Ay kristyanoʼik bʼa jelni wokol xyabʼye syajtajel ja Dyos, yujni wa spensarane ke mi xbʼobʼ naxuk sbʼaj, jel najat ay ma jel malo. Ila jasa yaluneje jujuntik:

• «Ama wa xkʼanayi jkoltajel ja Dyos, pe wa xkabʼ jelni najat ay jmok. Wa xkabʼ mini oj bʼobʼ jnaʼ sbʼaj sok bʼa mini jas wa xyabʼi» (Marco, Italia).

• «Wani xkʼana oj kaʼteltay ja Dyosi, pe wa xkabʼ mini xbʼobʼ naxuk sbʼaj. Wa xkila jastal jun Dyos bʼa jel malo bʼa kechan wa skʼana oj skʼulukotik kastigar. Mini xkʼuʼan ta ayiʼoj lekil modoʼalik» (Rosa, Guatemala).

• «Ja yajni chʼinonto wa xkʼuʼan ke ja Dyosi kechan jaʼ wa xwaj skʼujol ja jas mi lek xkʼulantiki bʼa oj skʼulukotik kastigar. Tsaʼan kʼe kil jastal june bʼa jel najat ay, bʼa jach jastal june bʼa ay xchol bʼa wa xyaʼa mandar ja kristyano pe mi wa chamskʼujol bʼa yeʼnle» (Raimunda, Canadá).

¿Jaxa weʼn jas waxa pensaran? ¿Meran maʼ mi xbʼobʼ jyajtaytik ja Dyos? Jitsan kristyano, ama ay srelijyone, yaʼunej sbʼaje ja sjobʼjel it bʼa jitsanxa jabʼilik. Ja bʼa jabʼil 500 man mojan bʼa jabʼil 1500 t.J, tʼusan mi yibʼanaluk ja kristyano mi xyaweyi orasyon ja Dyos. ¿Jas yuj? Yujni wa xiwye yuj. Ja paklanum Will Durant jach yala: «¿Jastal oj bʼobʼuk ke jun mulanum oj waj yayi ja yorasyon bʼa jun trono jel najat ay sok bʼa jel xiwela sbʼaj?».

¿Jasa ikʼubʼal ja kristyano bʼa oj spensaraʼuk jachuk bʼa Dyos? ¿Jasa wa sjeʼa meran ja Biblia? ¿Mas maʼ pasil oj bʼobʼ yajtaytik ta jnaʼatik ja smeranil sbʼaja yeʼn?