Ja bʼajtan jabʼilik bʼa sakʼanili tini ajyiyon mojan bʼa Leipzig, ja bʼa República Democrática Alemana, bʼa mi jel najat yiʼojuk ja frontera Polonia sok ja República Checa. Yajni ay kiʼoj wake jabʼil wajtikon bʼa Brasil yuja yaʼtel ja jtati, sok tsaʼan man Ecuador.

Yajni ay kiʼoj 14 jabʼil, ja jnantati cha yawe kumxukon bʼa Alemania bʼa skʼulajel estudiar bʼa jun naʼits wa xchapji yal untik. Ja wego jelxani najat ayonsoke bʼa jtuchʼilxani wa xtalnay jbʼaj. Wani xkʼulan ja jas wa xkʼana sok mini xkayi stʼilanil ta mi lek xyilawe ja tuk ja jastik wa xkʼulani.

Ja jnantati cha kumxiye bʼa Alemania yajni ayxa kiʼoj 17 jabʼil. Ja bʼajtanto tini ajyiyonsoke, pe yuja tikʼe modoʼal kiʼoji jelni wokol kabʼ skʼuʼajel ja smandare sok yajni jtaʼa 18 jabʼil elyon ja bʼa jnaji.

Tikʼanxtani wa xkabʼ mi gusto ayukon, ja yuj kʼeni leʼ stojol ja jsakʼanili. Jpaklay bʼa jitsan organisasyonik, sok kʼotni jnaʼ ke jasa mas leki jani sbʼejtajel ekʼ ja tsamal luʼumi, bʼajtanto oj xchʼay snajel ja winiki.

Jmana jun motocicleta, wajyon bʼa Alemania sok tsaʼan man África. Chomajkil, tʼusan tsaʼan tʼilani kumxiyon bʼa Europa yujni ja moto jomi. Tsaʼan yajni jtojbʼes, cha jkʼulan biajar bʼa jun playa bʼa Portugal. Ja tiw jpensaraʼan mas lek oj kakan ja moto sok skʼulajel biajar sok barko.

Wajyonsok jujuntik keremtik akʼixuk bʼa wane xchapjel sbʼaje skʼutsjel ja océano Atlántico. Ja bʼa yeʼnle tini ay ja Laurie, bʼa jani kʼot jcheʼumuk. Wajtikonsok barko man islas del Caribe, tsaʼan bʼa Puerto Rico, sok tixa kumxitikon bʼa Europa. Ja Laurie sok ja keʼn wani xkʼanatikon oj ajyukujtikon jun barko bʼa ti oj ajyukotikon tiw. Pe tsaʼan yajni oxexa ixaw wantikon slejel, tʼilani katikon kʼot tekʼan ja jas jchapunejtikon, pes kʼotyon jun soldado bʼa Alemania.

Ajyiyoni 15 ixaw jastal soldado Marina, sok ja bʼa tyempo jaw nupanitikon. Wantoni xcha jkʼanatikon skʼulajel ekʼ biajar. Tʼusan bʼajtanto ja ochyon soldadoʼil ayxani jmanunejtikon jun lancha de salvavidas, sok yajni soldadoʼonto, kʼot katikon pax jastal jun barko. Ja jas wa xkʼanatikon jani ti oj ajyukotikon tiw sok skʼulajel ekʼ biajar. Pe tʼusan tsaʼan yajni elyonkan jastal soldado Marina, sok bʼajtanto oj chʼak jtojbʼestikon ja barko, ja testigoʼik bʼa Jyoba staʼawotikon loʼil sok kʼetikon skʼulajel estudiar ja Biblia.

Ja bʼajtanto mini jpensaraʼan ta jel jas oj tukbʼes ja bʼa jsakʼanili: nupanelonsok ja ixuk kiʼoji ja wego sok yaʼunejxakan ja yabʼjel mayi (Efesios 5:5). Chomajkil, ja ajyi wani xkʼuʼan ke ja skʼulajel ekʼ biajar ja bʼa luʼumi bʼa yiljel ja tsamalik skʼulbʼen ja Dyosi, kʼotelni jun modo bʼa yajel makunuk ja jsakʼanili.

Pe ja smeranili aytoni jas oj bʼobʼ tukbʼes jbʼaj, pe mastoni ja bʼa jmodo. Jeltoni niwan xkaʼa jbʼaj, wantoni xkʼulan ja jas wa xkʼana, jelni xkʼana stoyjel jbʼajsok ja jas wa xnaʼa sok ja bʼa jas wa xlajxikuj skʼulajeli. Ja jas mas tʼilan ja bʼa jsakʼanil jani skʼulajel ja jas wa xkʼana.

Jun kʼakʼu jkʼuman ja tsamal Loʼil bʼa Yaxkʼuli (Mateo, kapituloʼik 5 man 7). Ja bʼajtanto jelni cham kila ja jas yala ja Jesús sbʼaja ajyel gustoʼili. Jun sjejel, yala ke ja gustoʼili jani sbʼaja maʼ ayiʼoj waʼin sok takin tiʼ (Mateo 5:6). Pe wa xjobʼo jbʼaj jastal oj bʼobʼ ajyuk gusto june bʼa ayiʼoj waʼin sok takin tiʼ. Yajni mas wanonto snebʼjel ja bʼa Biblia wanoni yajel jbʼaj kuenta ke kibʼanaltik tʼilani oj nebʼtik sbʼaja Dyosi sok bʼa oj bʼobʼkujtik, bʼajtan jani oj natik ke tʼilani oj nebʼtik sbʼaja Dyosi. Jachni jastal yala ja Jesús: «Jel gusto wa x-ajyiye ja matik tʼabʼan skʼujole bʼa tʼilan oj snebʼ-e sbʼaja Dyosi, yujni yeʼn sbʼaje ja Gobyerno bʼa satkʼinali» (Mateo 5:3).

Ja ke’n sok ja Laurie kʼe jkʼuluktikon estudiar ja Biblia bʼa Alemania, pe wajtikon bʼa Francia sok tsaʼan bʼa Italia. Chikan bʼaʼa ayni Testigoʼik. Ja jas jel cham kila jani ja yajtanel yiʼoje sok ja jastal tsoman aye. Kila ke meran kʼotele bʼa jun ita pamilya (Juan 13:34, 35). Ekʼ ja tyempo kiʼajtikon jaʼ.

Ama kʼotelonxa testigo bʼa Jyoba, aytoni jas mas oj tukbʼes ja bʼa jmodo. Ja keʼn sok ja Laurie jchapunejtikonxa oj wajkotikon bʼa barko sbʼejtajel ja bʼa stiʼ jaʼ bʼa África sok skʼutsjel ja océano Atlántico man Estados Unidos. Ja bʼa mero snalan ja océano, kechantani keʼntikon ja teytikon ja bʼa chʼin barko bʼa sjoybʼunejotikon yuj jitsan kilometroʼik jaʼ, bʼa tini kaʼa jbʼaj kuenta ja jastal jel yal chʼinotik ja keʼntiki yuja niwan jKʼulumantiki. Jelni ja jtyempo ja bʼa luʼumkʼinali (pe ja bʼa océano mini ay jas mas wa xbʼobʼ jkʼuluk), ja yuj wajni jkʼujol skʼumajel ja Biblia. Pe jani mas ya jpensaraʼuk ja loʼilik bʼa wa xcholo ja sakʼanil ja Jesús. Ama mini ayiʼoj mulal, ayni yiʼoj modoʼalik bʼa jel cham yiljel, pe mini tʼun sleʼa modo bʼa atoyjuk. Ja mas tʼilan ja bʼa sakʼanil mini yeʼnuk jani ja sTati.

Yajni jpensaran ja sjejel bʼa Jesús, kaʼa jbʼaj kuenta ke mi oj bʼobʼ kayi ja sGobyerno ja Dyos kechantasok ja tyempo wa xkankuj sobra, cha tʼilani jaʼ akʼotuk ja mas tʼilan ja bʼa jsakʼanili (Mateo 6:33). Yajni wajtikon ja bʼa Estados Unidos, kalatikon oj katikonkan juntiro ja barko sok jaxani oj waj jkʼujoltikon yaʼteltajel ja Dyosi.

Ja bʼajtanto, yajni keʼnta wa xpensaraʼan jbʼaji, mini tʼun seguro la ajyiyon ja jastal oj elkʼot soka jas wa stsaʼa skʼulajeli. Pe ja wego jtaʼunejxa jun biboʼil bʼa mini xloʼlani (Isaías 48:17, 18). Cha jtaʼunejxa jun stojol ja bʼa jsakʼanil: ja yaʼteltajel ja Dyos sok skoltajel ja kristyano jumasaʼ bʼa oj snaʼe sbʼaj.

Stsʼakatal yuja rasonik bʼa Biblia, jelxani tojbʼita ja jnupaneltikoni. Cha yaʼunej koʼ jlekilaltikon ja Jyoba sok jun tsamal kakʼixtikon bʼa cha kʼotel snaʼ sbʼaj sok syajtajel.

Ja bʼa jsakʼaniltikoni mini tolabida pasil wajel. Pe ja Jyoba mini tʼun yaʼunejotikonkani, ja yuj puesto aytikon bʼa mi oj el jganatikon sok bʼa tolabida oj jipjkʼujoltikon bʼa yeʼna (Proverbios 3:5, 6).