Ti pojkiyon sok kʼiyon bʼa jun barrio jel pobre mojan yiʼoj ja Roma. Ja jsakʼanili jelni wokol waji. Mini jnaʼa sbʼaj ja jnani sok cha mini tʼun lek kʼot kil jbʼaj soka jtati. Kʼiyon yijel ja jsakʼanil jastal june maʼ ti wa x-ajyi ekʼ bʼa calle.

Kʼe elkʼanukon yajni ay kiʼoj lajune jabʼil sok yajni ayxa kiʼoj 12 jabʼil sbʼajtanil ekʼele elyon ja bʼa jnaji. Bʼa jun ekʼele, ja jtati tʼilani waj ya elkon bʼa skʼabʼ ja policía. Tolabida jela kʼeyon kʼumal soka kristyano sok jelni kalaxon. Yajni ayxa kiʼoj 14 jabʼil kaʼakan juntiro ja jnaji. Tixani wala ajyiyon ekʼ bʼa calle sok wa xkabʼ drogaʼik. Yajni wa x-och ja akwali, wa xjama ja karroʼik sok ti wa xkan waykon tiw man wa sakbʼi; tixa wa xleʼa jaʼ bʼa oj sakʼ ja jsati.

Jelni kʼot jnaʼ jastal ja elkʼanel. Wa xchʼak jkʼul yibʼanal: wa xkelkʼan bolsa’ik, ja jastik ay ja bʼa apartamento’ik sok ja bʼa naʼitsik bʼa akwali. Jelni jom-el ja jastal wala taxyoni, ja yuj lokjiyon bʼa ajyel bʼa jun banda jel naʼubʼal sbʼaje. Ja jaw bʼobʼni «xchap-on mas» ja yuj kʼe elkʼanukon bʼa banco’ik. Yuja jastal ja jmodo, kʼotyon june ja bʼa banda jel kisubʼal. Mini xkaʼakan ja karma; asta yajni wala wayoni ti wa xkakan yibʼel ja sen j-olomi. Ja makʼwanel, ja drogaʼik, ja elkʼanel, ja koʼel mulal sok ixuk winik, sok ja mal kʼumalik jani it ja tikʼe sakʼanil kʼe ki’i. Ja policía tolabida wa xyiʼaje jpatik sok jitsan ekʼele slutuwone. Jitsan jabʼil ti ajyiyon ekʼ bʼa calle sok bʼa preso.

B’a jun ekʼe, yajni aji elkon ja b’a preso, jpensaran oj waj kulatay june ja b’a jti’a. Ja keʼn mini xnaʼa, pe ja yeʼn sok ja chabʼ yuntikili kʼotelexani testigo b’a Jyoba. Slokowone wajel ja bʼa sreunione sok jkʼulan aseptar bʼa kechan oj kil jastal. Yajni kʼotikon ja bʼa Naʼits bʼa wa Stsomo sbʼaje, jkʼanani ti oj kulanukon bʼa stiʼ puerta bʼa oj ajyukon altanto maʼ oj ochuk sok maʼ oj eluk. Pes tini kiʼoj ja karma.

Ja reunión jaw stukbʼesni ja jsakʼanili. Wa xjul jkʼujol ja wa xpensaran: «Tʼilan oj ajyukon bʼa pilan lugar masxa lek». Spetsanile wanextani tse’e sok jelni lek sjeʼa ja smodoʼe. Man wego tey bʼaj jpensar ja jastal yilawone ja Testigoʼiki. ¡Wa xkabʼ jelxani najat wa xkankʼuj ja jsakʼanil kiʼoj ajyi!

Jkʼana oj kʼul estudiar ja Biblia soka Testigoʼiki. Yajni wanon yijel ja kestudio kaʼa jbʼaj kuenta tʼilani oj tuk’b’es ja tik’e jsakʼanil kiʼoji. Jun sjejel, jelni kila stʼilanil ja yaljelik bʼa Proverbios 13:20, b’a wa xyala: «Ja maʼ wan bʼejyel soka bibo cha ojni kʼot bibo, pe ja maʼ wa smojtay ja matik sonso mini lek oj elkʼota». Kʼot kabʼ stojol tʼilani oj jipkan ja matik wa xmojtay jbʼajsok ja bʼa banda. Mini pasiluk waji pe soka skoltanel ja Jyoba bʼobʼni jkʼuluk.

Cha kani ajyuk sak ja jkuerpo. Tʼilani jkʼujolan bʼa yajelkan yabʼjel may sok ja drogaʼiki. Jkʼutsu ja stsoʼotsil kolom, ka eluk ja jlikchikini sok kakan ja mal kʼumaliki. Sbʼajtanil ekʼele ja bʼa jsakʼanil kabʼ ojxa bʼobʼ jkom ja jastik wa xkʼulani.

Mini xkiʼaj gusto ay jas oj kʼumuk sok ja skʼulajel estudiari, ja yuj jelni wokol kabʼ oj waj kʼujol sok spiljel tyempo skʼumajel ja Biblia. Pe takal takal kʼe jyajtay ja Jyoba. Sok wegoxtani kabʼ ay jas tukbʼi bʼa keʼna: k’e syajbʼeson ja jconciencia. Jelni tuk xkabʼ ayon sok wa xpensaran ja Jyoba mini oj yaʼon perdon sbʼaja jastik mi lekuk jkʼuluneji. Ja bʼa ekʼele jaw jkʼuman ja loʼil wa staʼa tiʼal sbʼaja jastal ja Jyoba yaʼa perdon ja rey David ja bʼa chaʼan mulal koʼi, ja jaw jelni wa skoltayon (2 Samuel 11:1–12:13).

Cha pilan jel wokol kabʼ, jani xcholjel yabʼye bʼa snaje ja kristyano (Mateo 28:19, 20). ¡Wani la xiwyon oj taʼe ja matik jmakʼunej! Pe takal takal ekʼ ja jxiweli sok kʼe kabʼ stsamalil loʼilanel soka kristyano sbʼaja kala Tatik Dyosi sok ja maʼ wa x-ak’wani perdoni.

Snajel sbʼaja Jyoba skoltay ja jsakʼanili. Jitsan ja bʼa kamigo ajyi chamelexa ma teye bʼa preso. Pe ja keʼn jelni gustoʼayon sok ayni kiʼoj jun tsamal smajlajel ja bʼa tyempo jakumi. Jnebʼunej jastal oj kaʼ jbʼaj chʼinil, ajyel kʼuʼabʼal sok skomjel ja jkalaxili, stsʼakatal ja jaw jelxani lek xkila jbʼajsok ja matik sjoybʼunejon. Jelni gusto ayon ja nupanelonsok jun tsamal ixuk sbʼiʼil Carmen. Lajanxani wa xkoltaytikon ja tuk bʼa oj kʼot snebʼ-e ja bʼa Biblia.

Ja wego wanxani xkʼulan luchar ja jsakʼanil jach toj. Ay ekʼele wala aʼtijiyon bʼa bancoʼik, pe mixani bʼa oj elkʼanukon, sbʼajxani yajel ajyuk asyado.