Ti kʼiyon bʼa Warialda (Nueva Gales del Sur). Ja bʼa yal lugar it bʼa wa x-aʼtijiye bʼa alaj jelni ja chejik sok ja wakax, sok wa stsʼunuwe sbʼakʼ jastik junuk sok hortalisaʼik. Chomajkil, jelni asyado sok mi jeluk ja jastik bʼa malo.

Keʼnani ja bʼajtan ja bʼa lajune untiki, ja yuj kʼe jkoltay ja jpamilya yajni ayto kiʼoj 13. Kʼe aʼtijukon bʼa yal ranchoʼik, pes yujni mi jchʼaka ja keskuela. Yajni ay kiʼoj 15 jabʼil, wa xtalnay chanteʼik sok wa xkʼajtes cimarrón kawujik.

Ja bʼa ranchoʼiki ayni slekil sok swokolil. Jelni xkʼulan gusto ja jas wa xkʼulani sok ja bʼa wala aʼtijiyoni. Ja bʼa akwali wani la ochyon kulan mojan bʼa stiʼ kʼakʼ sok wa xkʼela ja luna sok ja satkʼinal bʼa bʼutʼel kʼanalik, malan wanon yabʼjel stsamalil ja yikʼil wa x-eljan ja bʼa alajiki. Wani xpensaraʼan ke ayni maʼ skʼulunej yibʼanal ja jastik jaw jel tsamali. Pe xiwelani sbʼaj ayon yuja ay kristyanoʼik mi lek smojtajele. Ja tuk aʼtijumiki wa xkʼumaniye malo sok jel snukʼuwe may, ja yuj cha kʼeni jkʼuluk ja keʼn.

Tixa wajyon bʼa Sydney yajni ay kiʼoj 18 jabʼil. Jleʼa modo bʼa xchapjel jbʼaj bʼa oj ochkon soldado, pe mini kʼulajiyon resibir yuja mi chʼakelukuj ja eskuela. Bʼobʼni jtaʼ jun kaʼtel sok ti kanyon jun jabʼil ja bʼa chonabʼi. Tini tiw jnaʼa sbʼaje sbʼajtanil ekʼele ja testigoʼik bʼa Jyoba. Kalani oj wajkon yajni slokowone june ja bʼa stsomjeleʼi sok wegoxta jnaʼa ke jani ja smeranili.

Pe tʼusan tsaʼan kala oj cha kumxukon ja aʼtel bʼa alaji. Ti wajyon kulan bʼa Goondiwindi (Queensland). Ja tiw jtaʼa jun kaʼtel, nupaniyon, sok tristeni yabʼjel, kʼe kuʼe.

Ja keʼn soka jcheʼumi ajyi chabʼ kuntikiltikon. Tʼusan tsaʼan ja yajni pojkiye kʼeni jpensaraʼuk sbʼaja jas wanon skʼulajel ja bʼa jsakʼanili. Anto ti juljkʼujol ja jas jmaklay ja bʼa tsomjelal jaw ja bʼa Sydney sok kala ay jas oj jkʼuluk.

Jtaʼa jun poko rebista Ja Juʼun Cholumani. Ja tiw ti wa xtax ja direksyon bʼa Naʼits Betel yiʼoje ja testigoʼik bʼa Jyoba ja bʼa Australia, ja yuj jtsʼijbʼan bʼa skʼanjel jkoltajel. Sok ja sjakʼjeli, jak yulatayon jun Testigo jel lek smodo sok jel xyajtani sok kʼe jkʼul estudiar soka yeʼn.

Yajni mas wanon skʼulajel estudiar, och kaʼ jbʼaj kuenta ke tʼilani oj jtukbʼes ja jsakʼanili. Ajyi jun teksto bʼa jelni kʼot jbʼaj: jaʼa 2 Corintios 7:1, bʼa wa slokowotik yajel «eluk yibʼanal ja jas wa xya kuxbʼuk ja kuerpoʼal».

Kala oj kakan ja yujeli sok ja snukʼjel mayi. Mini pasil waj bʼa keʼna, pes yujni jelxa kʼajyelon. Pe jtsaʼunejxa bʼa yajel makunuk ja jsakʼanil bʼa lek ayil ja Dyosi. Ja jas jel skoltayon jani snochjel ja rason bʼa Romanos 12:2, bʼa wa xyala: «Awikxakan ja jastal wa sjomowex ja luʼumkʼinal it; mas lek tukbʼesa bʼajex yajel tojbʼuk jawa pensarexi». Kaʼa jbʼaj kuenta, ke bʼa stukbʼesel ja jsakʼanili, tʼilani oj jtukbʼes ja jastal wa xpensaraʼani sok yiljel jastalni wa xyila ja Dyosi: jun jasunuk wa xjomwani. Soka skoltanel ja yeʼn, lajxikuj skʼulajel.

Ama jachuk, ja jasa mas wokol kabʼi jani yajelkan kʼumanel malo. Wanxani xnaʼa ja rason wa xyaʼa ja Biblia ja bʼa Efesios 4:29: «Mok eluk ja bʼa wa tiʼex kistal yaljelik», pe ama jachuk yiʼajkuj tyempo yajelkani. Jun jasunuk skoltayon jani spensarajel ja jas wa xyala ja Isaías 40:26. Sok sbʼaja kʼanaliki, ja bersikulo jaw wa xyala: «Jachawik jawa satex bʼa satkʼinal sok kʼelawik. ¿Machun skʼulunej ja jastik junuk it? Yeʼnani ja Maʼ wa xya eljan jastal jun nole soldado sok wa xyajtabʼan jujune; spetsanil wa skʼuman sok sbʼiʼil. Yuja mi xkʼot tekʼan ja yipi sok yuja jel chamyabʼjel ja yipi, naka teye yibʼanal». Ja yuj ta ja Dyos ayiʼoj ja ipal bʼa skʼulajel ja niwan sutsatkʼinali, bʼa jel xkʼulan gusto skʼeljel, seguroni ayon ke ojni cha yaki kip bʼa stukbʼesel jbʼaj sok bʼa lek ayil-on. Stsʼakatal yuja jel kayi orasyon sok kayi gana, lajxikuj skʼulajel sok kaʼakan kʼumanel malo.

Yuja talna chanteʼoni, mini bʼa jel ochelon loʼil soka kristyano, pes yujni mi jeluk swinkil ja bʼa ranchoʼik wala aʼtijiyoni. Pe stsʼakatal ja chapjelal ajyikuj ja bʼa stsomjele ja testigoʼik bʼa Jyoba, jnebʼa jastal ochel loʼil. Bʼa tuk jasunuk, ja chapjelal jaw sjeʼaki jastal ochel loʼil soka kristyanoʼik bʼa xcholjel yabʼye ja lekil rason sbʼaja sGobyerno ja Dyosi (Mateo 6:9, 10; 24:14).

Ayxa jujuntik jabʼil aji ochkon ansyano ja bʼa kongregasyon. Juni cholal bʼa keʼna skoltajel ja janekʼ wa xbʼobʼkuj ja kermanoʼiki. Pe ja slekilal mas chaʼanyabʼali jani bʼobʼel yaʼteltajel ja Jyoba lajan soka kala tojil cheʼumi sok ja kuntikiltikoni.

Wani xkayi tsʼakatal ja Jyoba yuja yaʼunejkan oj jnebʼ bʼa yeʼna, ama mi jel chapanukon (Isaías 54:13). Akuerdoni ayon lek soka jas wa xyala ja Proverbios 10:22: «Ja slekilal wa xyaʼa ja Jyoba jani ja jaw wa xyaʼa rikesaʼili». Ja keʼn soka jpamilya jelni xkʼanatikon snebʼjel mas bʼa Jyoba sok yaʼteltajel bʼa tolabida.