Pensaran jun tatal wa xyala yabʼ ja yunin bʼa juke jabʼil: «Bʼa jitsanxa tyempo ekʼel, ja Dyos skʼulan ja Luʼumi sok yibʼanal ja jastik ayi. Cha skʼulan ja Kʼaʼuj, ja Luna sok ja kʼanaliki». Ja uninali kan spensaraʼuk jun jutsʼin sok tixa sjobʼoyiʼa: «Tat... ¿sok maxa kʼulajiyuj ja Dyos?».

«Ja tatali sjakʼa, mini machʼa. Ja Dyos tolanibida ajyel sakʼan». Ja ekʼele it, ja sjakʼjel it ajini gustoʼaxukan ja uninali. Pe yajni wan kʼiʼeli, sbʼaja tema it wantoni skʼana oj snaʼe. Wokolni xyabʼ yabʼjel stojol bʼa ay maʼ oj ajyuk sakʼan bʼa mi ajyelyuj skʼeʼulabʼil. «Wa spensaran, ¿jastal oj bʼobʼuk ja jaw?. Asta ja sutsatkʼinali ajyiyuj skʼeʼulabʼil». Wantoni sjobʼo bʼa stajel sjakʼjel: ¿bʼa jak ja Dyos?.

¿Jas wa xyala ja Biblia? Pes jani junxta ja jasa yala ja tatal bʼa wanto jtaʼatik tiʼali. Ja Moisés yala yabʼ ja Jyoba: «Bʼajtanto oj ajyuk ja witsiki ma oj wa ajyuk ja luʼumi sok ja luʼum wa xbʼaʼalani, bʼajni tolanibida sok tolanibida, Dyos oj ajyan» (Salmo 90:1, 2). Ja aluman Isaías jachni junxtatik yala: «¿Yuj maʼ mixa naʼa? ¿Mi maʼ awabʼunejuk? Ja Jyoba, ja Kʼuluman bʼa slechanal ja luʼumi, ja yeʼn jun Dyos bʼa tolabida» (Isaías 40:28). Sok ja skarta ja Judas, cha wa xyala ke ja Dyos ajyelni sakʼan «b’a tolabida» (Judas 25).

Ja bersikuloʼik it wani sjeʼa ja Dyos kʼotelni «Rey bʼa tolabida», jastalni ya sbʼiʼiluk ja jekabʼanum Pablo (1 Timoteo 1:17). Bʼa tuk yaljel, tolanibida ajyel sakʼan, ama chikan janekʼxa tyempo ekʼel wa xkilatik. Sok tolanibida oj ajyuk sakʼan (Apocalipsis 1:8). Ja Dyos mini ayiʼoj skʼeʼulabʼil sok mini xchʼakulabʼil; ja jaw jani june ja jas bʼajtan wa xchiktes bʼa yeʼn.

¿Jas yuj jel wokol xya kabʼtik stojol ja pensar it? Yujni ja jsakʼaniltik jel kom, soka jaw wani xya kiltik ja tyempo bʼa jun modo tuk lek ja jastal wa xyila ja Jyoba. Jun sjejel, bʼa yeʼna mil jabʼil kʼotel jastal jun kʼakʼu, pes ajyelni sakʼan bʼa tolabida (2 Pedro 3:8). La kiltik ja sjejel ti nochani. Jun jachʼbʼen ayxa skʼujol wa x-ajyi sakʼan junuk 50 kʼakʼu. ¿Oj maʼ yabʼ stojol ja jas wa stojolan ajyel sakʼan 70 ma 80 jabʼil? ¡Mini pasiluk! Pes ja keʼntik jachukotik jastal ja jachʼbʼenik jaw yajni wa xlaja jbʼajtik soka Kʼulumani. Ja jastal chapan ja jpensartik aytani jun stikʼanil yuja sbʼaji (Isaías 40:22; 55:8, 9). Ja yuj mini chamyabʼjeluk ja ay jastik ja bʼa sakʼanil mi xbʼobʼ kabʼtik stojol.

Ama wokol xkabʼtik yabʼjel stojol bʼa tolabida sakʼan ay ja Dyos, pe ayni stojol. Lekbʼi ay maʼ kʼulajiyuj ja Dyos, ja kristyano jaw yeʼnani ja Kʼuluman. Sok ja Biblia wa xyala ja Jyoba yeʼnani ja maʼ skʼulan yibʼanal ja jastik junuki (Apocalipsis 4:11). Chomajkil, ja keʼntik wani xnaʼatik ajyi jun tyempo ke ja sutsatkʼinali mito ayuk (Génesis 1:1, 2). ¿Jastal ajyi? Ja Kʼuluman ajyelxani sakʼan. Cha ajyelxani sakʼan bʼajtanto yuj oj ajyuk pilan maʼ jel bibo, jastalni ja bʼajtan Yunin sok ja anjeliki (Job 38:​4, 7; Colosenses 1:15). Anto chikani lek, bʼajtanto oj kʼe skʼuluk, ja Dyos stuchʼilni ay. Ja yeʼn mini maʼ kʼulajiyuj, pes mini jas ay, cha mini maʼ ajyi bʼajtanto yuja yeʼn.

Ja jastal sakʼan aytik, sok ja sutsatkʼinal wa xtaxi, wani sjeʼa bʼa ay jun Dyos sakʼan bʼa tolabida. Ja Maʼ kʼe ya nijkuk ja niwan sutsatkʼinal sok ya kujlajuk leyik bʼa oj stoj, pes ajyelni sakʼan bʼa tolabida. Kechani yeʼn yaʼunejyi sakʼanil ja tuk jastik sakʼan ayi (Job 33:4).