YOLOMAJEL JA BʼA SPATIKI | ABʼALIK BʼA WA XYA JITSKOTIK SOKA DYOS
Ja abʼal bʼa yaʼakan mi oj naxuk sbʼaj ja Dyosi
JA JAS WA XYALA JA KRISTYANO
Ja oxe iglesya mas niwak bʼa wa xyalawe snochumane Kristo wa skʼuʼane ke ay jun Dyos bʼa oxe kristyano: ja Dyos Tatal, ja Dyos Uninal sok ja Dyos Espíritu Santo. Pe ja yeʼnle wa xyalawe ke mi skʼuʼane bʼa oxe Dyos, jani ke ja oxe kristyano jaw kechanta kʼotele jun Dyos.
JA JAS WA XYALA JA BIBLIA
Ja Jesús, ja Yunin ja Dyos, nunka yala ke junxta kʼotel jastal sTat. Jaʼuktoma, ja yeʼn yala: «Wajumon soka Tatali, yujni ja Tatali mas ekʼxel yuja keʼn» (Juan 14:28). Chomajkil, yalayabʼ ja it june ja snebʼumanik: «Oj kʼekon ja bʼay ja jTati sok jawa Tatexi, ja jDyosi sok jawa Dyosexi» (Juan 20:17).
Ja espíritu santo mini jun kristyanoʼuk. Ja bʼajtan nochumanik Kristo «och sbʼaje ja yip ja Dyosi», sok ja Jyoba yalayabʼye: «Oj jpekʼ jun parte ja kip sbʼa tuktukil tikʼe kristyano» (Hechos 2:1-4, 17). Ja espíritu santo mini parteʼuk bʼa oxe Dyos, jani ja yip ja Dyos bʼa wan aʼtel.
¿JAS YUJ TʼILAN OJA WIL STʼILANIL?
Ja catolicoʼik paklanumik bʼa Biblia Karl Rahner sok ja Herbert Vorgrimler, wa xyalawe ke ja oxe dyos staʼunej sbʼaji «mini oj bʼobʼ naxuk ta mi ay jas xchiktesji, sok tsaʼan yajni xchiktesji mini oj cha bʼobʼ abʼxuk stojolil yibʼanal». Pe ¿wan maʼ xbʼobʼ jyajtaytik june bʼa mi xbʼobʼ jnatik sbʼaj sok mi xbʼobʼ abʼxuk stojol? Miyuk. Ja yuj, ja skʼuʼajel bʼa oxe dyos staʼunej sbʼaj wa stimawotik bʼa syajtajel ja Dyosi.
Ja Marco, bʼa tax tiʼal ja bʼa bʼajtan artikulo, yila ke ja skʼuʼajel bʼa oxe dyos staʼunej sbʼaj aji wokolanuk bʼa oj snaʼ sbʼaj ja Dyos. Wa xyala: «Wa xpensaran ke ja Dyosi wan snakʼjel ja jastal kʼotel, yuja jaw mini xbʼobʼ naxuk sbʼaj». Pe «ja Dyosi mini jun Dyosuk bʼa mi xbʼobʼ abʼxuk stojol» (1 Corintios 14:33, La Biblia de las Américas). Ja yeʼn mi snakʼa ja jastal kʼoteli, wani xchikteskitik. Ja Jesús yala: «Ja keʼntikoni wa xtoyotikon ja jas wa xnaʼatikon sbʼaji» (Juan 4:22).
Ja Marco wa snocho xcholjel: «Yajni jnebʼa ke ja Dyosi mi parteʼuk bʼa oxe dyos staʼunej sbʼaj, bʼobʼxa kamigoʼuk». Ja yuj, ta wa xkilatik ja Jyoba jastal jun kristyano sok mi june jastal mi xbʼobʼ naxuk sbʼaj, masni pasil oj kʼot jyajtaytik. Ja Biblia wa sjeʼa: «Ja maʼ mi xyajtani mitoni xkʼot snaʼ sbʼaj ja Dyosi, yujni ja Dyosi yajalkʼujolal» (1 Juan 4:8).
