«Mi jas akuerdo bʼobʼel kʼotkotik ta wa xbʼobʼ alxuk ke ay sbʼiʼil ja Dyosi. Lekbʼi ayuk, cha mini oj jnatik jas sbʼiʼil (ja maestro David Cunningham, ja bʼa slibro Theological Studies).

Yeʼn mismo yala ja Dyos: «Keʼna Jyoba. Jani jaw ja jbʼiʼili» (Isaías 42:8). Ja bʼiʼilal Jyoba jun bʼiʼilal ti jakel bʼa hebreo bʼa wa stojolan «Keʼn oj Kʼotkon ja Jastalni wa xKʼana» (Éxodo 3:14).

Ja Jyoba wa skʼana ke oj katik makunuk ja sbʼiʼil. Ja Biblia wa xyala: «Patawikyi skʼujol ja bʼa sbʼiʼili, ja bʼa jas skʼuluneji awik snaʼ ja chonabʼik. Cholowik ja sniwanil sbʼiʼili» (Isaías 12:4).

Ja Jesús ya makunuk ja sbʼiʼil ja Dyos sok sjeʼayi ja snebʼumaniki. Pes bʼa jun ekʼele yayi orasyon ja sTat yaljel: «Kaʼunej snaʼe jawa bʼiʼili». ¿Jas yuj skʼulan? Ja yeʼn cha snochoyi: «Bʼa jachuk ja yajalkʼujol ayajtayonsoki ti oj ajyuksoke sok jaxa keʼn lajan oj ajyukonsoke» (Juan 17:26).

Ja paklanum Walter Lowrie stsʼijbʼan: «Ja winik bʼa mi snaʼa jas sbʼiʼil ja Dyosi mini meranuk wa snaʼa sbʼaj [...] sok mini xbʼobʼ syajtay ta kechan wa snaʼa sbʼaj jastal jun tikʼe ipal».

Jun winik sbʼiʼil Victor bʼa wa xwaj kada semana ja bʼa iglesya, pe mi jas snaʼa sbʼaj bʼa Dyos. Ja yeʼn wa xyala: «Yajni jnebʼa ke ja Dyosi sbʼiʼil Jyoba, kabʼ bʼa lajansok kʼulajitikon presentar. Man kʼot jnaʼ sbʼaj ja maʼ jel kabʼunej wa xtaji tiʼali. Ja Dyos kʼot kil june maʼ sakʼan ay, sok man tyempo jaw kʼot kamigoʼuk».

Jaxa Jyoba, wa xmojxisok ja «matik [...] wa spensarane sbʼaja sbʼiʼili» sok wa skʼapa: «Oj jeyile yajulal kʼujol, jastalni jun winik wa sjeʼayi yajulal kʼujol ja uninal bʼa wa x-aʼteltajiyuji» (Malaquías 3:16, 17). Ja Dyosi cha wa xya koʼyi slekilal ja matik wa skʼumane ja bʼa sbʼiʼili. Ja Biblia wa xyala: «Spetsanil ja maʼ wa spatayi skʼujol ja Jyoba bʼa sbʼiʼil ojni staʼ skoltajel» (Romanos 10:13).