«Ta waxa yajta abʼajex»

«Wa xkawilex jun yajkʼachil mandar: yajta abʼajik; sok jastalni jyajtunejex ja keʼn, cha yajta abʼajik ja weʼnlexi. Sok ta waxa yajta abʼajex, jach oj snaʼe yibʼanal kristyano ja weʼnlexi kʼotelex jnebʼumanik» (JUAN 13:34, 35).

¿Jas kʼan yal ja Jesús? Ja Kristo yalayabʼ ja snochumanik a-syajtay sbʼaje jastalni yajtajiye yuja yeʼn. Pe ¿jastal yajtajiye yuja Jesús? Jani mi yakan ajomjuk yuja jastal mi lek xyila sbʼaje ja tuk chonabʼik ma soka ixukeʼi (Juan 4:7-10). Cha spilani styempoʼil, yaʼa ja yip sok skʼulan ja janekʼ lajxiyuj bʼa skoltajel ja tuki (Marcos 6:30-34). Pe ja yajtanel mas niwan sjeʼa jaʼa yajni yaʼa ja sakʼanili. Jastalni yala: «Keʼn ja [...] lekil talnacheji wa xyaʼa ja sakʼanil yuja xchejiki» (Juan 10:11).

Ja sjejel yaʼawe ja bʼajtan snochumane Kristo. Ja snochumane Kristo it wani xya sbʼiʼiluk sbʼaje hermanoʼik (Filemón 1, 2). Ja bʼa kongregasyon gusto lek wa skʼulane aseptar kristyanoʼik bʼa chikan jas xchonabʼe. Wani skʼuʼane mey stukil ja judío soka griego, pes junxta Ajwalal yiʼoje (Romanos 10:11, 12). Ja bʼa jabʼil 33, yajni chʼak ja kʼin bʼa Pentecostés, ja nebʼumanik bʼa Jerusalén «xchonowe ja jastik yiʼojeʼi sok ja jastik sbʼajeʼi sok wa spilawe ja jas stsomunejexa chikan jastal ja snesesida kada jujune». ¿Jas yuj? Jachuk ja matik ajkʼachto yiʼonej jaʼ oj bʼobʼ kanuk ja bʼa chonabʼi sok mi oj yawekan smaklajel ja jastik wa sjeʼawe ja jekabʼanumiki (Hechos 2:41-45). Ja Tertuliano chiktes ja jas mero nikjiye bʼa skʼulajel ja it, yajni ekʼelxa junuk 200 jabʼil chamele ja jekabʼanumiki, yala ja jas wa xyalawe ja tuk sbʼaja snochumane Kristo: «Kʼela [...] jastal wa syajtay sbʼaje [...] soka jastal puesto aye bʼa oj chamuke yuja smoje».

¿Matik junxta wa skʼulane ja bʼa jtyempotik? Ja bʼa libro Historia de la decadencia sok ruina del Imperio romano wa xchiktes ke bʼa jitsanxa sigloʼik, ja matik wa sjeʼawe kʼotele snochumane Kristo, masni wane «xchʼikjel sbʼaje wokol ke yuja jastal ekʼ sbʼaje yuj smul ja matik mi tojukeʼi». Ja ajkʼachto, jun estudio kʼulaxel ja bʼa Estados Unidos xchiktes ja matik tuk srasaʼe sok ja matik ay srelijyon, tʼusani mi yibʼanaluke kʼotele snochumane Kristo. Ja matik sbʼaje bʼa tuktukil paisik bʼa junta srelijyone mini xkʼot snaʼ sbʼaje soka tuki. Ja yuj, mi chapanuke bʼa oj skoltay sbʼaje ma mini xnikjiye skʼulajel yajni ay jas oj makunuk yujile.

Ja bʼa jabʼil 2004, ja bʼa Florida bʼa Estados Unidos yiʼajni wokol yuj chane huracanik bʼa kechanta chabʼ ixaw. Tʼusan tsaʼan, ja presidente bʼa comité matik wa skʼelawe yajni wa x-ekʼ jun desgrasya ja bʼa chonabʼ jaw, kʼeni yil jastal wane yajel makunuk ja jastik yiʼoje. Yajni yila mini ay jun kʼole ja jastal tsoman ay ja testigoʼik bʼa Jyoba, skʼapa oj yayile ja jastik oj makunuk yujile. Jabʼilik bʼajtanto ja bʼa 1997, jun kʼole Testigoʼik wajye ja bʼa República Democrática del Congo bʼa yaweyi anik, waʼelal sok kʼuʼal ja hermanoʼik sok ja matik wa xmakuniyuji. Ja stsʼakol ja jastik yaʼawe ja Testigoʼik bʼa Europa wani x-elkʼot jun miyon bʼa dolarik.