Julio: Saʼan Ernesto, jel xyaki gusto wa xcha kilawa yajkʼachil ekʼele. Jelni xkabʼ stsamalil jakel kada semana b’a loʼilanel amok bʼa Biblia. * ¿Jastal aya?

Ernesto: Lek ayon, tsʼakatal.

Julio: ¡Wa xyaki gusto! Ja tsaʼanxta ekʼele loʼilanitik, jtaʼatik tiʼal sbʼaja, jas yuja testigoʼik bʼa Jyoba wa xkalatikon ke ja sGobyerno ja Dyos kʼe ya mandar bʼa 1914. * Jastalni kilatik ja bʼa kapitulo 4 bʼa Daniel wa xcholokabʼtik bʼa wa xya kabʼtik stojol sbʼaja it. ¿Wan maʼ xjula kʼujol jasunuk?

Ernesto: Wan, ja bʼa swayich ja rey Nabucodonosor.

Julio: Jachniʼa. Ja yeʼn swaychin jun niwan teʼ bʼa staʼunej kʼot ja satkʼinali. Ja bʼa swayichi yabʼ ja skʼumal jun anjel bʼa yaʼa mandar akʼutsjuk el ja teʼ jaw. Kechantani kan ja yech sok ja stopi. Tsaʼan ekʼ «juke tyempo» ja teʼ jaw cha kʼi yajkʼachil ekʼele. * Cha kilatik ke ja jas alubʼalkan oj ekʼuk chabʼxa ekʼele kʼota smeranil. ¿Jasa waj ja bʼajtan? ¿Wan maʼ xjula kʼujol?

Ernesto: Juni jasunuk bʼa ekʼ sbʼaj ja Nabucodonosor. Pax lokoʼil sok jachni ajyi juke jabʼil.

Julio: Jachniʼa. Pax loko’il sok yaʼakan ajyel rey. Ja bʼa xchabʼil ekʼele kʼot smeranil ja jas alubʼalkan oj ekʼuk, ja yajni aji kʼot tekʼan juke tyempo ja sGobyerno ja Dyos ja bʼa Luʼumi. Ja tyempo it jani kʼe yajni chʼayji snajel ja Jerusalén ja bʼa jabʼil 607 bʼajtanto bʼa styempo ja Jesús, wa xkʼan alxuk, bʼajtanto yuja jtyempotiki. Man tyempo jaw mixani ajyi reyik ja bʼa Luʼum bʼa wa senyaʼan ja Jyoba. Yajni xchʼak ja tyempo it, ja Dyos ojni stsaʼ jun ajkʼach rey, pe tixani bʼa satkʼinal. Bʼa tuk yaljel, yajni xchʼak ja juke tyempo, ojni kʼe yaʼ mandar ja sGobyerno ja Dyos bʼa satkʼinal. Pes, kilatikta jas tyempo kʼe ajtabʼaxuk ja juke tyempo. Ja wego oj jkiltik janekʼ tyempo albʼi bʼa oj jnatik jas tyempo kʼe ya mandar ja sGobyerno ja Dyosi. ¿Wanaxa maʼ yabʼjel stojol?

Ernesto: Wan, julta jkʼujol ja bʼa jas loʼilanitik ja tsaʼanxta ekʼele.

Julio: Lek ay. Anto la kiltik janekʼ albʼi ja juke tyempo. Ja keʼn cha jpaklaytani bʼajtan bʼa oj juljkʼujol ja jastik ti chʼikan. Oj jleʼ modo bʼa oj cholawabʼ bʼa pasil oja wabʼ stojol.

Ernesto: Lek.

Julio: Bʼajtan, ja jas kʼot smeranil ja bʼa Nabucodonosor ja juke tyempo albʼi juke jabʼil. Xchabʼil ja jas kʼot smeranil ja bʼa sGobyerno ja Dyos masni albʼi jitsan tyempo.

Ernesto: ¿Jastal waxa naʼa?

Julio: Bʼajtan, ja juke tyempo kʼe bʼa jabʼil 607 bʼajtanto yuja jtyempotiki, yajni chʼayji snajel ja Jerusalén. Ta man tyempo jaw kajtabʼantik juke jabʼil wani la kʼotik bʼa jabʼil 600 bʼajtanto yuja jtyempotiki ja bʼa jabʼil jaw mini jas ekʼ bʼa ti chʼikan sbʼaja sGobyerno ja Dyosi. Pe jastalxani jpaklaytikta, yajni ja Jesús jak bʼa Luʼum jitsan sigloʼik tsaʼan yala ke ja juke tyempo mitoni xchʼaki.

Ernesto: Wan julta jkʼujol

Julio: Ja yuj sbʼaja ja it, ja juke tyempo mini juke jabʼiluk; kʼotelni jun tyempo mas jitsan.

Ernesto: ¿Mas jitsan? ¿Janekʼ tyempo?

Julio: Ja bʼa Apocalipsis, ayni jas alubʼalkan oj ekʼuk bʼa wani slaja sbʼajsok ja bʼa Daniel, sok ojni skoltayotik snajel janekʼ albʼi ja juke tyempo. Ja bʼa jas alubʼal it, wa xyala ke ja oxe tyempo sok snalan ayiʼoj 1,260 kʼakʼu.  * Ja yuj ja yajtabʼajel chabʼ ekʼele, ayiʼoj juke tyempo sok wa x-elkʼot 2,520 kʼakʼu. ¿Man il lek wajumotik?

Ernesto: Jaʼi, pe mito xkabʼ lek stojol jas yuj weʼnlex waxa kʼuʼanex kʼe ja sGobyerno ja Dyos kʼe bʼa 1914.

Julio: Lek ay ja wego oj jkiltik. Jujuntik ja bʼa jas alubʼalkan oj ekʼuk ja bʼa Biblia, jun kʼakʼu kʼotel jun jabʼil. * Ta katik makunuk ja modo it ja bʼa juke tyempo, 2,520 kʼakʼu wa x-elkʼot 2,520 jabʼil. Pe ta kajtabʼantik ja 2,520 jabʼil man jabʼil 607 bʼajtanto yuja jtyempotiki bʼa jani tyempo jaw ja kʼe stulyi ja juke tyempo wala eltikʼot ja 1914. * Jani rason it yuja wa xbʼobʼ kaltikon ke ja jabʼil chʼak ja juke tyempo sok ja Jesús aji och jastal Rey ja bʼa sGobyerno ja Dyosi. Chomajkil ja bʼa 1914 kʼe ekʼuk ja jastik alubʼalkan oj ekʼuk ja bʼa Biblia oj ekʼuk ja bʼa tsaʼanikxta kʼakʼu.

Ernesto: ¿Jun sjejel?

Julio: Ja bʼa Mateo 24:7, ja Jesús yalakan jasa oj ekʼuk yajni xkʼe yaʼ mandar ja bʼa satkʼinali: «Yujni yeʼnta oj tiroʼanuke ja chonabʼiki sok yeʼnta oj tiroʼanuke ja gobyerno jumasaʼ, sok oj ajyuk waʼin sok terremotoʼik bʼa tuktukil lugar». Ilawil, ja Jesús yala ke oj ajyuk waʼin sok terremotoʼik. ¿Mi maʼ jaʼuk ja jas wan ekʼel b’a Luʼum ja b’a tyempo jawi?

Ernesto: Ja’i, merani’a.

Julio: Ja Jesús cha yala ke oj ajyuk guerraʼik. Ja bʼa Apocalipsis wa xyala ke mini kechan guerraʼuk bʼa lugarik guerrani bʼa tuktukil chonabʼil bʼa oj yixtalan bʼa yibʼanal ja Luʼumi. * ¿Wan ma’ xjula kʼujol jas ora kʼe ja Bʼajtan Guerra ekʼ bʼa yibʼanal ja Luʼumi?

Ernesto: Bʼa 1914. Jaʼi. Jani mero jabʼil jaw ja waxa walawex ke ja Jesús kʼe ya mandar. Mini tʼun bʼa ekʼel bʼa jpensar bʼa oj kaʼ slaj sbʼaj.

Julio: Jachni mero, yajni wa xkilatik jastal wa slaja sbʼaja jas alubʼalkan oj ekʼuk sbʼaja juke tyempo, soka alubʼal sbʼaja bʼa tsaʼanikxta kʼakʼu wani syaka sbʼaj. Ja testigoʼik bʼa Jyoba jkʼuʼunejtikon lek ke ja Jesús kʼe ya mandar bʼa 1914 sok man tyempo jaw snochojan ja tsaʼanikxta kʼakʼu. *

Ernesto: Wanon slejel modo yabʼjel stojol sbʼaja it.

Julio: Wa xkabʼya lek stojol. Ja keʼn jelni cha wokol kabʼ yajni choljikabʼ bʼajtan ekʼele. Pe wa xmajlay ke ja bʼa jas loʼilanitik oj skoltaya bʼa oja wil lek anima ja Biblia mi staʼa tiʼal ja bʼa 1914, pe ja testigoʼik bʼa Jyoba ayni kiʼojtikon rason yuja wa xkʼuʼantikon ke ja Jesús ke yaʼ mandar ja bʼa jabʼil it. Cha wa xmajlay ke bʼobʼ jeʼawi, ke spetsanil ja jas wa skʼuʼane ja testigoʼik bʼa Jyoba ti wa xkatikon el bʼa Biblia.

Ernesto: Meraniʼa, jani jaw ja jas jel cham xkila. Ja weʼn jani waxa cholokabʼ soka Biblia. Chikan jas xjobʼowi, mini kechan waxa wala «ja keʼn wa xkʼuʼan» ma «wa xpensaraʼan». Tolabida wa xwa makunuk ja Biblia. Pe ¿jas yuj jel wokol yabʼjel stojol? ¿Jas yuja Dyos mi yalakan directo ke ja Jesús oj kʼe yaʼ mandar bʼa 1914?

Julio: Ernesto juni lekil sjobʼjel. Pe ayni jitsan jastik junuk bʼa mi xyala directo ja Biblia. ¿Jas yuja jach yakan ja Dyos? Ma ¿jas yuj t’ilan oj jkʼujoluktik b’a oj kabʼtik stojol? ¿Lek ma’ xa wabʼ ta loʼilanitik sbʼaja it ja b’a semana jakumi?

Ernesto: Lek, lekni xkabʼa. Ti oj jmajlaya.