Man yal jchʼinil jelni xyajtay ja kʼulbʼeniki. Tikʼanxta wala wajyonsok paxyal ja jpamilya ja bʼa tsamal teʼaltik soka bʼa yok jaʼik bʼa sjoybʼunej ja jchonabʼtikon Jyväskylä, ja bʼa centro bʼa Finlandia. Cha jelni xyajtay ja chanteʼiki. ¡Man yal jchʼinil wa xkʼana oj tel ja tsʼiʼik sok ja misik wa xkila! Yajni kʼiyon, jelni kʼe tajkukon yajni kila jastal wa xyixtalane ja chanteʼiki, ja yuj ochyon bʼa jun kʼole bʼa wa skoltaye ja chanteʼiki. Ja tiw jnaʼa sbʼaj tuk kristyano b’a junxta wa spensarane jastal keʼna.

Jkʼulantikon campañaʼik bʼa skoltajel ja sderecho ja chanteʼiki. Cha jpukutikon juʼunik sok jchapatikon marchaʼik bʼa sjejel bideoʼik sok spukjel rebistaʼik. Sok tixa jamatikon jun sitio bʼa internet bʼa xchiktesel ja sderecho ja chanteʼiki. Ja jas jtsaʼatikon skʼulajel tikʼanxtani wa xchʼikawotikon wokol yuja matik ay xcholi. Jitsan ekʼele yamjiyon sok lutjiyon.

Cha wani xcham jkʼujol bʼa tuk wokolik wan ekʼel, ja yuj cha ochyon bʼa kʼoleʼik jastal bʼa Amnistía Internacional sok Greenpeace, sok jelni jkʼujolan bʼa skoltajele. Cha wa skoltay ja kristyanoʼik bʼa mi jel yiʼoje smajlajel, jastal ja pobreʼik sok ja matik wane stekʼjel waʼin.

Pe tsaʼan kaʼa jbʼaj kuenta mi oj bʼobʼkuj stukbʼesel ja luʼumkʼinali. Ama ayni ekʼele bʼobʼ jtojbʼestikon wokolik bʼa chʼin pe ja bʼa mas niwak kechanta wa x-ipaxi. Lajansok ja yipalil ja bʼa mi lekuki xchʼayata el ja luʼumkʼinali sok mixani maʼ xyayi stʼilanil. Wa xkabʼ mixani la makuniyon.

Yuja wa xkabʼ mixa la makuniyon wani xya och jtristeʼil, anto tixa kʼe jpensaraʼuk bʼa Dyos sok ja bʼa Biblia. Ama ja ajyi jkʼulunejsok estudiar ja testigoʼik bʼa Jyoba sok wa xkaʼa tsʼakatal yuja lekil smodoʼe sok ja wa xcham skʼujole bʼa keʼna, pe ja tyempo jaw mitoni chapanukon bʼa stukbʼesel ja jsakʼanili. Pe ja bʼa ekʼele it tukxani lek waji.

Jleʼa ja jBiblia sok kʼe jkʼumuk. Wajni jun lekil an ja bʼa jyajbʼelik. Jkʼumani jitsan teksto bʼa wa sjeʼa oj jyajtaytik lek ja chanteʼiki. Jun sjejel, ja Proverbios 12:10 wa xyala: «Ja ma’ toji wa stalnay ja xchanteʼiki». Cha kabʼ stojol ja Dyos mi yeʼn smuluk ja wokolik ja bʼa luʼumkʼinali. Jaʼuktoma, ja jwokoltik ipaxelni yuja jitsan kristyano mi snochowe ja stojelal ja Jyoba. Jelni snikawon juntiro ja syajal skʼujol sok ja niwan spasensya yiʼoj jmoktik ja Dyosi (Salmo 103:8-14).

Ja bʼa tyempo jaw jtaʼa xetʼan ja bʼa libro ¿Jasa wa sjeʼa meran lek ja Biblia? sok jeka jach bʼa correo. Tʼusan tsaʼan yulatayone jun nupanum bʼa testigoʼik bʼa Jyoba sok skʼapaweki jun estudio bʼa Biblia. Wegoxta jkʼulan aseptar. Cha kʼe wajkon ja reunionik wa skʼulane ja bʼa Naʼits bʼa Tsomjelal. Takal takal, ja smeranilik bʼa Biblia kʼot man bʼa jkʼujol.

Stsʼakatal yuja Biblia, jelni jas jtukbʼes ja bʼa jsakʼanili. Kaʼakan snukʼjel may sok ja jelxelxa yujeli; ka tojbʼuk ja jmodo sok ja jastal wala kʼumaniyoni, sok jtukbʼes ja jastal wa xkila ja matik ay xcholi (Romanos 13:1). Cha kaʼakan ja kuxil jsakʼanil, jun parte ja bʼa sakʼanil bʼa jeʼa mi jkomo jbʼaj.

Pe ja mas wokol kabʼ stukbʼesel jbʼaji jani yiljel bʼa jun modo stojol ja kʼole kristyanoʼik bʼa wa skʼulane luchar. Mini wegoxta tukbʼiyon. Ja bʼajtani wa xkabʼ juni chʼaykʼujolanel ja oj jpiljbʼaj soka yeʼnleʼi. Pe kaʼa jbʼaj kuenta ja meran smajlajel yiʼoje ja kristyano jaʼitani ja sGobyerno ja Dyos, ja yuj kʼe jkʼujoluk bʼa skoltajel ja Gobyerno jaw sok skoltajel ja tuk bʼa oj kʼot snaʼe sbʼaj (Mateo 6:33).

Ja kaʼtel ajyi wa spila ja kristyano bʼa chabʼ kʼole: bʼa leke sok bʼa maloʼe sok ayni jas wa xkʼulan sbʼaja matik malo. Ja wego, stsʼakatal ja Biblia, mixa xkilkʼujolan ja tuk sok wanoni skʼujolajel bʼa syajtajel yibʼanal ja kristyano (Mateo 5:44). Ja yajtanel jaw wa xjeʼa bʼa tuktukil modo. Jun sjejel, xcholjel ja lekil rason sbʼaja sGobyerno ja Dyos. Jela gustoʼaxiyon yiljel ja aʼtel it wa xyijan ja lamanil sok ja gustoʼil, sok wa xyayi ja kristyano jun meran smajlajel.

Yajelkan ja jastik junuk bʼa skʼabʼ ja Jyoba yaʼunej jtaʼ lamanil. Jkʼuʼunejni lek ke ja Kʼuluman, mini oj yakan bʼa tolabida ja kristyanoʼik sok ja chanteʼik oj yiʼe wokol yuja bʼa mi lekuki cha mini oj yakan ja tsamal jluʼumtik oj chʼayuk snajel. Bʼa jani oj ya makunuk ja sGobyerno, ojxtani stojbʼes yibʼanal ja jastik sjomunej ja kristyano (Isaías 11:1-9). Jelni gustoʼayon, pe mini jaʼukta yuja snajel sbʼaj ja smeranilik it, jani yuja wa xbʼobʼ jkoltay ja tuk bʼa ajyelyujile skʼuʼajel. Mixa xkila stʼilanil stukbʼesel ja luʼumkʼinali.