«Mixa jipawexkan ja jastik wa xjeʼa»

«Ta mixa jipawexkan ja jastik wa xjeʼa, kʼotelexni mero jnebʼumanik; oja naʼex sbʼaj ja smeranili, jaxa smeranili oj ya elanik libre» (JUAN 8:31, 32).

¿Jas kʼan yal ja Jesús? Yajni yala «ja jastik wa xjeʼa», ja Jesús jani wa xkʼan yal ja bʼa jastik wa sjeʼa. Cha xcholo ke ja jastik wa sjeʼa tini jakel bʼa june masto ekʼxel: «Ja jTat maʼ sjekawoni, yeʼnani ja maʼ yalunejkabʼ ja jas tʼilan oj kali sok ja jas tʼilan oj jtaʼ tiʼali» (Juan 12:49). Bʼa jun orasyon yayi ja sTat bʼa satkʼinal, ja Jyoba Dyos, ja yeʼn yala: «Jawa wabʼali jani ja smeranili». Ja yuj, yajni wa sjeʼa, tikʼanxtani wa staʼa tiʼal ja jas yalunej yabʼ ja Dyos ja yaʼtijumik ja bʼa tyempo najate (Juan 17:17; Mateo 4:4, 7, 10). Anto, ¿jastal mi sjipawekan ja jastik wa sjeʼa ja Jesús ja meran snochumane Kristo? Jaʼa yajni wa skʼuʼane ja Yabʼal ja Dyos, ja Biblia, jastal ja único skujlayubʼil «ja smeranili», ja mas ay yip ja bʼa skʼuʼajelik sok ja bʼa jastik wa xkʼulaxi.

Ja sjejel yaʼawe ja bʼajtan snochumane Kristo. Ja jekabʼanum Pablo, jaʼa nochuman Kristo ja mas jitsan kartaʼik stsʼijbʼan ja bʼa Yabʼal Dyos, wani xyabʼ ja junxta kiswanel yabʼ ja Jesús yuja Yabʼal ja Dyos. Ja yeʼn yala: «Yibʼanal ja Yabʼal ja Dyosi jani stojunej soka yipi sok wani xmakuni» (2 Timoteo 3:16). Chomajkil, ja winike jumasaʼ wa sjeʼawe ja bʼa kongregasyon yala yabʼye ke «tʼilani mok sijpuk ja tojil yabʼal ja Dyosi sbʼaja jastal wa sjeʼa» (Tito 1:7, 9). Cha ya julyi skʼujol ja snochumane Kristo soka bʼa «sbiboʼil ja kristyano sok pensarik bʼa mi meranuk sok bʼa mey stojolil bʼa tini elel bʼa skostumbre kristyanoʼik, ja bʼa jastal wa spensaraʼan sok bʼa smodo ja luʼumkʼinal it sok mini tiʼuk bʼa Kristo» (Colosenses 2:8).

¿Matik junxta wa skʼulane ja bʼa jtyempotik? Jastalni wa xyala ja Constitución dogmática sobre la divina revelación bʼa kʼelubʼal yuja Vaticano ja bʼa 1965 sok el ja bʼa Catecismo de la Iglesia Católica, wa xchiktes ke «ja Iglesya mini tiʼukta wa xya eluk ja bʼa Yabʼal ja Dyos ja jastik chiknajeli. Ja yuj, ja [bʼa Sagrada Tradición sok ja bʼa Sagrada Escritura] tʼilani oj kʼuʼaxuk sok oj kisjuk». Ja bʼa rebista Maclean’s, jun ixuk bʼa relijyon bʼa Toronto (Canadá) wa xyala: «¿Jas yuj tʼilan oj katikan a-stojotik jun kʼumal ‹bʼa tikʼanxta tukbʼel› bʼa ayxa mas ja chabʼ mil jabʼili? Ja keʼntikon ayni kiʼojtikon tsamal pensarik, pe wani xchʼay ja yip yajni wa x-axi slaj sbʼajsok ja jastik sjeʼa ja Jesús sok ja Yabʼal ja Dyosi».

Ja New Catholic Encyclopedia wa xyala sbʼaja testigoʼik bʼa Jyoba: «Wani xchiktese jaʼita ja Biblia ja mero skujlayubʼil ja bʼa jastik wa skʼuʼane sok ja bʼa tikʼe sakʼanil yiʼojeʼi». Ja ajkʼachto, jun winik bʼa Canadá yajni wan choljel yabʼ yuj jun hermana Testigo, wegoxta yalayabʼ: «Wanxa xnaʼa bʼajex». Sok xchʼutuyi ja sBiblia ja hermana bʼa yala: «Ja libro yamanawuji jani wa sjeʼa machunuka».