AY MIYONIK kristyano bʼa mi skʼintaye ja Navidad. ¿Wan maʼ snaʼawe malaya yuja mi stsaʼunejuke skʼulajeli? ¿Wan maʼ xyabʼye ay jun jasunuk wan chʼayel yujile? ¿Wan maʼ xyabʼ ja yuntikile wane xchʼayjel jun jasunuk bʼa lek? La kiltik jasa wa xyalawe jujuntik testigoʼik bʼa Jyoba bʼa tuktukil parte wa xtaxye ja bʼa luʼumkʼinali.

Yajel juljkʼujoltik ja Jesús. «Mini jela wajyon ja bʼa iglesya bʼajtanto oj kʼotkon testigo bʼa Jyoba. Kechantani wala wajyon jujuntik ekʼele bʼa Navidad ma Pascua. Pe ja bʼa ekʼeleʼik it mini xpensaraʼan bʼa Jesús. Ja wego, bʼa mixa xkʼintay ja Navidad, wanxani la ochyon ja reunión ja bʼa jkongregasyon chabʼ ekʼele ja semana sok wa xjeʼayi tuk kristyanoʼik ja jas wa sjeʼa ja Biblia sbʼaja Jesús» (EVE, AUSTRALIA).

Yajel majtanalik. «Jelni la gustoʼaxiyon yajni wa x-ajiki majtanalik bʼa mi wa xmajlay. ¡Jel jgusto ja sorpresaʼiki! Cha jelni xkiʼaj gusto skʼulajel kartaʼik maʼ dibujoʼik bʼa yajelyi ja tuki. Jachuk masni gusto wa x-ajyiye, sok cha jachuk ja keʼn» (REUBEN, IRLANDA DEL NORTE).

Skoltajel ja maʼ ay snesesidaʼe. «Jelni xkabʼtikon stsamalil xchapjel swaʼele ja matik maloʼaye. Chomajkil, ay ekʼele wa xkiʼajtikon och yile jun postre, nichimik ma jun yal majtanal bʼa oj gustoʼaxuke. Sok ja it juni jasunuk bʼa wa xbʼobʼ kʼulaxuk bʼa chikan jas ekʼele ja bʼa jabʼili» (EMILY, AUSTRALIA).

Stsomjelabʼaj soka pamilya. «Yajni ja pamilya wa tsomo sbʼaj, ja yal untiki wani snaʼawe sbʼaj mas ja stiyoʼe, ja stataweloʼe soka sprimoʼe. Yuja mi xkʼulantikon ja kostumbreʼik sok ja kʼiniki, ja jpamilyatikon wani snaʼawe wa xkulataytikon yuj wa xkʼanatikon sok mi yuj obligadoʼuk» (WENDY, ISLAS CAIMÁN).

Yajel ajyuk ja lamanil. «Ja bʼa Navidad jelni jas wa xbʼobʼ jkʼuluk, bʼa mixa xkankuj tyempo spensarajel ja bʼa lamanil. Jnebʼunejxa ja jas wa skʼapa ja Biblia sbʼaja kristyanoʼiki sok jtaʼunejxa meran lamanil. Wa xnaʼa ke ja kuntikili ojxani ajyuke sakʼan bʼa jun luʼumkʼinal maxa lek» (SANDRA, ESPAÑA).