¿Yibʼanal maʼ meran kʼotele snochumane Kristo?

¿WAN maʼ xa naʼa janekʼ ay ja snochumane Kristo ja bʼa luʼumkʼinali? Jastalni wa xyala ja Atlas of Global Christianity, ja bʼa 2010 ajyini junuk 2,300 miyonik, sok tini aye bʼa 41,000 relijyonik, kada jujune ja jastik wa skʼuʼane sok ja jastik kujlajel yujile. Pe yuja ay jitsan relijyonik bʼa «snochumane Kristo» bʼobʼta jujuntik mi snaʼawe jas oj spensaraʼuke sok wa xyabʼye loʼlubʼale. Bʼobʼta wa sjobʼo sbʼaje: «¿Yibʼanal maʼ meran snochumane Kristo ja matik wa xyalawe jach kʼotele?».

La kiltik jun sjejel bʼa yajelyi sjakʼjel. Ta ja weʼn waxa kʼana oj ochan bʼa pilan país, ¿jastal oja jeʼ waxa kʼana oj ajyan ja bʼa paisi? ¿Mi maʼ meranuk mi malanukta oja wal sok yaljelik? Tʼilani oja jeʼ jun pasaporte ma pilan juʼun bʼa wa xchiktes. Pes bʼa kʼotel jun meran snochuman Kristo, cha mini malanukta bʼa june oj yal wa skʼuʼan ja Kristo. Tʼilani oj najuk sbʼaje ja jastal mero kʼotele. La kiltik jastal.

Ja yaljel snochuman Kristo kʼe axuk makunuk tʼusan tsaʼan ja bʼa jabʼil 44 bʼajtanto yuja jtyempotiki. Ja Lucas, jun choluman sbʼaja jas ekʼtajani wa xchiktes ke «soka stojelal ja Dyosi, tini bʼa Antioquía ja aji sbʼiʼiluke sbʼajtanil ekʼele snochumane Kristo ja nebʼumaniki» (Hechos 11:26). Ja yuj, ja snochumane Kristo tʼilani oj kʼotuke nebʼumanik bʼa yeʼna. Pe ¿jas wa stojolan kʼotel nebʼuman bʼa Jesukristo? Ja Diccionario Teológico del Nuevo Testamento, wa xyala: «Snochjel ja Kristo jastal nebʼuman wani stojolan yajelyi tsʼikan lek ja sakʼanili». Bʼa tuk yaljel, jun meran nochuman Kristo wani snocho tsʼikan lek ja jastik sjeʼa sok ja tojelalik yaʼa ja Jesús, ja maʼ ya kujlajuk ja snochumane Kristo.

¿Ay maʼ kristyanoʼik jastal it ja bʼa matik wa xyalawe kʼotele snochumane Kristo ja bʼa jtyempotik? ¿Jasa yala ja Jesús bʼa oj najuk sbʼaje ja snochumaniki? Bʼa snajel ja jas wa xyala ja Biblia sbʼaja it, wa xlokowex skʼumajel ja joʼe ja artikulo ti jakumi. Kada jujune oj paklaxuk jun jasunuk, jastalni yala ja Jesús, bʼa jachuk oj najuk sbʼaje ja snebʼumaniki. Cha oj kiltik jastal yaʼawe ja sjejel ja snochumane Kristo ja bʼa bʼajtan siglo sok tsaʼan la jletik modo yiljel matik ja bʼa snochumane Kristo junxta wane skʼulajel ja bʼa jtyempotiki.