«Kaʼunej snaʼe jawa bʼiʼili»

«Ja ke’n kaʼunej snaʼe jawa bʼiʼil ja matik awaki ja bʼa luʼumkʼinali. [...] Ja ke’n kaʼunej snaʼe jawa bʼiʼili, sok mini oj kakan yajel snaʼe» (JUAN 17:6, 26).

¿Jas kʼan yal ja Jesús? Ja yeʼn xchiktes ja sbʼiʼil ja Dyos yajni xcholo ekʼi. Seguro wani staʼa tiʼal yajni wa skʼuman ja Yabʼal Dyos bʼa Hebreo, bʼa tikʼanxtani wa skʼulan (Lucas 4:16-21). Cha sjeʼayi ja snebʼumanik bʼa skʼanjel: «Tat, aʼaxuk sakbʼuk jawa bʼiʼili» (Lucas 11:2).

Ja sjejel yaʼawe ja bʼajtan snochumane Kristo. Ja jekabʼanum Pedro yalayabʼ ja ansyanoʼik bʼa Jerusalén, ja Dyos yaʼunej eluk ja bʼa chonabʼik «jun chonabʼ bʼa oj yiʼ ja sbʼiʼili» (Hechos 15:14). Ja snebʼumanik sok ja tuk sjekabʼanumik ja Jesús wa xcholowe: «Spetsanil ja maʼ wa spatayi skʼujol ja Jyoba bʼa sbʼiʼil ojni staʼ skoltajel» (Hechos 2:21; Romanos 10:13). Cha wani staʼa tiʼal ja sbʼiʼil ja bʼa yakan tsʼijbʼunubʼali. B’a jun kopya ja b’a leyik judíoʼik naʼubʼal sbʼaj jastal Tosefta bʼa tsʼikwi mojan och ja bʼa jabʼil 300 bʼa wa staʼa tiʼal bʼa tsikji ja jas stsʼijbʼuneje ja bʼajtan snochumane Kristo. Ja tiw wa xyala: «Ja [Evangelioʼik] sok ja libroʼik bʼa jun tsome kristyano [bʼa bʼobʼta kʼotele judioʼik] mini oj staʼ skoltajele ja yajni tsikjiye; wani xyawekan a-stsike bʼa stiʼ snaje ja yeʼnle sok ja bʼa ayiʼoj ja sbʼiʼil ja Dyosi».

¿Matik junxta wa skʼulane ja bʼa jtyempotik? Ja Libro Estándar Revisada de la Biblia, yaʼunej eluk ja Consejo Nacional de las Iglesias de Cristo ja bʼa Estados Unidos, wa xyala ja bʼa skʼeʼulabʼili: «Ja jastal wa xmakuni ja mero sbʼiʼil Dyos kechantani june sok mey pilan, bʼa lajansok ayni tuk dyosik pe bʼa tukni lek oj iljuk ja yeʼn, stimaweni bʼajtanto ja bʼa styempo ja judíoʼiki, sok bʼa mini tʼun sbʼejuk ja bʼa skʼuʼajel yiʼoje ja Iglesya Cristiana». Ja yuj, ja libro it jaʼukto maʼ oj yawe ochkan ja sbʼiʼil ja Dyos sutuwekan ja título Ajwalal. Ja yuj, ja ajkʼachto ja Vaticano yalayabʼ ja s-obispoʼik: «Ja bʼa tsʼebʼojik sok ja bʼa orasyonik, ja sbʼiʼil ja Dyos ja bʼa tetragrámaton YHWH mini tʼun oj alxuk sok mini oj axuk makunuk». *

¿Ay maʼ jun kʼole bʼa wa xyaʼ makunuk sok wa xchiktes ja sbʼiʼil ja Dyos? Jun kerem sbʼiʼil Sergey kʼot snaʼ ke ayni. Juntoni kerem tey bʼa Kirguistán, yila b’a jun película wa staʼa tiʼal ke ja Dyos sbʼiʼil Jyoba. Pe ekʼni lajune jabʼil mini yabʼ ja bʼiʼilal jaw. Anto, waj man Estados Unidos, chabʼ testigoʼik bʼa Jyoba skʼojtsine ja spuerta sok sjeʼaweyi soka Biblia jastal ja sbʼiʼil ja Dyos. Ja Sergey jelni gustoʼaxi yuja staʼa jun relijyon bʼa wa xyawe makunuk ja sbʼiʼil ja Dyos. Ja b’a diccionario (Webster’s Third New International Dictionary) ja yaljel «Jyoba Dyos» wa xyala: «Kechantani yeʼn ja maʼ wa x-ajiyi stoyjel yuja ja testigoʼik bʼa Jyoba».

[Nota]