Por qué se van los católicos?, ja José Luis Pérez Guadalupe wa xcholo ke ja testigoʼik bʼa Jyoba «wani xwajye ekʼ bʼa naʼitsaltik», bʼa mini jach wa skʼulane ja evangélicoʼik, ja adventistaʼik sok tuk kʼoleʼik bʼa relijyon.

Jel xnikwani ja jas xcholo ja Jonathan Turley bʼa jun imporme bʼa Cato Institute: «Malanta oj taʼ tiʼal ja testigoʼik bʼa Jyoba bʼa jachuk tʼusan mi yibʼanaluk ja kristyanoʼik ojni spensaraʼuke sbʼaja cholumanik jaw, ke wa xkʼumajiye ja bʼa spuertaʼe ja bʼa ekʼeleʼik mi ja wa smajlaye. Bʼa yeʼnle, xcholjel ekʼ bʼa naʼitsik mini jun modoʼuk bʼa yajel ajyuk ja skʼuʼajel yiʼoje, jaʼitani wa xcholowe ja skʼuʼajele» (Cato Supreme Court Review, 2001-2002).

[Recuadro]

¿Wanxa maʼ xa naʼa sbʼaje?

Jastalni sjeʼa ja Biblia, ja bʼa artikuloʼik ekʼta, paklaxi jujuntik jastik bʼa wa xkʼot najuk sbʼaje ja meran snochumane Kristo. ¿Wan maʼ xbʼobʼa naʼ sbʼaje? Ama ay jitsan kʼoleʼik sok bʼiʼilalik bʼa relijyon wa xyalawe kʼotele snochumane Kristo. Pe ajuluka kʼujol ja jas yalayabʼ ja Jesús ja snebʼumaniki: «Mi yibʼanuluke ja maʼ wa xyalakabʼ ‹Kajwal, Kajwal› oj ochuke ja bʼa Gobyerno bʼa satkʼinali. Kechani oj ochuke ja matik wa skʼulan ja jas wa skʼana ja jTat tey bʼa satkʼinali» (Mateo 7:21). Ja yuj, bʼa yabʼjel stsamalil ja slekilalik oj yijan ja sGobyerno ja Dyos, tʼilani oj natik sbʼaje ja maʼ wane skʼulajel ja jas wa skʼana ja Tatali, wa xkʼan alxuk, ja meran snochumane ja Kristo, sok ajyelsoke. ¿Wan maʼ xa kʼana oja naʼ mas sbʼaja Gobyerno it sok ja bʼa slekilalik oj yijani? (Lucas 4:43). Pes wa xlokowa oja taʼ loʼil june ja testigoʼik bʼa Jyoba.