Ti pojkiyon bʼa Santo Domingo, bʼa skapital ja República Dominicana; keʼnon ja ijtsʼinal ja bʼa chane kermanoʼik. Ja jnantati jelni chapane, ja yuj cha jachni wa skʼanawe oj ya kʼikotikon. Chane jabʼil bʼajtanto yuj oj jpojkukon, snaʼawe sbʼaj jujuntik misioneroʼik mormón sok jelni cham yilawe ja jastal jel lek smodoʼe sok ja jastal chapan lek wa x-elye ekʼi. Tʼusan tsaʼan, ja jpamilya yeʼnleni ja maʼ bʼajtan wajye ja bʼa República Dominicana bʼa ochye ja bʼa Iglesya de Jesucristo de los Santos de los Últimos Días, bʼa cha wani xnaji sbʼaj jastal Iglesya Mormona.

Ja keʼn tolabida wala koltaniyon ja bʼa aʼtelik wa xkʼulaxi bʼa Iglesya, pe ja jas mas wa xkiʼaj gusto jani ja stʼilanil wa xyaweyi ja b’a pamilyaʼik sok ja jastal jel lek smodoʼe. Jelni gusto ajyiyon yuja kʼotyon jastal mormón sok ajyikuj ja jkʼelsat bʼa kʼotel jastal misionero.

Yajni ay kiʼoj 18 jabʼil, ja jpamilya wajye bʼa Estados Unidos bʼa oj bʼobʼ wajkon bʼa jun universidad chapan lek. Jun jabʼil mas tsaʼan, ja jtiyoʼik bʼa kʼotele testigo bʼa Jyoba, jak yulatayotikon bʼa Florida sok slokowotikon bʼa jun asamblea. Jelni cham kila yajni spetsanile wa xchʼak sleʼe ja tekstoʼik bʼa Biblia sok wa xyawe och juʼun, ja yuj jkʼana jun juʼun sok jun lapicero sok jach cha kʼe jkʼuluk ja keʼn.

Yajni chʼak ja asamblea, ja jtiyoʼik yalawekabʼ ke yuja wa xkʼana oj kʼotkon misionero, wa skʼanawe oj skoltayone bʼa oj jnebʼ mas bʼa Biblia. Jelni lek kabʼi, pes yujni mas ay kiʼoj snajel bʼa ja Libro Mormón ke yuja bʼa Biblia.

Yajni kumxiyeʼi wani xyaweki estudio bʼa Biblia jach bʼa teléfono. Tolabida wa xyalawekabʼ oj ka slaj ja skʼuʼajel kiʼoj soka jas wa xyala ja Biblia. Wa skʼanawe keʼn oj kʼot jtaʼ ja smeranili.

Ayni jitsan jastik ja bʼa jrelijyon bʼa jkʼuʼunej lek, pe ja smeranili mini seguro ayon ta wa slaja sbʼaj soka jasa wa sjeʼa ja Biblia. Ja jtiya sjekaki ja rebista ¡Despertad!, número 8 bʼa noviembre bʼa 1995, yaʼuneje eluk ja testigoʼik bʼa Jyoba, bʼa ayiʼoj chabʼ artikulo wa staʼa tiʼal sbʼaja mormoniki. Jelni cham kʼabʼ ja kila ay jitsan skʼuʼajelik bʼa mi xnaʼa sbʼaj ja bʼa kiglesya, ja yuj jleʼa ja bʼa sitio bʼa Internet bʼa yiljel ta meran ja jas wa xyala ja rebista; pe meraniʼa. Pe yajni kulatay jitsan museo mormón ja bʼa estado bʼa Utah cha jtaʼani mas prebaʼik.

Jkʼuʼunejni lek ke ja Biblia sok ja Libro Mormón wani slaja sbʼaj. Pe yajni kʼe jkʼumuk lek ja Biblia kʼot kil ke mini tʼun slaja sbʼaj. Jun sjejel, ja bʼa Ezequiel 18:4 wa xyala k’e ja sakʼanil ja kristyano wani xchami. Pe ja b’a Libro Mormón ja b’a Alma 42:9 wa xyala ke ja sakʼanil jun kristyano nunka oj bʼobʼ chamuk.

Pe mini kechanuk ja tuk skʼuʼajelik it mi meranuki, cha wani sjomo kolom ja spensarik wa spukuwe ja mormoniki. June ja bʼa it, jani wa sjeʼawe ke ja tsamal lugar bʼa Edén tey bʼa condado de Jackson ja bʼa (Misuri, Estados Unidos). Bʼa pilan, ja olomalik bʼa Iglesya wa sjeʼawe ke «oj kʼot jun kʼakʼu ja Dyos oj ya mandar bʼa yibʼanal ja luʼumi, yajel makunuk ja sgobyerno ja Estados Unidos».

Wa xjobʼo jbʼaj yajni x-ekʼ ja it, jas oj ekʼ sbʼaj ja jpaisi soka tuk paisiki. Jun och kʼakʼu, juljbʼaj jun llamada bʼa jun kerem mi xnaʼa sbʼaj, wan jkʼulajel estudiar bʼa oj kʼot misionero sok jobʼoyi sbʼaja it. «Lekbʼi jawa país ay bʼa guerra sok tuk país, ¿oj maʼ tiroʼanan sok ja mormonik ja bʼa país jaw?». Jelni cham kabʼ ja yala ke ojo. Ochni jpaklay mas ja sjejelik ja bʼa jrelijyoni sok jobʼoyi jujuntik olomalik jel kisubʼal ja bʼa Iglesya, pe yalawekabʼ ke ja sjobʼjelik kiʼoji jelni wokol sok takal takal oj chiknajuk stojol.

Mini gusto kanyon soka jastik yalawekabʼi. Kʼe jobʼ jbʼaj jas yuj wa xkʼana oj kʼotkon misioneroʼil sok kaʼa jbʼaj kuenta jani yuja wa xkʼana oj jkoltay ja tuk sok cha jelni spayawon ja jastal jel xkisji ja matik wa skʼulan ja a’tel jaw. Pe ja smeranili jelni tʼusan wa xnaʼa bʼa Dyos. Anima jitsan ekʼele jkʼumunej ja tekstoʼik bʼa Biblia, pe mini kaʼunejukyi ja stʼilanil wa sbʼajin ja libro it. Cha mini jnaʼunejuk ta ja Dyos ay jas wa skʼana oj skʼuluk sbʼaja Luʼum sok jachuk sbʼaja kristyano.

Yajni jpaklay ja Biblia soka testigoʼik bʼa Jyoba jnebʼa jitsan jastik: jas sbʼiʼil ja Dyos, jasa wa x-ekʼ ja wala chamtiki sok ja cholal yiʼoj ja Jesús bʼa yajel kʼotuk ja jas wa skʼana ja Dyosi... Man kʼot jnaʼ sbʼaj lek ja jas yiʼoj ja tsamal libro it, ¡janekʼto wa xkʼana oj cholyabʼ ja tuk ja jastik wanon snebʼjel ja bʼa smeranili! Anima tolabida jnaʼunej ke ay jun Dyos sakʼan, pe ja wego wanxani xbʼobʼ kayi orasyon bʼa lajansok wanon loʼilsok jastal jun mero lekil kamigo. Ja 12 bʼa julio bʼa 2004 kiʼaj jaʼ bʼa kʼotyon testigo bʼa Jyoba sok wake ixaw tsaʼan ochyon choluman bʼa tyempo tsʼikan.

Aʼtijiyon joʼe jabʼil ja bʼa mero yechalil wa xkʼelji ja yaʼtele ja testigoʼik bʼa Jyoba, bʼa Brooklyn (Nueva York). Juni gustoʼil bʼa keʼna, ja jkʼulan ja janekʼ bʼobʼkuj bʼa koltanel yajel eluk Bibliaʼik sok tuk juʼunik bʼa slekilal ja miyonik kristyano bʼa sutanal ja luʼumi. ¡Jelni kabʼunej stsamalil snajtil ja jabʼilik it skoltajel ja tuk bʼa oj snaʼe sbʼaja Dyosi!