«Ja matik mulanik wa chamye wego wa xwajye bʼa inpierno ja yajni wa xchamye sok ti wa xyiʼaje wokol ja bʼa inpierno, ‹ja kʼakʼ bʼa tolabida wa x-ajyi›» (Catecismo de la Iglesia Católica). Cha jujuntik olomalik bʼa relijyon wa xyalawe ke ja matik teye ja bʼa inpierno najatlek aye soka Dyosi.

«Ja kristyano maʼ wa xkoʼ mulali, yeʼnani wa xchama» (Ezequiel 18:4). Ja matik chamelexa «mixato jas snaʼawe» (Eclesiastés 9:5). Ja yuj ta ja kristyano wa xchami sok ja matik chamelexa mixato jas snaʼawe, ¿jastal oj bʼobʼ yiʼe wokol ja bʼa «kʼakʼ bʼa tolabida wa x-ajyi» ma ja bʼa pilan wa x-ajyiye bʼa tolabida soka Dyos?

Ja bʼa Biblia, ja bʼa hebreo sok griego ke wa sutuwe ja yaljel «inpierno» wa stojolan jun lugar kechan wa senyaʼan, ja «kʼeʼen» bʼa wa xwaj ja kristyano. Jun sjejel, yajni ja Job yiʼaj wokol yuj jun tsatsal chamel, yayi orasyon ja Dyos: «Tiʼukxta bʼi kechan nakʼawon ja bʼa kʼeʼen» (Job 14:13, Nueva Versión Internacional). Ma ja jastal wa sutu ja La Sagrada Biblia, bʼa Guillermo Jünemann, «ja bʼa inpierno». Ja Job mini skʼana oj ajyuk bʼa jun lugar bʼa yijel wokol bʼa najat-ay soka Dyos; kechantani wa skʼana oj jijluk ja bʼa kʼeʼen.

Yiljel ja Dyos jastal june maʼ jel malo wa xya jitskotik soka yeʼn. Ja Rocío bʼa México, wa xcholo: «Ja yajni chʼinonto jejiki ke merani ay ja inpierno. Jelni la xiwyon yuja Dyos bʼa mini xbʼobʼ jkʼuʼuk ta ayiʼoj lekil modoʼalik. Wa xpensaran ke tolabida tajkel ay sok mi tʼun snaʼa yajulal.

Ja jas wa xyala ja Biblia sbʼaja Dyos sok ja jastal wa xtax ja chamwiniki tukbʼi ja jastal wa spensaran ja Rocío. Ja yeʼn wa xjul skʼujol: «Kabʼ elyon libre, bʼa lajansok aji elki jun jasunuk jel al bʼa jkuchunej. Kʼot jnaʼ ke ja Dyosi wa skʼana ja jas mas lek bʼa keʼntik, ke wa syajtayotik sok ja keʼn ojni bʼobʼ jyajtay. Ja wego wa xkila jastal jun tatal bʼa yajxta wa stalnay ja yuntikili sok wa skʼana ja jas mas lek bʼa yeʼnle» (Isaías 41:13).

Jitsan kristyano ay srelijyone yuja wa xiwyeyuj ja inpierno, pe ja Dyos mi skʼana oj kaʼteltaytik yuj xiwel. Ja Jesús yeʼn mismo yala: «Yajtay ja Jyoba wa Dyos» (Marcos 12:29, 30). Pe yajni wa xcha kabʼtik stojol ke Dyos mi skʼulan ja bʼa jas mi stojoluk, masni pasil oj jipjkʼujoltik ke tojni oj kʼulwanuk jusgar ja bʼa tyempo ti jakumi. Jastalni ja Elihú, ja yamigo ja Job, ojni bʼobʼ kaltiksok seguro: «¡Mini sbʼejuk spensarajel ke ja Dyos oj skʼuluk ja bʼa malo, ke ja Maʼ kechan jela yipi oj skʼuluk ja bʼa mi tojuki!» (Job 34:10, Nueva Versión Internacional).