Jun kʼakʼu, ja Jesús staʼa tiʼal sbʼaja sTat Jyoba ja bʼa Jerusalén, sok xchiktes ja jastal chabʼ kara aye ja olomalik bʼa relijyon ja bʼa tyempo jaw (Juan 8:12-30). Ja jas yala wa sjeʼakitik jastal tʼilan oj paklaytik ja skʼuʼajelik bʼa Dyos mas jel naʼubʼalik sbʼaji. Ja yeʼn yala: «Ta mixa jipawexkan ja jastik wa xjeʼa, kʼotelexni mero jnebʼumanik; oja naʼex sbʼaj ja smeranili, jaxa smeranili oj ya elanik libre» (Juan 8:31, 32).

Yajni yala «Ta mixa jipawexkan ja jastik wa xjeʼa», ja Jesús wan yaljelkabʼtik jastal oj jnatik ta jun skʼuʼajel meran ma miyuk. Yajni ay jas x-alji awabʼ bʼa Dyos, jobʼo abʼaj: «¿Wan maʼ syaka sbʼaj ja jaw soka yaljelik bʼa Jesús, wa xkʼan alxuk, ja jastik sjeʼa, sok ja tuk jastik wa xtax ja bʼa Yabʼal ja Dyos?». Kʼulan junxta ja jas skʼulane ja matik smaklaye ja jekabʼanum Pablo: paklay lek ja Biblia bʼa yiljel ta ja jas alubʼala wabʼi meraniʼa (Hechos 17:11).

Jani jaw ja jas skʼulane ja Marco, ja Rosa sok ja Raimunda, ja it taxyeta tiʼal ja bʼa bʼajtan artikulo: skʼulane estudiar ja Biblia soka testigoʼik bʼa Jyoba. ¿Jasa snebʼawe?

Marco: «Ja Testigo maʼ yakitikon estudio jaʼ wa xya makunuk ja Biblia bʼa oj yayi sjakʼjel ja sjobʼjel kiʼojtikon soka jcheʼumi. Takal takal kʼe jyajtaytikon ja Jyoba sok cha tsatsbʼi ja jnupaneltikoni».

Rosa: «Wa xpensaran ke ja Biblia kechan jun libro bʼa biboʼil bʼa wa sleʼa modo oj xchol machunkiluk ja Dyos yajel makunuk pensarik bʼa kristyano. Pe yajni ekʼ ja tyempo kʼot jtaʼ tiw ja sjakʼjelik ja sjobʼjelik kiʼoji. Ja wego, wa xkila ja Jyoba merani sakʼan ay, june maʼ wa xbʼobʼ jipjkʼujol».

Raimunda: «Jkʼanayi ja Dyos bʼa oj skoltayon snajel sbʼaj. Tʼusan tsaʼan, ja keʼn sok ja jtatami kʼe jkʼultikon estudiar ja Biblia. ¡Man jnebʼatikon ja smeranil bʼa Jyoba! Jel gustoʼaytikon yuja jnaʼatikon jas tikʼe Dyos kʼotel».

Ja Yabʼal ja Dyos, ja Biblia, mi kechan wa stojo ja abʼalik alubʼal sbʼaja Dyos, cha wa sjeʼa ja tsamalik smodo. Chomajkil, wa skoltayotik snajel ja «jastik yaʼunejkitik sok spetsanil skʼujol ja Dyosi» (1 Corintios 2:12). ¿Jas yuj mixa paklay weʼn mismo ja jas wa sjeʼa ja Biblia sbʼaja Dyos, ja jas wa skʼana sok ja jas wa xmajlaytik ja bʼa tyempo jakumi? Oj bʼobʼa kʼum mas sbʼaja jastik it jel tʼilan bʼa www.pr418.com/toj ja bʼa xetʼan «Sjejelik bʼa Biblia > Sjobʼjelik sbʼaja Biblia». Ja tiw oj cha bʼobʼa kʼan bʼa oj yawi jun estudio bʼa Biblia jun testigo bʼa Jyoba. Ta wa kʼulan, ojni awil ke wani xbʼobʼ jyajtaytik ja Dyos.