Julio: Ernesto, jelni kabʼunej stsamalil loʼilanelotik sbʼaja Biblia. * ¿Wa xjula kʼujol ja ekʼele wa jobʼoki sbʼaja sGobyerno ja Dyosi? Wa walakabʼ waxa kʼana oja naʼ jas yuj ja testigoʼik bʼa Jyoba wa sjeʼawe kʼe yaʼ mandar bʼa 1914.

Ernesto: Janiʼa, jani jaw ja jas jkʼuman june ja bʼa wa rebistaʼex ke ja sGobyerno ja Dyos kʼe ya mandar bʼa jabʼil 1914, sok ajyi jun jduda. Wani xa walawex ke yibʼanal ja skʼuʼajela wiʼojex tini wa xwawe x-eluk bʼa Biblia.

Julio: Jachukniʼa.

Ernesto: Pe ja keʼn jkʼumunejni yibʼanal ja Biblia sok mini bʼa jtaʼunej ja jabʼil jawi. Ja yuj ochyon bʼa Internet sok jleʼa ja «1914» bʼa jun Biblia, sok mini jtaʼa.

Julio: Wa xkʼulana felicitar yuj chabʼ jasunuk. Bʼajtan, yuja wa kʼumunejxa yibʼanal ja Biblia. Wa xchiknaji chaʼanyabʼal waxa wila.

Ernesto: Janiʼa, bʼa keʼna mini ay jun pilan libro oj slaje.

Julio: Akuerdoni ayon. Bʼa xchabʼil, wa xkʼulana felicitar yuja wa xwa makunuk bʼa slejel ja sjakʼjel jawa dudaʼiki. Jachni mero waxa kʼulan jastal wa xyala ja Biblia oj jkʼuluktik: bʼa mok katikan slejel ja snajeli. *¡Jelni lek yuja jelxa kʼujolani!

Ernesto: Tsʼakatal Julio. Yujni wa xkʼana oj jnebʼ mas. Pes, kʼe jpaklay mas sok jtaʼani jun jasunuk sbʼaja 1914 ja bʼa libro wantik spaklajeli. Sbʼajni jun niwan teʼ skʼutsuwe sok cha kʼi yajkʼachil ekʼele... Ma lajansok jachtik.

Julio: Ah, jaʼi. Jani ja jas alubʼalkan ja bʼa kapitulo 4 bʼa Daniel. Wani staʼa tiʼal bʼa jun wayichal ajyiyuj ja Nabucodonosor, ja rey bʼa Babilonia.

Ernesto: Jachukniʼa, jani jawa. Jitsani ekʼele jkʼuman, pe ja smeranili mitoni xkabʼ stojol jas yuj ti chʼikan ja sGobyerno ja Dyos ma ja 1914.

Julio: Mok chamuka kʼujol. Cha mini ja aluman Daniel yabʼ stojol ja yaljelik jaw jakel bʼa Dyos, anima yeʼn stsʼijbʼankani.

Ernesto: ¿Meran lek?

Julio: Meran. Kʼela ja jas stsʼijbʼan ja il ja Daniel 12:8: «Kabʼi, pe mini kabʼ stojolil».

Ernesto: Ta jachuki, mini kechan keʼnuk. Maxani wa xyaki kulan jkʼujol.

Julio: ¿Wan maʼ xa naʼa jas yuj jach ekʼ sbʼaja Daniel? Yujni sbʼaja Dyosi, mito jaʼuk ja mero styempoʼil oj abʼxuk stojol ja yaljelik jaw. Pe ja jaw tukbʼitani. Ja bʼa jtyempotiki wanxani xbʼobʼ kabʼtik stojol ja jas alubʼalkan bʼa yakan tsʼijbʼunubʼal.

Ernesto: ¿Wanxa?

Julio: Wan, jachni wa xcholo ja bersikulo ti nochani, ja bersikulo 9. Ila ja jas wa xyala: «Ja yaljeliki oj ajyuk nakʼan sok lutan masan bʼa stikʼanil ja tyempo». Jastalni waxa wila, ja jas alubʼalkan it kechani wa xbʼobʼ abʼxuk stojol masan ja bʼa stikʼanil ja tyempo. Sok bʼa yibʼanal ja jastik wan ekʼeli, wani sjeʼa tixani wantik ajyel sakʼan ja bʼa tyempo jawi. Ojni kiltik mas tsaʼan ja bʼa libro wantik spaklajeli. *

Ernesto: ¿Oj maʼ bʼobʼa cholkabʼ ja jas alubʼalkani?

Julio: Oj leʼ modo yaljela wabʼi.

Julio: Bʼajtan la kiltik tʼusan ja jas swaychin ja rey Nabucodonosor, sok tsaʼan la kiltik jas wa stojolan. ¿Jastal xa wila?

Ernesto: Lekni xkabʼa.

Julio: Ja Nabucodonosor swaychin jun niwan teʼ bʼa wa staʼa kʼot ja satkʼinali. Ja bʼa swayichi yabʼ jun akʼa rason bʼa Dyos bʼa wa xyala a-kʼutsjuk ja teʼi. Ja jas kechanta kani jani ja yechi sok ja stopi. Tixa ekʼ «juke tyempo» sok ja teʼi cha kʼi yajkʼachil ekʼele. * Ja jas alubʼalkan it kʼotni smeranil bʼajtan sbʼaja Nabucodonosor. Ja yeʼn kʼotelni jun rey jel ja yipi; jachni jastal ja teʼ bʼa wa staʼa kʼot ja satkʼinali. Bʼa pilan modo ja yeʼn cha skʼutsuwe-ele sok jachni yawekan bʼa «juke tyempo». ¿Wa xjula kʼujol jas wa stojolan?

Ernesto: Mmm... Mi xjul jkʼujol.

Julio: Ja Biblia wa xyala ke pax lokoʼil, sok lajansok jachni ajyi bʼa juke jabʼil ma «juke tyempo». Kʼotni yakan ajyel reyil. Pe, yajni chʼak ja tyempo jaw yaʼa kulan sok cha kʼe yaʼ mandar. *

Ernesto: Lek ay, wanonxa yabʼjel stojol. Pe, ¿jasa ti chʼikan yibʼanal ja jaw soka sGobyerno ja Dyos sok ja 1914?

Julio: Yujni ja jas alubʼalkani kʼotelxa smeranil chabʼ ekʼele. Ja sbʼajtanili, kʼotni smeranil yajni aji kʼot tekʼan ja smandaranel ja Nabucodonosor. Sok ja xchabʼili, jaʼa yajni aji kʼot tekʼan ja sGobyerno ja Dyosi. Ja jastal kʼot smeranil ja bʼa xchabʼili jani ti chʼikan soka sGobyerno ja Dyosi.

Ernesto: ¿Sok jastal waxa naʼa kʼot smeranil bʼa xchabʼil jun jasunuk?

Julio: Pes bʼa oj kʼekotik, yujni ja jas mero alubʼalkani wa xchikteskitik jujuntik jasunuk. Ja Daniel 4:17 wa xyala ke ja jas alubʼalkani jani bʼa oj snaʼe ja kristyanoʼik a-snaʼe «ke ja Maʼ jel Niwani yeʼnani ja Mandaranum ja bʼa sgobyerno ja kristyanoʼiki, sok ja maʼ wa skʼana oj yayi wani xyayi». ¿Wa wila maʼ ja yaljel «ja bʼa sgobyerno ja kristyanoʼiki»?

Ernesto: Jaʼi, ja ili wa xyala «ke ja Maʼ jel Niwani yeʼnani ja Mandaranum ja bʼa sgobyerno ja kristyanoʼiki».

Julio: ¿Sok maʼ waxa kʼuʼan kʼotel ja Maʼ jel Niwani?

Ernesto: Jaʼa Dyosi, ¿maʼ miyuk?

Julio: Jachukniʼa. Ja yaljel jaw wa sjeʼa ke ja jas alubʼalkani mi jaʼita ti chʼikan soka Nabucodonosor. Cha tini chʼikansok «ja bʼa sgobyerno ja kristyanoʼiki», wa xkʼan alxuk, ja gobyerno yiʼoj ja Dyos ja bʼa kristyanoʼiki. Ta jpaklaytik ja jastik ti chʼikan ja bʼa jas alubʼalkani, ojni anaʼ mas jasun kʼotel.

Ernesto: Lek, la jpaklaytik.

Julio: Ja libro bʼa Daniel ay yiʼoj jun yolomajel bʼa tikʼanxta wa staʼa tiʼal: ja jastal kujlaji ja sGobyerno ja Dyos sok ja Jesukristo jastal olomal. ¿Jastal xa wila ta kilatik jun sjejel? Jaʼa Daniel 2:44. Awa pabor, kʼuman.

Ernesto: Lek. Wa xyala: «Ja bʼa skʼakʼujik ja mandaranumik jaw, ja Dyos bʼa satkʼinali oj ya kujlajuk jun gobyerno bʼa mini oj ajuk chʼayuk snajel. Ja gobyerno iti mini oj ajuk ekʼuk bʼa pilan chonabʼ. Oj swachʼtalaʼuk sok oj xchʼaysnajel spetsanil ja gobyernoʼik jaw, sok kechantani yeʼn oj kan kulan bʼa tolabida».

Julio: Tsʼakatal. ¿Oj maʼ wal ja bersikulo it ja wan stajel tiʼal ja sGobyerno ja Dyosi?

Ernesto: Mmm... Mi jel seguro ayon.

Julio: Ja bersikulo wa xyala ke ja gobyerno it «oj kan kulan bʼa tolabida». ¿Machun mas yuja Dyos oj bʼobʼ ya ajyuk jun gobyerno bʼa jel oj albʼuk?

Ernesto: Pes mini machʼa.

Julio: Miniʼa. La jletik pilan jun jasun alubʼalkan bʼa wa staʼa tiʼal ja sGobyerno ja Dyosi. Tey bʼa Daniel 7:13, 14 sok wa staʼa tiʼal bʼa jun kristyano oj kʼot rey. Ila ja jas wa xyala: «Ja yeʼn ajiyi mandar, toyjelal sok jun gobyerno, bʼa jachuk ja lugarik, ja chonabʼik sok kʼumalik spetsanil ja yeʼnleʼi oj yaʼteltaye kechan yeʼna. Ja smandaranel jun mandaranel bʼa tolabida bʼa mey stikʼanil, sok ja sgobyerno mini oj chʼaysnajel». Ja bʼa bersikuloʼik it ayni jas wa xyala bʼa jtaʼatikta tiʼal ja bʼajtanto.

Ernesto: Ayniʼa, cha wa staʼa tiʼal bʼa jun gobyerno.

Julio: Jachukniʼa. Sok mini kualkier gobyernoʼuk. Ta awila wa xyala ke ay yiʼoj cholal sbʼaja «lugarik, ja chonabʼik sok kʼumalik». Bʼa tuk yaljel, wa xyaʼa mandar bʼa yibʼanal ja Luʼumi.

Ernesto: Mini bʼa kiluneja, pe ayni wiʼoj rason. Jachni wa xyala ja tiwi.

Julio: Sok ila yajkʼachil ekʼele ja jas wa xyala ja ili: «Ja smandaranel jun mandaranel bʼa tolabida bʼa mey stikʼanil, sok ja sgobyerno mini oj chʼaysnajel». ¿Anke jelni slaja sbʼaj ja bersikulo it soka bʼa Daniel 2:44 bʼa wanto chʼak jkʼumtiki?

Ernesto: Wani slaja sbʼaj lek.

Julio: Lek ay, la katik juljkʼujoltik ja jas jnebʼunejtiki. Ja jas alubʼalkan ja bʼa kapitulo 4 bʼa Daniel, jani bʼa oj ajuk snaʼ ja kristyano «ke ja Maʼ jel Niwani yeʼnani ja Mandaranum ja bʼa sgobyerno ja kristyanoʼiki». Ja it wa sjeʼa ke ja jas alubʼalkani wani xkʼot smeranil bʼa june masto ekʼxel yuja Nabucodonosor. Chomajkil ja libro bʼa Daniel wani xtaʼatik jitsan jas alubʼalkan bʼa junxtani wa staʼa tiʼal: ja bʼa mero styempoʼil yajni ja sGobyerno ja Dyos oj kʼe yaʼ mandar bʼa yeʼnxa olomal ja Jesukristo. Spetsanil ja it wa xchiktes ja jastik alubʼalkan ja bʼa kapitulo 4 bʼa Daniel, jani wan stajel tiʼal sbʼaja sGobyerno ja Dyosi, ¿anke meran?

Ernesto: Meraniʼa. Pe mitoni xkabʼ stojol jas yuj ti chʼikan ja 1914.

Julio: Pe, la cha kumxukotik ja bʼa styempo ja rey Nabucodonosor. Kalatikni ja sbʼajtanil ekʼele kʼot smeranil ja bʼa jas alubʼalkani, yeʼnani ja niwan teʼi. Ja smandaraneli kʼot tekʼan yajni kʼutsji ja niwan teʼi sok ekʼ juke tyempo sbʼaja yeʼni. Ja Nabucodonosor pax lokoʼil pe yajni ekʼ ja tyempo jaw yaʼa kulan sok cha kʼe yaʼ mandar. Ja jas kʼot smeranil ja bʼa xchabʼili, ja sgobyerno ja Dyos aji kʼot tekʼan anima mi yeʼn smuluk ja Dyosi.

Ernesto: ¿Jastal? Mi xkabʼ stojol.

Julio: Kʼela, ja bʼa tyempo najate wa x-alxi ke ja reyik bʼa Israel ti wa xkulaniye «ja bʼa skujlayubʼ ja Jyoba». * Ja jaw wa xkʼan yal ke wani xyaʼawe mandar bʼa sparte ja Dyosi. Ja sgobyernoʼe jani wa senyaʼan ja sgobyerno ja yeʼni. Pe ekʼ ja tyempo, tʼusan mi yibʼanaluk ja yeʼnleʼi xchaykʼujolane sok yibʼanal ja chonabʼi cha jachni skʼulane. Yuja jaw, ja yeʼn yaʼakan ke ja Babilonia a-sbʼajukekan ja Israel ja bʼa jabʼil 607 bʼajtanto yuja jtyempotiki. Man tyempo jaw mixani ajyi reyik bʼa wa xyaʼawe mandar bʼa sparte ja Jyoba ja bʼa Jerusalén. Wa xkʼan alxuk, ja sgobyerno ja Dyos aji kʼot tekʼan. ¿Wan maʼ chiknajel stojol?

Ernesto: Waniʼa.

Julio: Ja juke tyempo kʼe bʼa 607 bʼajtanto yuja jtyempotiki. Jani ja tyempoʼik jaw ja aji kʼot tekʼan ja sgobyerno ja Dyos sok yajni chʼak ja tyempoʼik jaw, ja Dyos stsaʼa jun yajkʼachil rey bʼa oj yaʼ mandar bʼa sparte, pe ja ekʼele it tixa bʼa satkʼinal. Jaxa tuk jastik alubʼalkan ke jkʼumantik ja bʼa Daniel cha kʼotni smeranil ja bʼa xchʼakulabʼil ja tyempoʼik jaw. Ja sjobʼjel ja wego ja it: ¿jas tyempo chʼak ja juke tyempo? Ta jtaʼatik ja sjakʼjeli ojni jnatik ja styempo kʼe yaʼ mandar ja sGobyerno ja Dyosi.

Ernesto: Mmm… ¿Kʼe bʼa 1914?

Julio: Jachukniʼa Ernesto, wa naʼaniʼa.

Ernesto: Pe, ¿jastal wa xnaxi ja waj ja jabʼil jaw?

Julio: Pes yajni ja Jesús jak ja bʼa Luʼum, yala ke ja juke tyempo jaw mitoni xchʼaki. * Ja yuj wantikni stajel tiʼal bʼa jun tyempo masto albʼel. Ja juke tyempo kʼeni jitsan siglo bʼajtanto yuja Jesús sok ekʼto jitsan sigloʼik tsaʼan yajni kumxi ja bʼa satkʼinali. Cha ajuluka kʼujol, kalatik ke ja jas alubʼalkan ja bʼa Daniel mini oj abʼxuk stojol masanto ja «bʼa stikʼanil ja tyempo». * Pe ja bʼa xchʼakulabʼil ja jabʼilik och 1800, jun kʼole estudianteʼik bʼa Biblia skʼanawe spaklajel lek ja it sok tuk jastik alubʼalkan oj ekʼuk. Takal takal yabʼye och stojol ke ja juke tyempo oj chʼakuk bʼa 1914. Ja jas ekʼel man tyempo jaw wa xchiktes ke bʼa jabʼil jaw kʼe yaʼ mandar ja sGobyerno ja Dyosi sok kʼeni ja tyempo wa sbʼiʼilan ja stikʼanil ja tyempo ma ja tsaʼanikxta kʼakʼu ja bʼa luʼumkʼinal it. Wa xnaʼa ja jastik it jeltoni jitsan jas yajkʼachil bʼa weʼna, bʼa oja pensaraʼuk Ernesto.

Ernesto: ¡Janiʼa! Tʼilani oj cha jkʼel yajkʼachil ekʼele bʼa oj kabʼ lek stojol.

Julio: Wa xkabʼya stojol. Ja keʼn cha yiʼajnikuj tyempo bʼa yabʼjel stojol. Wa xmajlay ja loʼilanitik sbʼaja sGobyerno ja Dyos skoltuneja yiljel ke jastal testigoʼotikon bʼa Jyoba tini wa xkatikon el bʼa Biblia ja jas wa xkalatikoni.

Ernesto: Jachniʼa. Jelni cham xkabʼ ja jastal jel xa jipa kʼujolex ja bʼa Biblia.

Julio: Sok ja keʼn wa xkila wani xcha kʼana oja jipakʼujol ja weʼn. Jastalni wa xkalawabʼ, jeltoni jitsan jas yajkʼachil bʼa weʼna bʼa oja pensaraʼuk sok bʼobʼta oj ajyukawuj sjobʼjelik. Jun sjejel, kalunejtik ke ja juke tyempoʼi kʼe bʼa 607 bʼajtanto yuja jtyempotik sok jani syakunej sbʼajsok lek soka sGobyerno ja Dyosi. Pe, ¿jas yuj wa xkalatik chʼak bʼa 1914? *

Ernesto: Jaʼi, ja jaw mitoni xkabʼ stojol.

Julio: Ja Biblia cha wa skoltayotik yajel kuenta ja juke tyempo. ¿Lek maʼ xa wila oj cha jtatik tiʼal ja jaw bʼa pilan ekʼele? *

Ernesto: Lek. Ti oj majlayaʼa.