Ja Biblia wa sjeʼa ke ja kristyanoʼiki mulanumotik. Jpetsaniltik jani yuja yintilotik ja Adán, yuja koʼ bʼa mulali. Ja yuj, ay ekʼele wa xkʼulantik jastik mi lekuk sok tsaʼan wa xnaʼatik malaya yuja jkʼulantiki. Ja yunin ja Dyos, ja Jesukristo, cham bʼa stupjel ja jmultiki. Yuja xchamelali wani xbʼobʼ ajuk perdon ja jmultiki. Ja sakʼanil yaʼa, juni majtanal bʼa Dyos (Kʼuman ja Romanos 3:23, 24).

Ayni jujuntik koʼele chaʼanik mulal sok wa sjobʼo sbʼaje ta oj kʼot ajuke perdon yuja Dyosi. Pe ja Biblia wani xyala: «Jaxa xchikʼel ja Yunin Jesús wa xya sakbʼukotik bʼa spetsanil ja mulali» (1 Juan 1:7). Ja yuj, ja Jyoba wani x-akʼwani perdon asta ja bʼa chaʼanik mulal, ta meran wa sutxi jkʼujoltiki (Kʼuman Isaías 1:18).

Ta wa xkʼanatik ke ja Jyoba oj yaʼotik perdon, tʼilani oj jnatik sbʼaj: snajel ja jas wa skʼulan, ja srasonik, sok ja smandariki (Juan 17:3). Ja Jyoba wani xyaʼa perdon sok spetsanil skʼujol ja maʼ wa sutxi skʼujol ja bʼa smuli sok wa skʼujolan stukbʼesel sbʼaj (Kʼuman ja Hechos 3:19).

Ja lek oj yil-otik ja Dyos mini wokoluk. Ja yeʼn wani xyabʼyotik stojol ke wani xkʼojchin koktik. Ja Jyoba jelni lek sok ay syajulal skʼujol. ¿Mi maʼ wani snikawa ja it bʼa skʼujolajel snebʼjel mas sbʼaja jastal lek oja wila jbʼajsoki? (Kʼuman ja Salmo 103:13, 14).