Michelle: Saʼan Sofía. Jel lek ja jta’awa ja b’a wa naji.

Sofía: Cha jachuk ja keʼn jel xyaki gusto jawa xkilawa.

Michelle: Ja último ekʼele jakyoni kalatik sbʼaja jastal wa xyabʼ ja Dyos jawa xyila ja jwokoltiki. * Ja weʼn awalkabʼ ayxa jitsan jabʼil wana yajelabʼaj ja sjobʼjel jaw, pe mastoni ja yajni staʼa jun desgrasya jawa nani. ¿Jastal ay ja yeʼn?

Sofía: Ayni kʼaʼuj lek ay sok ayni miyuk, pe lek ay ja wego.

Michelle: Wa xyaki gusto. Bʼobʼta mini pasiluk ajyel gusto yuja jastal wala taxi.

Sofía: Ja’i, ayni wa xjobʼo jbʼaj janekʼto tyempo oj kitik wokol.

Michelle: Ayni sbʼej yuja jach waxa pensarani. Bʼobʼta wa xjula kʼujol ke ja tsaʼanxta ekʼele kulataya jobʼowi jas yuj ja Dyos wanto yajelkan bʼa oj ekʼ wokolik ta ayni yiʼoj ja ipal bʼa xchʼayjel snajel.

Sofía: Wan, wa xjul jkʼujol.

Michelle: Bʼajtanto oj kiltik ja jas wa xyala ja Biblia, la ka juljkʼujoltik jujuntik jastik kalatik ja pilan ekʼeleʼi.

Sofía: Lekniʼa.

Michelle: Bʼajtan, jnebʼatik ke jun winik ja bʼa tyempo najate sjobʼo sbʼaj jas yuj ja Dyos wanto yajelkan a’ekʼuk wokolik, sok mi utji yuja Dyosi sok mi aljiyabʼ wanto skʼanayuj skʼuʼajel.

Sofía: Mini xnaʼa ajyi ja jaw.

Michelle: Cha jnebʼatik ke ja Jyoba mini tʼun lek xyila jawa xkiʼajtik wokoli. Ja Biblia wa xyala ke ja bʼa tyempo najate, yajni ja xchonabʼ wa xyiʼaj wokol, «ja wokol ekʼ sbʼajeʼi jelni yaj yabʼ ja yeʼn». * ¿Mi maʼ wani xyaʼa kulan jkʼujoltik snajel ke ja Dyos wa xyabʼ syajal ja jwokoltiki?

Sofía: Waniʼa.

Michelle: Sok yuja wa xkʼuʼantik ke jelni juntiro ja yip ja Dyosi ayni yiʼoj ja jas wa xmakuni bʼa ay jas oj skʼuluk chikan jas ora sok xchʼayjel snajel ja wokoliki.

Sofía: Jani jaw ja jas mi xkabʼ stojoli. ¿Jas yuj wanto yajelkan oj ekʼ jitsan jastik bʼa mi lekuk ta ayiʼoj ja ipal bʼa xchʼayjel snajel?

Michelle: La kiltik ja bʼajtan libro b’a Biblia, ja Génesis. ¿Wan maʼ xa naʼa sbʼaj ja loʼil bʼa Adán soka Eva sok ja sat teʼ mi xbʼobʼ loʼxuki?

Sofía: Wan, jejiki yajni katoliko wajyoni. Aljiyabʼye yuja Dyos bʼa mok sloʼe ja sat jun teʼ, pe ja yeʼnleʼi mini skʼuʼane.

Michelle: Jachukniʼa. Pe la kiltik jasa ekʼ bʼajtanto yuja jaw, pes jani mero ti chʼikansok ja swokol ja kristyanoʼiki. ¿Oj maʼ bʼobʼa kʼumuk ja Génesis, kapitulo 3, bersikulo 1 man 5?

Sofía: Lek, wa xyala: «Pe ja bʼitsʼbʼichani kechani yeʼn ja mas chʼabʼanxta ajyi ekʼ yuja tuk kʼakʼal chanteʼik bʼa kʼul skʼulunej ja Jyoba Dyos. Anto, yala yabʼ ja ixuki: ‹¿Meran maʼ lek ja Dyos yalunej awabʼyex mi oja loʼex ja tekʼulik tey bʼa kʼachinubʼi?›. Pe ja Dyosi yalunej sbʼaja teʼ tey bʼa snalan ja kʼachinubʼi: ‹Mokni aloʼex ja sati, miyuk, mokni ayam-ex; mikʼa ojni chamanik›. Jaxa bʼitsʼbʼichani ti yala yabʼ ja ixuki: ‹Meran lek, mini oj chamanika. Yujni ja Dyosi snaʼunej ja kʼakʼu xa loʼowex ja tekʼuli, oj jamxuk jawa satexi sok ojni kʼotanik jastal Dyos, snajel ja bʼa leki soka bʼa mi lekuki›».

Michelle: Tsʼakatal. La jpaklaytik ja bersikuloʼik it. Bʼajtan wa xyala ke jun bʼitsʼbʼichan skʼuman ja Eva. Jaxa bʼa pilan parte bʼa Biblia wa xyala ke yeʼnani ja Dyablo, ja Satanás, sok ya makunuk jun bʼitsʼbʼichan bʼa oj kʼumanuk. * Ja yeʼn sjobʼoyi ja Eva sbʼaja mandar ajiyile yuja Dyos bʼa mi oj sloʼe jun tekʼul. ¿Jasa aljiyabʼye yuja Dyos ja Adán soka Eva ke oj ekʼ sbʼaje ta skʼokowe ja abʼal jaw?

Sofía: Ojni chamuke.

Michelle: Jachukni’a. Tsaʼan ja b’a jaw, ja Dyablo sleʼayi jun chaʼan smul ja Dyosi. Kʼela ja jas yala: «Meran lek, mini oj chamanika». ¡Wan yaljel ke juni leʼa abʼal ja Dyosi!

Sofía: Ja jaw mini bʼa kabʼuneja.

Michelle: Sok yajni yala ke jun leʼa abʼal, ja Satanás ya ajyuk jun sjobʼjel bʼa ojni yi jitsan tyempo sjakʼjel. ¿Wan maʼ xa naʼa jas yuj?

Sofía: Mmm... Ja smeranili miyuk.

Michelle: La kiltik soka sjejel it. La kaltik ke jun k’ak’u ja ke’n wala jakyon sok wa xkalawab’ ke mas ay kip ja ke’n yuja weʼn. ¿Jastal oja jeʼ ke mi stojol ayukon?

Sofía: Bʼobʼta sok jun preba bʼa yiljel machun mas ay yip.

Michelle: Jachuk. Bʼobʼta ojni bʼobʼ jletik jun jasunuk b’a al sok yiljel machun mas ay yip. Sok jachuk oj kʼot naxuk.

Sofía: Wa xkabʼ stojol.

Michelle: Pe ¿jaxa lekbʼi xleʼa wa mul ke waxa leʼa abʼal? ¿Anke masni tukxa ja jaw?

Sofía: Masniʼa.

Michelle: Ja modoʼal jaw mini xbʼobʼ ilxuk kechantasok jun preba.

Sofía: Meraniʼa.

Michelle: Ja smeranili, bʼa jachuk oja jeʼ ke mixa leʼa abʼal jani yajel ekʼ tyempo bʼa jachuk ja tuk oj yil-e jawa modo.

Sofía: Ayni sbʼeja.

Michelle: Oj cha kiltik yajkʼachil ekʼele ja sjejel bʼa Génesis. ¿Yala maʼ ja Dyablo ke mas ay yip ja yeʼn ke yuja Dyosi?

Sofía: Miyuk.

Michelle: Ja Dyosi jelni pasil oj sjeʼ ke mi jachukuk. Ja Satanás yala ke ja Dyosi wani sleʼa abʼal. Bʼa tuk yaljel, ja yeʼn yala yabʼ ja Eva: «Ja yeʼn wan slejelawi abʼal; ja keʼn wanon yaljela wabʼ ja smeranili».

Sofía: Jelni chaʼanyabʼal.

Michelle: Ja Dyosi jelni bibo sok wani snaʼa lek ke ja jastal mas lek oj xchiktes ja abʼal sleʼunej ja Dyablo jani yajel ekʼ tyempo. Sok jachuk oj bʼobʼ chiknajuk jaman lek machunkiluk sleʼunej abʼal.

Sofía: Pe yajni cham ja Eva, ¿anke tini sjeʼa ja Dyos ke wani yaljel ja smeranili?

Michelle: Ja bʼa modo jaw jachni. Pe ja jas yala ja Satanás mini kechan jaʼuk ja jaw. Cha kʼela ja bersikulo 5. ¿Jas pilan jasunuk yalayabʼ ja Dyablo ja Eva?

Sofía: Ke ta sloʼo ja sat teʼi ojni jamxuk ja sati.

Michelle: Jachukniʼa, sok ta sloʼankʼa ojni kʼotuk «jastal Dyos, snajel ja bʼa leki soka bʼa mi lekuki». Sok wan slejelyi smul ja Dyos bʼa wa stima ja kristyanoʼik bʼa jun jasunuk bʼa lek.

Sofía: Ahh, jachukniʼa.

Michelle: Sok ja jaw wajni jun chaʼan mulal.

Sofía: ¿Jastal? Mi xkabʼ stojol.

Michelle: Kʼela, ja Dyablo yani yabʼ stojol ja Eva ke mastoni lek oj ajyuke ja mi oj tojukeyuj ja Dyosi, sok jachni yayi ekʼuk spetsanil ja kristyanoʼiki. Ja Jyoba cha wani snaʼa ke ja bʼa jasunuk it mastoni lek oj yayi tyempo ja Dyablo bʼa jachuk oj cha sjeʼ ta meran ja jas yaluneji. Ja yuj yakan bʼa oj ya mandar bʼa jun tyempo ja bʼa Luʼumi. Ja yuj jelni wokol ja bʼaytiki: yujni ja meran mandaranum ja bʼa luʼumkʼinal it jani ja Dyablo, sok mi jaʼuk ja Dyosi. * Pe ayni kiʼojanawi lekil rasonik.

Sofía: ¿Lekil rasonik?

Michelle: Jaʼi, ja Biblia wa sjeʼa jun jasunuk jel tsamal sbʼaja Dyosi. Wa xyala ke ja Jyoba tey mojan jmoktik ja yajni wantik yijel wokoli. Jun sjejel, la kiltik jasun stsʼijbʼakan ja rey David ja bʼa Salmo 31:7. Ja yeʼn jelni yiʼaj wokol bʼa snajtil ja sakʼanili, pe ila ja jas yalayabʼ ja Dyos. ¿Wan maʼ xa kʼana oja kʼumuk ja bersikulo?

Sofía: Lek, wa xyala: «Gusto lek oj ajyukon ja b’a wa yajalkʼujol mey stikʼanili, yujni awilunej ja jwokoli; tixta waxa kʼela ja jchamkʼujolik mas nakʼani».

Michelle: Ja yuj ama jel yiʼaj wokol, ja David wani x-ajiyi kulan skʼujol snajel ke ja Jyoba wani xchʼak yil yibʼanal ja jas wan ekʼel sbʼaji. Jaxa weʼn, ¿wan maʼ xyaʼa kulana kʼujol snajel ke ja Jyoba wa xyila spetsanil, asta ja jastal wa xkabʼ ayotik bʼa jel syajbʼesotiki sok mini xbʼobʼ yabʼye stojol ja tuki?

Sofía: Jaʼi, jelniʼa.

Michelle: Chomajkil, ja Biblia wa xyala ke ja yeʼn mini oj yakan bʼa oj kitik wokol bʼa tolabida. Cha wa sjeʼakitik ke ojxtani xchʼay snajel ja sgobyerno ja Satanás bʼa jel malo sok oj stojbʼes spetsanil ja jas sjomuneji. Asta ja wokolik kuchelawuj ja weʼn soka wa nani. ¿Lek maʼ xa wila oj kumxukon ja bʼa semana jakum? Wa xkʼana oj jeʼawi jas yuj wa xbʼobʼ jkʼuʼuktik lek ke tʼusanxta skʼana bʼa oj xchʼay snajel ja wokolik ja Dyosi. *

Sofía: Lek, lekni xkʼabʼa.